ތުވާލޫގެ ޚާރިޖީ ވަޒީރު އަދި ނޯބެލް ސުލްހައިގެ އިނާމަށް ހުށަހެޅިފައިވާ ސިމޮން ކޯފީ، ވަނީ އދގެ އޯޝަން ކޮންފަރެންސުގައި ބައިވެރިވެ ވަޑައި ނުގަތުމަށް ނިންމަވައިފިއެވެ. އޭނާ މިފިޔަވަޅު އެޅުއްވީ، ޕޯޗުގަލްގެ ވެރރަށުގައި ބާއްވާފައިވާ އޯޝަން ކޮންފަރެންސްގައި ބައިވެރިވާ ޓައިވާންގެ ވަފްދަށް ޗައިނާއިން ހުރަސް އެޅުމުން އެކަމަށް އިހުތިޖާޖު ކުރެއްވުމުގެ ގޮތުންނެވެ.
މިނިސްޓަރ ކޯފީއަކީ، ޓުވާލޫއިން މި ކޮންފަރެންސްގައި ބައިވެރިވެ ވަޑައިގަންނަވާ ސަރުކާރުގެ އެންމެ މަތީ މަންދޫބެވެ.
ޔޫއެން އޯޝަންސް ކޮންފަރެންސަކީ ކެންޔާ އާއި ޕޯޗުގަލްގެ ސަރުކާރުން އިސްނަގައިގެން ބާއްވާ ކޮންފަރެންސެކެވެ.
މި ކޮންފަރެންސްގައި 193 ގައުމެއްގެ މަންދޫބުން ބައިވެރިވާނެއެވެ. އަދި 938 މަދަނީ ޖަމިއްޔާއާއި 75 ފައުންޑޭޝަނާއި 74 ޔުނިވާސިޓީ އަކުންވެސް ބައިވެރިވުމަށް ހަމަޖެހިފައި ވެއެވެ.
މިދިޔަ އަހަރު ބޭއްވި ކޮޕް 26 ސަމިޓްގައި އޭނާ ފެނިގެން ގޮސްފައި ވަނީ މޫދުގައި ހުންނަވައިގެން ތަގްރީރު ކުރައްވަނިކޮށެވެ.
ކޯފީގެ އިތުރުން ނޯބެލް ސުލްހައިގެ އިނާމަށް ނޮމިނޭޓްވި އެހެން ބޭފުޅުންގެ ތެރޭގައި ދުނިޔޭގެ ސިއްހަތު ޖަމިއްޔާއާއި ސަރ ޑޭވިޑް އެޓެނެބްރޯ، އަދި ބެލަރޫސްގެ ދެކޮޅުވެރި ސްވިޓްލާނާ ޓްސިކަންނޯސްކަޔާ، ގްރެޓާ ތޮންބާރގް އަދި ޕޯޕް ފްރާންސިސް ހިމެނިވަޑައިގަންނަވައެވެ.
