ނިއުޔޯރކްގައި ބަޑިޖަހައި މަރާލި ޗައިނާ ދަރިކޮޅުގެ ފުޑް ޑެލިވަރީ ގައި މަސައްކަތް ކުރި މީހާގެ އަންހެނުން، އޭނާގެ ފިރިމީހާ މަރާލި މީހާ ދޫކޮށްލުމުން އެކަމާ ދެކޮޅަށް އަޑު ފުލާން ފަށައިފިއެވެ.
ނިއުޔޯރކްގެ ކުއީންސްގައި ޖޫން 1ގައި ހައްޔަރުކޮށްފައިވާ މީހަކީ އުމުރުން 51 އަހަރުގެ ގްލެން ހަރޝްއެވެ. އޭނާއަށް ތުހުމަތު ކުރެވުނީ އޭޕްރީލް މަހުގެ 30 ވަނަ ދުވަހު ޗައިނާ ދަރިކޮޅުގެ ޒިވެން ޔާންގެ ބޮލަށް ބަޑިޖަހައި މަރާލި ކަމަށެވެ.
ގްލެން ހަރޝް ވަނީ ކަފާލާތުގެ ދަށުން 500،000 ޑޮލަރު ދެއްކުމުން ގޭ ބަންދަށް ބަދަލުކޮށްފައެވެ.
ޒިވެންގެ އަންހެނުން ބުނެފައި ވަނީ އޭނާގެ ފިރިމީހާ މަރާލި މީހާ ކަފާލާތުގެ ދަށުން ދޫކޮށްލާފައިވާތީ އޭނާ ވަރަށް ބޮޑަށް ނުތަނަވަސްވާ ކަމަށެވެ. އަދި އެމީހާ މިނިވަން ކޮށް ހުރުމަކީ އޭނާއަށާއި މުޖުތަމައަށް ރައްކާތެރި ނޫން ކަމަށް އިހުސާސް ކުރެވޭ ކަމަށެވެ.
ނިއުޔޯރކްގެ ޑިސްޓްރިކްޓް އެޓާނީގެ އޮފީހުން ބުނެފައި ވަނީ ހާރޝް ގޭ ބަންދުގައި ބެހެއްޓުމުގެ ކުރިން، އޭނާގެ ފައިގައި އިލެކްޓްރޯނިކް މޮނިޓަރިންގ ޑިވައިސްއެއް ހަރުކޮށްފައިވާނެ ކަމަށެވެ.
ކުއީންސް ޑިސްޓްރިކްޓް އެޓާނީ މެލިންޑާ ކާޓްޒް ވިދާޅުވާ ގޮތުގައި، ހަރޝްގެ މައްޗަށް ކުށް ސާބިތުވެއްޖެނަމަ އުމުރު ދުވަހުގެ ޖަލު ހުކުމެއް އަންނާނެއެވެ.
