ދޮރުން ދޮރަށް ޕޯލިއޯ ވެކްސިން ދިނުމުގެ ކެމްޕޭނެއް ޕާކިސްތާން ޕޭޝާވަރު ސަރަހައްދުގައި ކުރިއަށް ދަނިކޮށް، ސައިކަލްތަކެއްގައި ތިބި ހަތިޔާރުއެޅި ބަޔަކު ޕާކިސްތާނުގެ ފުލުހުންނާ ދިމާއަށް ބަޑީގެ ހަމަލާތަކެއް ދީ، ދެ ފުލުހަކާއި ޕޯލިއޯ ޖެހުމުގެ މަސައްކަތުގައި އުޅޭ މީހަކު މަރާލައިފިއެވެ. މި ހަލަމާގައި ހިސާބުގަނޑުގައި ހުއްޓި ހުރި މީހަކުވެސް ޒަޚަމްވިއެވެ.
ޚައިބަރު ޕަޚްތޫންޚުވާ ޕްރޮވިންސްގެ ޑިސްޓްރިކްޓެއް ކަމަށްވާ އުތުރު ވަޒީރިސްތާނުގައި ދިން މި ހަމަލާގެ ޒިންމާ އަދި އެއްވެސް ފަރާތަކުން އުފުލާފައެއް ނުވެއެވެ. މި ހަމަލާ ދީފައި މިވަނީ ޕޯލިއޯ ދިނުމަށް ޕާކިސްތާނު ސަރުކާރުން އިތުރު ކެމްޕޭނެއް ފެށިތާ އެއް ދުވަސް ފަހުންނެވެ.
މިދިޔަ އޭޕްރީލް މަހުން ފެށިގެން ޕާކިސްތާނުން ވަނީ ޕޯލިއޯ ގެ 11 ކޭސް އެއް އަލަށް ރަޖިސްޓްރީ ކޮށްފައެވެ.
ޕާކިސްތާނަކީ ދީނީ ޚިޔާލުގެ މީހުން އާންމުކޮށް ޕޯލިއޯ ވެކްސިންއާ ދެކޮޅަށް މަސައްކަތް ކުރާ ގައުމެކެވެ.
އުތުރު ވަޒިރިސްތާނުގައި ބެލެނިވެރިން ކުޑަކުދިންނަށް ވެކްސިން ދޭން ދެކޮޅު ހަދައެވެ.
ޕާކިސްތާނުގައި ޕޯލިއޯ ވެކްސިން ދޭން އުޅޭ މީހުންނާ ދެކޮޅަށް އިސްލާމީ ހަނގުރާމަވެރިން ހަމަލާތައް އަމާޒު ކުރެއެވެ.
ޕާކިސްތާނާއި އަފްޣާނިސްތާނަކީ ދުނިޔޭގައި ޕޯލިއޯ އަދިވެސް ފެތުރެމުންދާ ހަމައެކަނި ދެގައުމެވެ. 2021 ވަނަ އަހަރު ޕާކިސްތާނުން ރިޕޯޓްކޮށްފައިވަނީ އެންމެ ކޭސްއެއް ކަމަށާއި، ޕޯލިއޯ ނައްތާލުމާ ގާތްވެފައިވާ ކަމުގެ އުންމީދު ބޮޑުކަމަށް ޕާކިސްތާނުން ވަނީ ރިޕޯޓްކޮށްފައެވެ.
