ހައްޔަރުކޮށްފައިވާ ޕާކިސްތާނުގެ ނޫސްވެރިޔާ އިމްރާން ރިޔާޒް ޚާން ބުނާ ގޮތުން އޭނާގެ ފުރާނަ ވަނީ ނުރައްކަލަށް ހުށަހެޅިފައެވެ.
ފުލުހުން އިސްލާމްއާބާދު ކައިރިން އޭނާ ހައްޔަރު ކުރި އޭނާ ވަނީ މި ކަމާ ގުޅޭ ވީޑިއޯއެއް މީސްމީޑއާއަށް ލައިފައެވެ. ޕާކިސްތާނުގެ ޑޯން ނޫހުން ރިޕޯޓްކޮށްފައިވާ ގޮތުގައި ޚާން އިސްލާމްއާބާދަށް ދިޔައީ އޭނާއާ ދެކޮޅަށް ހުށަހަޅާފައިވާ މައްސަލައަކާ ގުޅިގެންނެވެ. އޭނާއާ ދެކޮޅަށް ސަރުކާރުން ހުށަހަޅާފައިވާ މައްސަލައަކީ ގައުމަށް ޚިޔާނާތްތެރި ވުމުގެ މައްސަލައެކެވެ.
ޕާކިސްތާންގެ ޕަންޖާބު ޕްރޮވިންސްގެ އެކި ހިސާބުތަކުގައި 17 މައްސަލައެއް އޭނާއާ ދެކޮޅަށް ފުލުހަށް ހުށަހަޅާފައިވާ ކަމަށްވެއެވެ.
ޚާން ވަނީ ޕާކިސްތާންގައި މިހާރު ވެރިކަން ކުރާ ފަރާތްތަކަކީ ޚުދު މުޚުތާރު ވެރިން ކަމަށް ސިކފަ ކޮށްފައެވެ. ޓުއިޓާގައިވެސް އޭނާ ވަނީ މިފަދައިން ޝާހްބާޒް ޝަރީފްގެ ސަރުކާރާ ދެކޮޅަށް ކެމްޕޭނެއް ހިންގާފައެވެ.
އޭނާ ބުނާ ގޮތުން ޚިޔާލު ފާޅު ކުރުމުގެ މިނިވަންކަމުގެ ސަބަބުން އޭނާއާ ދެކޮޅަށް ސަރުކާރުން ވަނީ އެތައް މައްސަލައެއް ޖައްސާފައެވެ.
ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ވަނީ ކުއްލި ގޮތަކަށް އިމްރާން ރިޔާޒް ޚާން ހައްޔަރުކުރި މައްސަލަ ކުށްވެރިކުރައްވާފައެވެ.
އަދި އިމްރާން ޚާން ވިދާޅުވީ ޕާކިސްތާން ދަނީ މަޑުމަޑުން ޚުދު މުޚުތާރު ވެރިކަމަށް ވެއްޓެމުން ކަމަށެވެ.
