އިންޑިއާ ސަރުކާރުން ޖީ20 ސަމިޓް އިންޑިއާގެ ޖައްމޫ ކަޝްމީރުގައި ބޭއްވުމަށް ނިންމައިފިއެވެ. އިންޑިއާއިން ބުނާ ގޮތުގައި ހިމާލަޔާ ސަރަހައްދަށް ސުލްޙަ އައިސް އާންމު ހާލަތަށް ރުޖޫއަވެ، ޕާކިސްތާނު ސަރަހައްދު ހުރަސްކޮށް ދެމުންދާ ޓެރަރިޒަމް ހަމަލާތައް ހުއްޓުވައި ހާލަތު އާދައިގެ ހަމަޖެހުމަކަށް ގެނެވިފައިވާ ކަން މިއިން ސާފުވާ ކަމަށެވެ.
ސުލްހައިގެ ހާލަތުގެ ސަބަބުން އިންޑިއާގެ ކަޝްމީރަކީ، ދުނިޔޭގެ އެންމެ ކުރިއަރާފައިވާ ތަނަކަށް ވަރަށް ބާރަށް ބަދަލުވަމުން އަންނަ ސަރަހައްދެކެވެ.
ޖައްމޫ ކަޝްމީރު ސަރުކާރުން ވަނީ ޖީ-20 ގެ ބައްދަލުވުމުގެ އިންތިޒާމުތައް ވިލަރެސް ކުރުމަށް 5 މެމްބަރުންގެ މައްޗަށް އެކުލެވޭ ކޮމިޓީއެއް އެކުލަވާލާފައެވެ. މަތީ ފެންވަރުގެ މި ސަމިޓުގެ ތައްޔާރީގެ މަރުހަލާ މިހާރު ވަނީ ފަށާފަ އެވެ.
ޖީ-20 ވެގެންދާނީ ފާއިތުވެދިޔަ ތިން އަހަރާއި ބައިގެ ތެރޭގައި ޖޭކޭގައި ބާއްވާ ފުރަތަމަ ބައިނަލްއަގްވާމީ ބޮޑު ސަމިޓެވެ.
އިންޑިއާ ސަރުކާރުން ބުނެފައި ވަނީ ކަޝްމީރުގައި މިފަދަ ބައްދަލު ވުމެއް ބޭއްވުމަށް ފުރުސަތު ލިބިގެން ދިއުމަކީ ކަޝްމީރު މީހުންނަށް ލިބޭ ޝަރަފެއް ކަމަށެވެ.
ކަޝްމީރުގައި ޖީ20 ބޭއްވުމާ މެދު ޕާކިސްތާނުން ވަނީ ވަރަށް ހަރުކަށި ކޮށް ރައްދު ދީފައެވެ. ޕާކިސްތާނުން މަސައްކަތް ކޮށްފައި ވަނީ ދުނިޔޭގެ ވެރިރަށްތަކުގައި ވަހާކަ ދައްކައިގެން ކަޝްމީރާ މެދު އިންޑިއާއިން ނިންމި ނިންމުން އަނބުރާލާށެވެ. ނަމަވެސް އެއީ އިންޑިއާގެ ދާޚިލީ މައްސަލައެއް ކަމަށް ބުނެ އެއްވެސް ފަރާތަކުން ޕާކިސްތާނަށް ވާގވެރިވެފައެއް ނުވެއެވެ.
ޕާކިސްތާނުން ބުނެފައި ވަނީ ޖައްމޫ ކަޝްމީރަކީ މައްސަލަ އުފެދިފައިވާ ސަރަހައްދެއް ކަމަށެވެ.
މިދިޔަ ދެ އަހަރުގެ ތެރޭގައި ޖައްމޫ ކަޝްމީރަށް ވަނީ ބޭރުގެ އިންވެސްޓަރުންގެ ފަރާތުން އެތައް ހާސް ކްރޯޑު ރުޕީސްގެ ވިޔަފާރީގެ ޕްރޮޕޯސަލްތައް ލިބިފައެވެ. އެއީ މީގެ 70 އަހަރު ކުރިން ދުވަހަކުވެސް ހިނގާފައިވާ ކަމެއް ނޫނެވެ.
