އާލަމީ ވަބާ ކޮވިޑް19ގެ ސަބަބުން ނޭޕާލްގެ ފަތުރުވެރިކަމަށް ނޭދެވޭ އަސަރުތަކެއް ކޮށްފައިވީ ނަމަވެސް ނޭޕާލްގެ ހޮޓެލް އަދި ޓޫރިޒަމް ދާއިރާއަށް ޗައިނާގެ އިންވެސްޓަރުން ސަމާލުކަން ދީފައިވާ ކަމަށް ދައްކައެވެ. ނޭޕާލްގެ ނޫސްތަކުގައި ބުނާ ގޮތުން ޗައިނާގެ ވިޔަފާރިވެރިން ވަނީ ކަޓްމަންޑޫ، ލަލިތުޕޫރު، ބަކްތާޕޫރު، ކަސްކީ އަދި ޗިތުވާންގެ ޓޫރިސްޓް ހަބްތަކުގައި 400 އަށް ވުރެ ގިނަ ހޮޓާ އަދި ރެސްޓޯރެންޓްތަކުގައި އިންވެސްޓްކޮށްފަ އެވެ.
ޓުއަރިޒަމް މެއިލް އިން ބުނާ ގޮތުން ޕޮކާރާގައި އެކަނިވެސް ޗައިނާގެ ވިޔަފާރިވެރިން ވަނީ 50 އަށްވުރެ ގިނަ ރެސްޓޯރަންޓާއި އެހެނިހެން ވިޔަފާރިތަކުގައި އިންވެސްޓް ކޮށްފައެވެ.
މި ކަމާ ގުޅިގެން ހޮޓެލް އެސޯސިއޭޝަން އޮފް ނޭޕާލް (ހާން)ގެ އޮފިޝަލުން ވަނީ ޝަކުވާ ކޮށްފައެވެ. އެ ޖަމުއިއްޔާއިން ބުނާ ގޮތުގައި ސަރުކާރަށް ޓެކްސް ނުދައްކައި ޗައިނާ ވިޔަފާރި ވެރިން ވަނީ ނޭޕާލްގެ ފަތުރުވެރިކަމުގެ ދާއިރާގައި އަތްގަދަ ކޮށްފައެވެ.
ޗައިނާގެ ވިޔަފާރިވެރިން ހިންގާ ތަންތާނގައި ބޭނުން ކުރަމުން ދަނީ ކޮޓަރިތައް ބުކްކުރުމަށާއި ޕޭމެންޓް ހެދުމަށް އެމީހުންގެ އަމިއްލަ އޮންލައިން ސިސްޓަމެކެވެ. މި ސިސްޓަމް މެދުވެރިކޮށް ފައިސާ ދެއްކުމުގެ ސަބަބުން، ނޭޕާލްގައި ޗައިނާގެ ވިޔަފާރި މުއާމަލާތްތަކަށް ޓެކްސް ފައިސާ އެގައުމަކަށް ނުވަދެއެވެ.
އަދި ގިނަ ފަހަރަށް މި މުއާމަލާތްތައް ޗައިނާގެ ވީޗެޓް މެދުވެރިކޮށާއި އަލީ ޕޭ މެދުވެރިކޮށްވެސް ކުރެއެވެ. އެއިން މުއާމަލާތެއްގެ ފައިސާއެއް ނޭޕާލްގެ މާލީ ނިޒާމަކަށް ނުވަދެއެވެ.
ނޭޕާލްގެ ޓޫރިޒަމް ގާނޫނުގައިވާ ގޮތުން ހޮޓާތަކާއި ލޮޖް އަދި ގެސްޓް ހައުސްތަކުގައި ބޭރުގެ ޓޫރިސްޓުން ބޭތިއްބުމަށާއި ބޭރު ފައިސާއިން ވިޔަފާރި ކުރުމަށް ޑިޕާޓްމެންޓް އޮފް ޓޫރިޒަމްގެ ހުއްދަ ހޯދަން ޖެހެއެވެ.
