ސްރީލަންކާ އިގްތިސާދީ އަނދަވަޅަކަށް ވެއްޓުމުން އެގައުމަށް އެންމެ ފުރަތަމައަށް އަދި އެންމެ ގިނައިން އެހީ ދިން ގައުމަކަށް އިންޑިއާ ވެއްޖެއެވެ. ސްރީލަންކާއަށް 2022 ވަނަ އަހަރުގެ އޭޕްރީލް މަހާ ހަމައަށް އިންޑިއާއިން 376.9 މިލިއަން އެމެރިކާ ޑޮލަރު ދީފައި ވެއެވެ. އޭގެ ތެރޭގައި ތެޔޮ އެތެރެ ކުރުމަށް މިދިޔަ އަހަރު 13 މިލިއަން އެމެރިކާ ޑޮލަރަށްވުރެ ގިނަ ފައިސާ ދީފައިވާކަމަށްވެސް ދައްކައެވެ.
މި އަހަރުގެ އޭޕްރީލް މަހާ ހަމައަށް ސްރީލަންކާއިން 1550.4 މިލިއަން އެމެރިކާ ޑޮލަރުގެ އާ ލޯނުތަކުގައި ސޮއިކޮށްފައިވާ އިރު، އިންޑިއާއިން 1.5 ބިލިއަން އެމެރިކާ ޑޮލަރު މިހާތަނަށް ލިބިފައިވާ ކަމަށް ފިނޭންސް މިނިސްޓްރީގެ ރިޕޯޓެއްގައި ބުނެފައި ވެއެވެ.
ސްރީލަންކާއަށް ދިމާވި އެންމެ ބޮޑު ގޮންޖެހުން ދިމާވެފައި ވަނީ ބޭރުފައިސާގެ ތަދުމަޑުކަމެއް ލައިގަތުމުންނެވެ.
އޭޝިއަން ޑިވެލޮޕްމަންޓް ބޭންކުން 2022 ވަނަ އަހަރުގެ އޭޕްރީލް މަހާ ހަމައަށް ސްރީލަންކާއަށް 359.6 މިލިއަން އެމެރިކާ ޑޮލަރު ދޫކޮށްފައިވެއެވެ. އެބެންކުން މިދިޔަ އަހަރު ވަނީ 113.6 މިލިއަން އެމެރިކާ ޑޮލަރު ލަންކާއަށް ދޫކޮށްފައެވެ.
މި ކާރިސާގެ ތެރޭގައި ޗައިނާއިން ސްރީލަންކާއަށް ދީފައި ވަނީ 67.9 މިލިއަން އެމެރިކާ ޑޮލަރެވެ. މިއީ މީގެ އަހަރެއްހާ ދުވަސް ކުރިން ޗައިނާއިން ދޫކުރި 514.9 މިލިއަން އެމެރިކާ ޑޮލަރަށްވުރެ މާ ބޮޑަށްވެސް ދަށް އަދަދެކެވެ. ޗައިނާއިން ބޭނުންވީ ބައިނަލްއަގްވާމީ ފަރާތްތަކާ ނުބައްސައި ޗައިނާގެ މިނިވަން ވިޔަފާރީގެ އެއްބަސްވުމުގައި ސޮއިކޮށް ޗައިނާއިން އިތުރު ލޯނުތައް ކޮޅުނބުން ނަގާށެވެ. ނަމަވެސް ސްރީލަންކާއިން ވަނީ އެކަމާ ދެކޮޅު ހަދާފައެވެ.
ސްރީލަންކާގައި ޗައިނާއިން ހިންގާ ގިނަ މަޝްރޫއުތަކެއް މިހާރު ދަނީ ހީނަރުވަމުންނެވެ. ސްރީލަންކާއިން ޗައިނާއަށް 8.05 ބިލިއަން އެމެރިކާ ޑޮލަރުގެ ލޯނު ނުދައްކާ އޮތް އިރު، މިއީ ކުރިއަށް އޮތް 3 އަހަރާއި 5 އަހަރުގެ ތެރޭގައި ހިންގަން އުޅޭ މަޝްރޫއުތަކާ ގުޅުން ހުރި މަޝްރޫއުތަކެކެވެ.
ސްރީލަންކާއަށް ދެންވެސް ބޮޑު އަދަދަކަށް ފައިސާ ދޫކުރާނީ އިންޑިއާއާއި އޭޝިއަން ޑިވެލޮޕްމަންޓް ބޭންކް، ވޯލްޑް ބޭންކް، ޗައިނާ އަދި ޖަޕާނުންނެވެ.
ލަންކާއިން ބޭރުގެ ދަރަނި ޑިފޯލްޓްވީ މިއަހަރުގެ އޭޕްރީލް މަހުއެވެ.
