ސައުދީ އަރަބިއްޔާގައި ޔޯގާގެ ސިއްޙީ ފައިދާއަށް މީހުން ހޭލުންތެރިވުމުން ޔޯގާ ތަމްރީނަށް އޮންނަ ޑިމާންޑް ބޮޑު ވެއްޖެއެވެ. ސައޫދީ އަރަބިއްޔާގެ ހުރިހާ ސިޓީތަކެއްގައި ސްޕެޝަލިސްޓް ޔޯގާ އެކަޑަމީތަކާއި ތަމްރީނު އިންސްޓިޓިއުޓްތައް ގާއިމް ކުރުމަށް ވަނީ އިއުލާންކޮށްފައެވެ.ޖޫން މަހުގެ 21 ވަނަ ދުވަހު ފާހަގަކުރި 8 ވަނަ ބައިނަލްއަޤުވާމީ ޔޯގާ ދުވަހާ ގުޅުވައިގެން ސަޢޫދީ ޔޯގާ ކޮމިޓީއާއި ސަޢޫދީ މިނިސްޓްރީ އޮފް ސްޕޯޓްސްއާ ގުޅިގެން، ޔޯގާގެ ދާއިރާގައި އިންވެސްޓް ކުރުމަށް މީހުންނަށް ހިތްވަރު ދީފައި ވެއެވެ.
ސަޢޫދީ ޔޯގާ ކޮމިޓީގެ ރައީސް ނަޢޫފް އަލްމަރްވާއީ ވިދާޅުވީ ސައުދީ އަރަބިއްޔާގައި ޔޯގާއަށް އޮތް ޑިމާންޑް ބޮޑުވުމުގެ ސަބަބުން، ޔޯގާ ހަދަން ބޭނުންވާ މީހުންނަށް ފަސޭހައިން ޔޯގާ ހެދޭ ގޮތަށް ހުރިހާ ސިޓީއެއްގައި ޔޯގާ ސެންޓަރުތަކާއި ސްޓޫޑިއޯތައް އިތުރުކުރުމަށް އެ ކޮމިޓީން އަމާޒު ހިފާފައިވާ ކަމަށެވެ.
އެކަމަނާ ވިދާޅުވީ ޔޯގާގެ ޚިދުމަތްތައް މިހާރު އާންމުކޮށް ބޮޑެތި ސިޓީތަކުގައި ލިބެން ހުރެއެވެ. އެކަމަކު ދެކުނުން ޢަސީރާއި އަބްހާގައި، އަދި އުތުރުން ތަބޫކާއި ހާއިލްގައި، އަދި ހުޅަނގުން މައްކާއާއި މަދީނާއާއި ޔަންބޫޢު ގައި ވެސް ޔޯގާއަށް ޑިމާންޑް އިތުރު ވެފައިވާ ކަމަށެވެ. އޭގެ އިތުރުން އަފްލާޖް ފަދަ ކުދި ސިޓީތަކާއި ރިޔާޟު ސަރަހައްދުގެ އައްސޭރިފަށުގެ ސިޓީތަކުގައިވެސް މީހުން ދަނީ ޔޯގާއަށް ޝައުގުވެރިވަމުންނެވެ.
ސައުދީގައި ޔޯގާ ކަސްރަތުތައް ކުރިއެރުވުމަށް ޔޯގާ ކޮމިޓީން މަސައްކަތް ކުރާނެ ކަމަށާއި އަދި މުސްތަގްބަލުގައި ޔޯގާސާނާގެ މުބާރާތް ވެސް އިންތިޒާމު ކުރާނެ ކަމަށް އެކަމަނާ ވިދާޅުވިއެވެ.
ސައޫދީ އަރަބިއްޔާގައި ޔޯގާ އިންސްޓްރަކްޓަރުންނަށް ވާން ބޭނުންވާ މީހުންނަށް ލައިސަންސް ދެނީ މިނިސްޓްރީ އޮފް ސްޕޯޓްސްއާ ގުޅިގެން ޔޯގާ ކޮމިޓީންނެވެ.
