ދުނިޔޭގެ ދެވަނައަށް އެންމެ ބޮޑު ކޮބަލްޓް މައިން ހިންގުމަށް ކޮންގޯގެ ކޯޓަކުން އައްޔަންކޮށްފައިވާ ވަގުތީ އެޑްމިނިސްޓްރޭޓަރަކު ވަނީ އެ މައިންގައި ކޮންގޯ ސަރުކާރާއެކު ހިއްސާވާ ޗައިނާގެ މެޖޯރިޓީ އޯނަރު ސީއެމްއޯސީގެ މައްޗަށް އެ މައިން ނަގާ މައުދަންތައް އެކުންފުނިން ވިއްކުން ހުއްޓާލުމަށް އަމުރު ކޮށްފިއެވެ. މިއަމުރު ބަޔާން ކޯށްފައިވާ ސިޓީ ފެނިފައިވާ ކަމަށް ރޮއެޓާޒްއިން ވަނީ ބުނެފައެވެ.
ސީއެމްއޯސީގެ ތަރުޖަމާނު ވިންސެންޓް ޒޫ ވިދާޅުވީ އެ ކުންފުންޏަށް މި ކަމާ ގުޅިގެން ސިޓީއެއް ލިބިފައި ނުވާކަމަށެވެ. އަދި އާދައިގެ މަތިން އުފެއްދުންތައް އެކްސްޕޯޓް ކުރަމުންދާނެ ކަމަށެވެ.
ކޮންގޯގެ ޖަސްޓިސް މިނިސްޓަރު މިދިޔަ މަހު ނެރުއްވި ވަގުތީ އަމުރު އުވާލި ނަމަވެސް، އެ މައިން އަދިވެސް އޮތީ ސަރުކާރުގެ ކޮންޓްރޯލު ދަށުގައި ކަމަށް ސީއެމްއޯސީން ވަނީ ބުނެފަ އެވެ.
މި ސިޓީތައް ވަގުތީ އެޑްމިނިސްޓްރޭޓަރ ފޮނުވާފައި ވަނީ ޖޫން މަހުގެ 29 ވަނަ ދުވަހާއި ޖުލައި މަހުގެ 1 ވަނަ ދުވަހު އެވެ.
ކޮންގޯގެ ސަރުކާރުން ބުނެފައިވަނީ، ގެކަމިން މައިންއިން ނަގާ މައުދަންތަކަށް ޗައިނާ ކުންފުނިން ދައްކަން ޖެހޭ ރޯޔަލްޓީގެ އަދަދު މަދުކުރުމަށް ސީއެމްއޯސީއިން މައިންގެ ރިޒާވްގެ އަދަދު ދަށްކޮށްފައިވާ ކަމަށް ޝައްކުކުރެވޭކަމަށެވެ. ޗައިނާ ކުންފުނިން އެކަން ދޮގު ކުރެއެވެ.
ޗައިނާ ކުންފުނިން ވަނީ މި މައިން އިން 2021 ވަނަ އަހަރު 18،501 ޓަނުގެ ކޮބަލްޓް އަދި 209،120 ޓަނުގެ ކޮޕަރ އުފައްދާފައެވެ.
