އިމްރާން ޚާންގެ ވެރިކަމުގައި ދައުލަތަށް ލިބުނު ހަދިޔތައް ވިއްކަވައިގެން ޕާކިސްތާނުގެ ކުރީގެ ބޮޑުވަޒީރު ވަނީ 154 މިލިއަން ޕާކިސްތާން ރުޕީސްއަށް ވުރެ ބޮޑު އާމްދަނީއެއް ހޯއްދަވާފައެވެ.
އިމްރާން ޚާން ވަނީ ހަދިޔާގެ ގޮތުގައި ލިބިވަޑައިގަތް ދައުލަތުގެ މުދަލެއް ކަމަށްވާ ތިން ގަޑި ވިއްކަވައިގެން އާމްދަނީ ހޯއްދަވާފައެވެ. މި ހަދިޔާތަކަކީ މީގެ ކުރިން މީޑިއާގައި ރިޕޯޓްކޮށްފައިވާ ހަދިޔާތަކުގެ އިތުރުން، އަލަށް ލިބުނު މައުލޫމާތަކުން އެނގުނު ހަދިޔާތަކެއް ކަމަށް މީޑިއާއިން ބުނެއެވެ.
ރިޕޯޓްތައް ބުނާގޮތުން މިއީ ޖަވާހިރު ޖަހައިގެން ހަދާފައިވާ ގަޑި ތަކެކެވެ. ދައުލަތަށް ލިބޭ ހަދިޔާތައް ގަންނަން އޮންނަ އުސޫލުވެސް އިމްރާން ޚާން ބަދަލުކުރެއްވިއެވެ. އިމްރާން ގެންނެވި ބަދަލުގައި އެ އެއްޗެއްގެ އަގުގެ 20 ޕަސެންޓް ދީފައި އެ ހަދިޔާއެއް އަމިއްލަ ކުރެވިދާނެއެވެ.ޕާކސްތާންގައި ގަވާއިދުތައް އޮންނަ ގޮތުން ދައުލަތަށް ލިބޭ ހަދިޔާތައް ހަވާލުކުރަން ޖެހޭނީ ޓޮޝްޚާނާއަށެވެ. އަދި ސަރުކާރުގެ އޮފިޝަލުންނަށް ލިބޭ ހަދިޔާގެ މައުލޫމާތު ވަގުތުން ވަގުތަށް ރިޕޯޓް ކުރަންވެސް ޖެހެއެވެ. "ދަ ނިއުސް" އިން ރިޕޯޓްކޮށްފައިވާ ގޮތުގައި އިމްރާނަށް އާމްދަނީގެ ގޮތުގައި 36 މިލިއަން ރުޕީސް ލިބިވަޑައިގެންފައި ވަނީ ގަލްފުގެ ގައުމުތަކުން ޕާކިސްތާނަށް ޒިޔާރަތްކުރެއްވި އިއްޒަތްތެރިން ހަދިޔާކުރެއްވި އަގުބޮޑު ތިން ގަޑި ވިއްކައިގެންނެވެ.މިދިޔަ އޭޕްރީލް މަހު ޕާކިސްތާން ބޮޑު ވަޒީރު ޝެހްބާޒް ޝަރީފްވަނީ އިމްރާން ޚާން ދުބާއީގައި ޓޮޝްޚާނާގެ ހަދިޔާތަކެއް ވިއްކަވައިގެން 140 މިލިއަން ޕާކިސްތާން ރުޕީސް ހޯއްދެވިކަމަށް ތުހުމަތު ކުރައްވާފައެވެ.
