ދިވެހިރާއްޖެ ހައި ސްޕީޑް ފެރީ ވިއުގައަކުން ގުޅާލުމަށް ފަރުމާކޮށްފައިވާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫޢުގެ ފުރަތަމަ ފިޔަވަހީގެ ދަށުން "ރާއްޖެ ޓްރާންސްޕޯޓް ލިންކް" ގެ ޚިދުމަތް ޒޯން 1 ގެ ހއ. އަތޮޅަށް ކަނޑައަޅާފައިވާ އަގުތަކުގައި 3 ޖުލައި 2022 ވަނަ ދުވަހު ރަސްމީކޮށް ފެށުމަށް ހަމަޖެހިފައިވާކަމަށް އެމްޓީސީސީން ބުނެފިއެވެ.
އެކުންފުނީން މިއަދު ބުނެފައިވަނީ ފުރަތަމަ ފިޔަވަހީގެ ދަށުން "ރާއްޖެ ޓްރާންސްޕޯޓް ލިންކް"ގެ ޚިދުމަތް ޒޯން 1 ގެ ށ. އަތޮޅު ފިޔަވައި ދެން ހިމެނޭ 2 އަތޮޅުކަމުގައިވާ ހދ. އަދި ހއ. އަތޮޅުގެ ރަށްތަކަށް ރަސްމީކޮށް ފެށުނީ ކަމަށެވެ. އަގުނަގައިގެން ރަސްމީކޮށް ޚިދުމަތް ފެށުމުގެ ކުރިން ހއ. އަތޮޅުގެ ރަށްތަކަށް 26 ޖޫން 2022 ވަނަ ދުވަހުން ފެށިގެން 2 ޖުލައި 2022 ވަނަ ދުވަހާ ހަމައަށް އާރް.ޓީ.އެލްގެ ދަތުރުތައް ކޮށްދެމުން އަންނަނީ މުޅިން ހިލެއެވެ.
ހިލޭ ދަތުރު ކޮށްދިނުމަށް ކަނޑައަޅާފައިވާ މުއްދަތުގެ މައިގަނޑު މަޤްޞަދަކީ ކަސްޓަމަރުން ޝެޑިއުލަށް އަހުލުވެރިކޮށް މި ޚިދުމަތްރަނގަޅަށް ތަޖުރިބާކުރުމުގެ ފުރުޞަތު ދިނުމެވެ. ރާއްޖެ ޓްރާންސްޕޯޓް ލިންކުގެ ޚިދުމަތް އަގުނަގައިގެން ކުރުމަށް ރަސްމީކޮށް ފެށުނު ނަމަވެސް، ތިން އަހަރުން ދަށުގެ ކުޑަކުދިންނާއި، އެންސްޕާގައި ރެޖިސްޓަރވެފައިވާ ޚާއްޞަ އެހީއަށް ބޭނުންވާ ފަރާތްތަކަށް ހިލޭ ދަތުރުކުރެވޭނެ ކަމަށް އެމްޓީީސީސީން ބުނެެފައިވެއެވެ.
އާރްޓީއެލް ފެރީގެ ޚިދުމަތަށް 3 ޖުލައި 2022 އިން ފެށިގެން ޓިކެޓް ބައްލަވައިގަތުމަށް ބޭނުންފުޅުވާ ކަސްޓަމަރުންނަށް، 1 ޖުލައި 2022 ވަނަ ދުވަހުން ފެށިގެން އެމްޓީސީސީންް އެކަމަށް ޚާއްޞަކޮށްފައިވާ ވެބްސައިޓް އަދި މޯބައިލް އެޕް މެދުވެރިކޮށްޓިކެޓް ބައްލަވައިގަނެވޭނެއެވެ. އަދި ހިލޭ ދަތުރުކުރެވޭ މުއްދަތު 2 ޖޫން 2022 ނިޔަލަށް ހަމަވުމާއެކު، ކައުންސިލް މެދުވެރިކޮށް ޖާގަ ދޫކުރުން ހުއްޓާލެވޭނެ ކަމަށް އެމްޓީސީސީން ބުނެފައިވެއެވެ.
