ޗައިނާއާ ދެކޮޅަށް ދިން ހެކަރުންގެ ހަމަލައެއްގައި ޝެންހާއީގެ ފުލުހުންގެ ޑޭޓާބޭސްއަކުން އެއް ބިލިއަން ޗައިނާ މީހުންގެ މައުލޫމާތު ފާއްދާލައިފިއެވެ.
މި ވާހަކަތައް ޔަގީން ވާނަމަ މިއީ، ތާރީހުގައި ވެސް ހިނގާފައިވާ އެންމެ ފުޅާދާއިރާއެއްގައި ޑޭޓާ ވަގަށް ނެގުމުގެ މަސައްކަތް ކަމުގައި ވެދާނެ ކަމަށެވެ.
އޮންލައިން ހެކްކުރުމުގެ ފޯރަމެއްގައި މިދިޔަ ހަފުތާގައި ކުރި ޕޯސްޓެއްގައި، "ޗައިނާޑަން" ހޭންޑްލް ބޭނުން ކުރާ މީހަކު ވަނީ، ގާތްގަނޑަކަށް 24 ޓެރަބައިޓްގެ ޑޭޓާ ވިއްކުމަށް ހުށަހަޅާފައެވެ.
އޭގެ ތެރޭގައި 1 ބިލިއަން މީހުންގެ މައުލޫމާތާއި، "އެތައް ބިލިއަން ކޭސް ރެކޯޑްސް" އެއް ގެ މައުލޫމާތު 10 ބިޓްކޮއިންއަށް ގާތްގަނޑަކަށް 200،000 ޑޮލަރަށް ވިއްކަން ހުށަހަޅާފައެވެ.
މި ޑޭޓާގެ ތެރޭގައި ޝެންހާއީ ނެޝަނަލް ޕޮލިސް ޑޭޓާބޭސްގެ މައުލޫމާތާއި، ނަމާއި، އެޑްރެސް، ނެޝަނަލް އައިޑެންޓިފިކޭޝަން ނަމްބަރު އަދި މޯބައިލް ފޯނު ނަމްބަރުތަކުގެ އިތުރުން ކޭސް ޑީޓެއިލްސް ވެސް ހިމެނެ އެވެ.
އެސޯސިއޭޓެޑް ޕްރެސްއިން ފެންނަ ޑޭޓާގެ ސާމްޕަލެއްގައި ނަން، އުފަން ތާރީހު، އުމުރު އަދި މޯބައިލް ނަމްބަރުތައް ހިމަނާފައި ވެއެވެ.
ބައެއް ފަރާތްތަކުން ވަނީ މި ޑޭޓާއާއި އަލީޕޭގައި ލިބެން ހުރި ޑޭޓާއާ އަޅައި މި ވާހަކަތަކުގެ ސައްހަކަން ކަށަވަރުކޮށްދީފައެވެ.
ތަޖުރިބާކާރުން ވިދާޅުވާ ގޮތުގައި މި ބްރީޗް ކަށަވަރު ވެއްޖެ ނަމަ މިއީ ތާރީހުގައި ވެސް ކުރިމަތިވާނެ އެންމެ ބޮޑު ބްރީޗް އެވެ.
ހޮންގްކޮންގްގައި ހުންނަ ސެކިއުރިޓީ ފާމް ނެޓްވޯކް ބޮކްސްގެ މެނޭޖިން ޑިރެކްޓަރު މައިކަލް ގެޒެލީ ވިދާޅުވި ގޮތުގައި މިފަދަ ގޮތަކަށް ޑޭޓާ ލީކްވުމަކީ ވަރަށް އެކަށީގެންވާ ކަމެއް ކަމަށެވެ.
"އޭނާ ވިދާޅުވީ ޑާކް ވެބްގައި މިހާރު ގާތްގަނޑަކަށް 12 ބިލިއަން މީހުންގެ ކޮމްޕްރޮމައިޒްޑް އެކައުންޓް އެބަހުރި ކަމަށާއި އެއީ ދުނިޔޭގެ ނިސްބަތުން ބަލާއިރު ބޮޑު އަދަދެއް ކަމަށެވެ. މާޒީގައި ގިނަ ފަހަރަށް ޑޭޓާ ލީކް ވަނީ އެމެރިކާއިން ކަމަށް އޭނާ ވިދާޅުވި އެވެ.
