ނ. މަނަދޫ ބަނދަރުގެ ނެރު ފުންކުރުމާއި ބޭރުތޮށި ލުމުގެ މަސައްކަތް ވަރަށް ބާރަށް ކުރިއަށްދާ ކަމަށް އެމްޓީސީސީން ބުނެފިއެވެ. އެމަސައްކަތުގެ 41 ޕަސެންޓް މިހާރުވަނީ ނިމިފައި ކަމަށް ވެސް މަސައްކަތްކުރާ އެމްޓީސީސީން ބުނެފައިިވެއެވެ. އެމްޓީސީސީން ބުނީ، އެ މަޝްރޫއުގެ ދަށުން މިހާރު ކުރިއަށްދަނީ އާ ނެރަށް ވަދެވެން އޮންނަ ސަރަހައްދު ފުންކުރުމުގެ މަސައްކަތް ކަމަށެވެ.
މިއީ ޖުމުލަ 32.1 މިލިއަން ރުފިޔާ ޚަރަދުކޮށްގެން ހިންގާ ތަރައްގީގެ މި މަޝްރޫއުއެކެވެ. މި މަސައްކަތް އެމްޓީސީސީއާ ހަވާލުކޮށްފައިވަނީ 2021 ވަނަ އަހަރު އޭޕްރޯލް ގައެވެ. މަޝްރޫއުއަށް ޕްރޮޖެކްޓް ސައިޓް މޮބިލައިޒް ކުރީ އޭޕްރިލް ހަތެއްގައެވެ.
މި މަޝްރޫއުގެ ދަށުން، 29,038 އަކަ މީޓަރުގެ ސަރަހައްދެއްގެ ބަނދަރު ފުންކުރުމާއި 195 މީޓަރު ބޭރުތޮއްޓެއްލުމަށް ހަމަޖެހިފައިވެއެވެ. އަދި 188 މީޓަރުގެ ސަރަހައްދެއްގައި ރިވެޓްމެންޓް ޖަހައި، ކޮންކްރީޓް ބްރިޖެއް އެޅުމަށް ވެސް ހަމަޖެހިފައިވެއެވެ. އޭގެއިތުރުން ރޭމްޕެއް ހެދުމާއި ނެރުބައްތި ހަރުކުރުމުގެ މަސައްކަތް ވެސް ހިމެނެ އެވެ.