ސައޫދީ އަރަބިއްޔާއިން ރާވާފައި ވަނީ، ސައުދީ އަރަބިއްޔާގައި ބާއްވާ ފުރަތަމަ ޕްރޮފެޝަނަލް ޔޯގާސާނާ މުބާރާތުގައި ޔޯގާ ޕްރެކްޓިޝަނަރުން ބައިވެރި ކުރާށެވެ. އެކަމަށް ފަހިކޮށްދިނުމުގެ ގޮތުނ ސައުދީ އަރަބިއްޔާގައި ޔޯގާ ޕްރޮފެޝަނަލުންނަށް ޕްލެޓްފޯމެއް ގާއިމުކޮށްދީ، އޭޝިއަން ޔޯގާސާނާ ސްޕޯޓްސް ފެޑެރޭޝަނާއި ވޯލްޑް ޔޯގާސާނާ ސްޕޯޓްސް ފެޑެރޭޝަން ފަދަ ބައިނަލްއަގުވާމީ އިދާރާތަކާ ގުޅިގެން ސައުދީ އަރަބިއްޔާގައި ޔޯގާ ކޮމިޓީން ލޯކަލް ޗެމްޕިއަންޝިޕްތައް ބޭއްވުމަށް ރާވާފައިވެސް ވެއެވެ.
މަރްވާއީ ވިދާޅުވިގޮތުގައި ޖޫން މަހުގެ 21 ވަނަ ދުވަހު ފަށާފައިވާ ތަފާތު ވައްތަރުގެ ޔޯގާތައް ޕްރެކްޓިސް ކުރުމުގެ މުބާރާތުގެ ނަތީޖާ އިއުލާން ކުރުން އޮންނާނީ ޖުލައި މަހުގެ 3 ވަނަ ދުވަހުއެވެ.
"ސައުދީ ޔޯގާ ކޮމިޓީން މި އިސްނެގުންތަކަށް ވަރަށް ބޮޑު އިޖާބައެއް ދޭނެ ކަމަށް ލަފާކުރަނީ ސައުދީ އަރަބިއްޔާގައި ޔޯގާ އަށް ލޯބިކުރާ މީހުންނާއި ޕްރެކްޓިޝަނަރުން ނާއި ޓްރެއިނަރުން ގިނަވުމުގެ ސަބަބުން،" މަރްވާއީގެ ވިދާޅުވި އެވެ.ސަޢޫދީ ޢަރަބިއްޔާގެ ކުޅިވަރާބެހޭ ވަޒީރު ޕްރިންސް ޢަބްދުލްޢަޒީޒް ބިން ތުރްކީ އަލްފައިޞަލް، ވަނީ ކުޅިވަރު ކްލަބްތަކާއި، އެކަޑަމީތަކާއި، ޔޯގާ އިންސްޓިއުޓްތަކާއި އަމިއްލަ ޖިމްތަކަށް ލައިސަންސް ދިނުމަށް ޖޫން މަހުގެ 21 ވަނަ ދުވަހު ޚާއްސަ ޕްލެޓްފޯމެއް އިފްތިތާޙް ކުރައްވާފައެވެ. މިއީ ސައޫދީގައި މިގޮތަށް ލައިސަންސް ދޭންފެށި ފުރތަމަ ފަހަރެވެ.
ސައޫދީ ސަރުކާރުން ގެންދަނީ "ކޮލިޓީ އޮފް ލައިފް ޕްރޮގްރާމް" ގެ ދަށުން ސައޫދީގައި ކުޅިވަރާއި ކަސްރަތަށް ބާރުއަޅައި ކުޅިވަރުގެ ދާއިރާގައި ޕްރައިވެޓް ސެކްޓަރގެ އިންވެސްޓްމެންޓް އިތުރު ކުރާށެވެ.
