ފާއިތުވީ ތިން ހަފްތާގެ ތެރޭގައި ޕާކިސްތާނުގެ އެކި ހިސާބުތަކަށް ބޯކޮށް ވާރޭވެހި ހިނގި ހާދިސާތަކުގައި 77 މީހުން މަރުވެފައިވާ ކަމަށް އެގައުމުގެ މޫސުމާ ބެހޭ ވަޒީރު ވިދާޅުވެއްޖެއެވެ.
ބޯކޮށް ވާރޭ ވެހުމުގެ ސަބަބުން ގެދޮރާއި މަގުތަކާއި ބްރިޖްތަކާއި އިންޖީނުގެތަކަށްވެސް ގެއްލުންވެފައިވާކަމަށް ވެރިރަށް އިސްލާމްއާބާދުގައި ބޭއްވި ނިއުސް ކޮންފަރެންސެއްގައި ޝެރީ ރެހްމާން ވިދާޅުވިއެވެ.
ރަހްމާން ވިދާޅުވީ މަރުވި 77 މީހުންގެ ތެރެއިން 39 މީހުން މަރުވީ ބަލޫޗިސްތާނުގައި ކަމަށެވެ. ޓީވީ ފުޓޭޖްތަކުން ފެންނަ ގޮތުގައި ބަލޫޗިސްތާނުގައި ފެންބޮޑުވުމުން ވެހިކަލްތައްވެސް ވަނީ ބެހިގެން ގޮސްފައެވެ.
އަދި އިސްލާމްއާބާދާއި އިރުމަތީ ޕަންޖާބު ޕްރޮވިންސަށް ވެސް ވަނީ ބޯކޮށް ވާރޭ ވެހިފައެވެ. ޕާކިސްތާނުގެ ރައީސް އާރިފް އަލްވީ ވަނީ މި ހާދިސާގައި މަރުވި މީހުންގެ އާއިލާތަކަށް ތައުޒިޔާ ވިދާޅުވެފައެވެ.
އެ ސަރަހައްދުގެ ޑިޒާސްޓަރ މެނޭޖްމަންޓް އޭޖެންސީން ބުނެފައިވަނީ، ބަލޫޗިސްތާން ޕްރޮވިންސްގެ ވެރިރަށް ކުއެޓާގައި މަގުތަކާއި، ގެދޮރުގައި ފެންބޮޑުވެފައިވާ ކަމަށެވެ.
ރަހްމާން ވިދާޅުވީ، ޕާކިސްތާނަށް ދާދިފަހުން ކުރި ވިއްސާރައަކީ އެވްރެޖްކޮށް ވާރޭ ވެހޭ މިންވަރަށްވުރެ %87 ބޯ ކޮށް ކޮށްފައިވާ ވިއްސާރައެއް ކަމަށެވެ. މޫސުމަށް އަންނަ ބަދަލުތަކާ ގުޅުވައި އެކަމަނާ ވިދާޅުވީ، ޕާކިސްތާނު ރައްޔިތުން އިތުރު ފެންބޮޑުވުމާ ކުރިމަތިލާން ތައްޔާރަށް ތިބެން ޖެހޭނެ ކަމަށެވެ. ޕާކިސްތާންގެ ގަނޑުފެންތައް ބާރު ސްޕީޑެއްގައި ގިރަމުންދެއެވެ. އޭގެ ސަބަބުން ޕާކިސްތާންގެ އިންފްރާސްޓްރަކްޗާއަށްވެސް ބޮޑެތި ގެއްލުންތަކެއް ލިބިފައިވެއެވެ.