މިއަހަރުގެ މެއި މަހު ޖައްމޫ އެންޑް ކަޝްމީރު ސަރުކާރުން ވަނީ ޔުނައިޓެޑް އަރަބް އެމިރޭޓްސްގެ ވިޔަފާރި ކުންފުނިތަކާއެކު ހަ އެއްބަސްވުމެއްގައި ސޮއިކޮށްފައެވެ. މި ވިޔަފާރިތަކުން ވަނީ ޖައްމޫ ކަޝްމީރުގައި ރިއަލް އެސްޓޭޓް، އިންފްރާސްޓްރަކްޗާ، ޓޫރިޒަމް، ހެލްތުކެއާ އަދި މީހުން ވަޒީފާގެ ދާއިރާއިން އިންވެސްޓް ކުރާނެކަމަށް ބުނެފައެވެ.
އިންޑިއާއިން ބުނާ ގޮތުގައި ޖައްމޫ ކަޝްމީރުގައި ޖީ20ގެ ސަމިޓް ބޭއްވުމަކީ އިންޑިއާއަށް ލިބުނު ވަރަށް ބޮޑު ކާމިޔާބީއެއް ކަމަށެވެ.
ޖީ20ގައި ދުނިޔޭގެ އާބާދީގެ ގާތްގަނޑަކަށް ތިންބައިކުޅަ ދެބައި މީހުންނާއި ދުނިޔޭގެ ޤައުމީ އުފެއްދުންތެރިކަމުގެ 85 އިންސައްތައާއި، ދުނިޔޭގެ އިންވެސްޓްމަންޓްގެ 80 އިންސައްތަ އަދި ދުނިޔޭގެ ވިޔަފާރީގެ 75 އިންސައްތައަށްވުރެ ބޮޑު ބައެއް ތަމްސީލުކުރެއެވެ.
ޖީ20 އަކީ އެމެރިކާ، ކެނެޑާ، އިނގިރޭސިވިލާތް، ޖަރުމަނުވިލާތް، ފަރަންސޭސިވިލާތް، ރަޝިޔާ، ޗައިނާ، އިންޑިއާ، ޖަޕާން އަދި ޔޫރަޕިއަން ޔޫނިއަންގެ ގައުމުތައް ހިމެނޭ ސިޔާސީ އިޤްތިޞާދީ އެލަޔަންސެކެވެ. މި ޖަމާއަތުގެ މެމްބަރު ގައުމުތަކުގެ ތެރޭގައި އާޖެންޓީނާ، އޮސްޓްރޭލިއާ، ބްރެޒިލް، އިންޑޮނޭޝިއާ، އިޓަލީ، މެކްސިކޯ، ސައުދީ އަރަބިއްޔާ، ސައުތު އެފްރިކާ، ދެކުނު ކޮރެއާ އަދި ތުރުކީ ހިމެނެއެވެ. ޖީ20ގެ ސަމިޓްތަކުގައި އިންޓަނޭޝަނަލް މަނިޓަރީ ފަންޑް (އައިއެމްއެފް) އާއި ވޯލްޑް ބޭންކްގެ މަންދޫބުން ވެސް ބައިވެރިވެ އެވެ.
ސައުދީ އަރަބިއްޔާގެ ވެރިރަށް ރިޔާޟުގައި 2020 ވަނަ އަހަރުގެ ނޮވެމްބަރު މަހު، ބާއްވާފައިވާ ޖީ20ގެ ލީޑަރުން ވަނީ، ކޮވިޑް-19ގެ ބަލިމަޑުކަމާ ގުޅިގެން އެއް އަހަރު ދުވަހަށް ސަމިޓް ފަސްކޮށްފައެވެ.
