ބޭރުގެ އުފައްދާ ވިޔަފާރިތަކަށް ރަންގަނޑެއްގެ ގޮތުގައި ޗައިނާ ދިޔައީ، މީގެ ކުރިން ބޭރުގެ ފަރާތްތަކަށް އެޕީލްވަމުންނެވެ. ދުނިޔޭގެ އެންމެ ބޮޑު ކޮންސިއުމަރ މާކެޓުގައި ބައެއް މަލްޓިނޭޝަނަލް ކުންފުނިތަކުން ދަނީ އެމީހުންގެ މުސްތަގުބަލާމެދު ވިސްނަމުންނެވެ. އަދި ޗައިނާއިން ބޭރުވުމަށް ބައެއް ކުންފުނިތަކުން މިހާރުވެސް ދަނީ ޗައިނާއިން ނިކުންނަން މިސްރާބު ޖަހާފައެވެ.
ރީޓެއިލް ވިޔަފާރީގައި މަޝްހޫރު ލޮޓޭ ގްރޫޕުން ދަނީ އެ ކުންފުނީގެ ޑިޕާޓްމެންޓް ސްޓޯރުތަކާއި ޗައިނާ ހެޑްކުއާޓަރު ބަންދުކުރުމުގެ އެންމެ ފަހު މަރުހަލާގައި މަސައްކަތް ކުރަމުންނެވެ.
ލޮޓޭ ކުންފުނީގެ ފޯކަސް އޭޝިއާގެ އެހެން މާކެޓުތަކަށް އަމާޒުކުރަމުން އަންނަކަމަށް ބްލޫމްބަރގްއިންވެސް ރިޕޯޓް ކޮށްފައި ވެއެވެ.
ސޯލްގައި ހުންނަ ކޮސްމެޓިކްސް އުފައްދާ ކުންފުންޏެއް ކަމަށްވާ އެމޮރިޕެސިފިކް ގްރޫޕުން 1،000 އަށް ވުރެ ގިނަ ފިހާރަ ޗައިނާގައި ބަންދުކޮށްފައި ވެއެވެ.
ސެމްސަންގް ޑިސްޕްލޭ އާއި އެލްޖީ އިލެކްޓްރޯނިކްސް އިންކް ފަދަ ކޮރެއާގެ މެނުފެކްޗަރިން ޖަޔަންޓުން މިހާރުވެސް ދަނީ ޗައިނާގެ ބައެއް ފެކްޓްރީތައް ވިއްކައި ނުވަތަ ބަންދުކުރަމުންނެވެ. އަދި ޗައިނާއިން މިހާރު އަޅާފައިވާ ލޮކްޑައުންގެ ސަބަބުން އުފެދިފައިވާ ނުތަނަވަސްކަމާ ހެދި ދަތިވާކަމަށްވެސް ބުނެފައި ވެއެވެ.
ކޮރެއާގެ ޓްރޭޑް މިނިސްޓްރީގެ ދަށުން ހިންގާ ޔުނިޓެއް ކަމަށްވާ ކޮޓްރާގައި ޝަންހާއީ އާއި ބެއިޖިންގެ އޮފީސްތަކުގެ ވެރިއެއްގެ ގޮތުގައި ކުރިން މަސައްކަތް ކުރެއްވި ސްކޮޓް ކިމް ވިދާޅުވީ ޗައިނާއަކީ މިހާރު ކޮރެއާއަށް ފުރުސަތު އޮތް ތަނެއް ނޫން ކަމަށެވެ.
"ޗައިނާގެ ޒީރޯ-ކޮވިޑު ގެ ސިޔާސަތު ވަރަށް އުދަގު، ޗައިނާގެ ކުންފުނިތަކުން ދަނީ ކޮރެއާގެ ކުންފުނިތަކާ އެކު މުއާމަލާތް ކުރަމުން. ކޮރެޔާގެ ކުންފުނިތަކުން ޗައިނާގައި ފައިސާ ހެދުމާމެދު ގެންގުޅޭ ވިސްނުން ދޫކޮށްލުން ރަނގަޅުވާނެ." އޭނާ ވިދާޅުވިއެވެ.
2021 ވަނަ އަހަރު ޗައިނާގެ ޖުމްލަ ރީޓެއިލް ސޭލްސް 44 ޓްރިލިއަން ޔުއާން (6.6 ޓްރިލިއަން ޑޮލަރު) އަށް އަރާފައިވާއިރު، އޭގެ ތެރޭގައި ކޮސްމެޓިކްސްއަށް 402.6 ބިލިއަން ޔުއާން ޚަރަދުކޮށްފައިވާކަމަށް ސަރުކާރުގެ ޑޭޓާން ދައްކައެވެ.
ދެކުނު ކޮރެއާ އާއި އެ ގައުމުގެ ކުންފުނިތައް ބެއިޖިންގެ ނުރުހުނުގެ ޝިކާރައަކަށްވީ 2017 ވަނަ އަހަރު އެމެރިކާގެ އެންޓި މިސައިލް ސިސްޓަމެއް ބެހެއްޓުމުންނެވެ.
ފެޑެރޭޝަން އޮފް ކޮރެއަން އިންޑަސްޓްރީޒްއިން މިދިޔަ ޑިސެމްބަރު މަހު ސާވޭކުރި ދެކުނު ކޮރެއާގެ 131 ކުންފުނީގެ ތެރެއިން ގާތްގަނޑަކަށް 86 އިންސައްތަ ކުންފުނިން ބުނެފައިވަނީ، ފާއިތުވީ ދިހަ ވަރަކަށް އަހަރު ދުވަހުގެ ތެރޭގައި ޗައިނާގެ ވިޔަފާރީގެ ހާލަތު ވަރަށް ބޮޑަށް ދަށަށް ގޮސްފައެވެ.
