ރަޝިޔާއިން ޔޫކްރެއިންގައި ފަށާފައިވާ ހަނގުރާމައާ ގުޅިގެން ޔޫރަޕްގެ ދިފާއީ ބާރުތައް ވަރުގަދަ ކުރާނެ ކަމަށް އެމެރިކާއިން ވައުދުވެއްޖެއެވެ. އަދި މޮސްކޯއަކީ ހުޅަނގުގެ އެންމެ ބޮޑު ނުރައްކާ ކަމަށްވެސް ނޭޓޯއިން ވަނީ މިއަދު ނިމޭ މެޑްރިޑް ސަމިޓްގައި އިއުލާން ކޮށްފައެވެ.
ނޭޓޯގެ ލީޑަރުން ވިދާޅުވީ ރަޝިޔާއަކީ ނޭޓޯގެ އިއްތިހާދުގެ ގައުމުތަކުގެ ސަލާމަތާއި، ޔޫރޯ އެޓްލާންޓިކް ސަރަހައްދުގެ ސުލްހައާއި ހަމަޖެހުމަށް އޮތް އެންމެ ބޮޑު އަދި ސީދާ ނުރައްކާ ކަމަށެވެ.
ނޭޓޯގެ ސަމިޓް ޑިކްލަރޭޝަންގައި ބުނެފައި ވަނީ ޗައިނާއިންވެސް ނޭޓޯގެ މަސްލަހަތު ފުށުއަރާ ކަންކަމުގައި އުޅޭ ކަމަށާއި ޗައިނާއަކީވެސް ނޭޓޯއަށް އޮތް ނުރައްކަލެއ ްކަމަށެވެ.
މެޑްރިޑް ސަމިޓްގައި ނޭޓޯއިން ވަނީ ކުރިން ވަކި ފަރާތަކަށް ނުޖެހޭ ދެގައުމުކަމަށްވާ ސްވިޑްންއާއި ފިންލެންޑަށް ރަސްމީކޮށް ނޭޓޯގެ އަސްކަރީ އިއްތިހާދުގައި ބައިވެރިވުމަށް ދައުވަތު ދީފައެވެ. އަދި ތުރުކީން ކުރިން ހަދަމުން އައި ދެކޮޅު ހެދުންވެސް ވަނީ ހުއްޓާލާފައެވެ.
ނޭޓޯގެ ސމިޓްގައި އެމެރކާއިން އިއުލާން ކުރި ބައެއް ކަންތައްތަކުގެ ތެރޭގައި، އެމެރިކާގެ ރައީސް ޖޯ ބައިޑަން ވަނީ އެމެރިކާ ސިފައިންނާއި، މަނަވަރު އަދި ބަޑި ބޯޓުތަކާއި، މަތިންދާބޯޓުތަކާއި އައު ފައުޖުތައް ޔޫރަޕަށް ފޮނުވާނެކަން އިޢްލާން ކުރައްވާފައެވެ.
ބައިޑަން ވިދާޅުވީ، އެމެރިކާގެ މި ފިޔަވަޅަކީ ރަޝިޔާގެ ރައީސް ޕޫޓިން ބޭނުންފުޅު ނުވާނެ ފިޔަވަޅެއް ކަމަށެވެ.
ތުރުކުމާނިސްތާނަށް ކުރައްވާ ދަތުރުފުޅުގައި ރަޝިޔާގެ ރައީސް ޕޫޓިން ވިދާޅުވީ ނޭޓޯއިން ދަނީ ޔޫރަޕް އެމެރިކާގެ ހަން ފެތުރުމަށް މަސައްކަތް ކުރަމުން ކަމަށެވެ.
ތުރުކުމެނިސްތާނުގެ ވެރިރަށް އަޝްގްއާބާދުގައި ނޫސްވެރިންނާ ވާހަކަ ދައްކަވަމުން ޕުޓިން ވިދާޅުވީ ހުޅަނގުން ޔޫކްރެއިން ބޭނުން ކުރަނީ ހިޅަނގުގެ ގައުމުތަކުގެ އަމއްލަ މަސްލަހަތު ދިފާއު ކުރުމަށެވެ.
އެމެރިކާއިން އިއުލާން ކޮށްފައިވާ އެހެން ފިޔަވަޅުތަކުގެ ތެރޭގައި އެމެރިކާގެ 5 ވަނަ އާމީ ކޯޕްސްގެ މައި މަރުކަޒު ޕޮލެންޑަށް ބަދަލުކުރާން ވެސް ވަނީ ނިންމާފައެވެ. އޭގެ އިތުރުން، ރޫމޭނިއާގައި އަސްކަރިއްޔާގެ ބްރިގޭޑެއް ބޭއްވުމަށާއި އަދި އެފް-35 ހަނގުރާމަވެރި މަތިންދާބޯޓްގެ ދެ ސްކޮޑްރަން އިނގިރޭސިވިލާތަށް ފޮނުވުމަށާއި އެމެރިކާގެ ވައިގެ ދިފާއީ ނިޒާމުތައް ޖަރުމަނާއި އިޓަލީއަށް ފޮނުވުމަށާއި ސްޕެއިންގައި ހުންނަ އެމެރިކާގެ ނޭވީ ޑިސްޓްރޯޔާ މަނަވަރުތަކުގެ އަދަދު ހަތަރަކުން ހަތަކަށް އިތުރު ކުރުމަށް ނިންމާފައި ވެއެވެ.
މި ކަންކަމުގެ އިތުރުން އިނގިރޭސިވިލާތުން ވަނީ ޔޫކްރެއިންއަށް އިތުރު 1.2 ބިލިއަން ޑޮލަރުގެ އަސްކަރީ އެހީ ދޭނެ ކަމަށް ވައުދުވެފައެވެ.
ނޭޓޯގެ ވެރޔާ ޔޯހާންސް ސްޓޮލްޓެންބާގް ވިދާޅުވީ ޔޫކްރެއިން އަށް ނޭޓޯއަށް ބަރޯސާ ވެވިދާނެ ކަމަށެވެ. އަދި ކިތަންމެ ގިނަ ދުވަހެއް ވަންދެންވެސް ބަރޯސާ ވެވިދާނެ ކަމަށެވެ.
ނޭޓޯއިން 2010 ވަނަ އަހަރުގެ ފަހުން ފުރަތަމަ ފަހަރަށް އަޕްޑޭޓްކޮށްފައިވާ އެ އިއްތިހާދުގެ އަމަލީ ޑޮކިއުމެންޓްގައި ބުނެފައި ވަނީ ހުޅަނގުގެ އަސްކަރީ އިއްތިހާދުގެ މެމްބަރުންނަށް ހަމަލާއެއް ދީފާނެ ކަމުގެ ފުރުސަތު ނެތްކަމަށ ނުބެލެވޭނެ ކަމަށެވެ.
ނޭޓޯއިން މިއަންނަ އަހަރު ބާއްވާ ސަމިޓް ބައްވާނީ ލިތުއޭނިއާގައެވެ.
