ޖަޕާނުގެ ރަސްމީ ޓީވީން މިއަދު ރިޕޯޓް ކުރި ގޮތުގައި، ކުރީގެ ބޮޑުވަޒީރު ޝިންޒޯ އާބޭ އަވަހާރަވީ، ހުޅަނގުގެ ސިޓީއެއް ކަމަށްވާ ނާރާގައި ލިބަރަލް ޑިމޮކްރެޓިކް ޕާޓީ (އެލްޑީޕީ)ގެ ކެންޑިޑޭޓަކަށް ތާއީދު ހޯއްދެވުމަށް ކެމްޕޭން ޖަލްސާއެއްގައި ތަގުރީރު ކުރައްވަމުން ގެންދަވަނިކޮށް ބަޑިން ހަމަލައެއް ދީގެންނެވެ. އާބޭ އަވަހާރަވިއިރު އުމުރުފުޅަކީ 87 އަހަރެވެ.
ހަސްފަތާލުން ބުނިގޮތުގައި އާބޭ އަވަހާރަވީ ލޭމަނާ ނުވެގެންނެވެ.
ޖަޕާނު ޓީވީން ބުނިގޮތުގައި ރޭލް ސްޓޭޝަނެއްގެ ބޭރުގައި ތަގްރީރު ކުރައްވަނިކޮށް، ބަޑީގެ ހަމަލާއެއް އަމާޒު ކުރީއެވެ.
މި ހަމަލަ ދިން މީހާ ބަޑި ޖަހާފައިވަނީ ފުރަގަހުންނެވެ. އަދި އެމީހާ ވަނީ ވަގުތުން ހައްޔަރުކުރެވިފައި ކަމަށްވެސް ރިޕޯޓްތައް ބުނެއެވެ.
ތުހުމަތު ކުރެވޭ ގޮތުގައި ހަމަލަ ދިން މީހާއަކީ ޖަޕާނުގެ ސިފައިންގެ ކުރީގެ މެމްބަރެކެވެ. އަދި އޭނާ ބޭނުންކޮށްފައިވަނީ ހޯމްމޭޑް ރައިފަލް އެއް ކަން ވެސް ޖަޕާނުގެ ޓީވީން ބުންޏެވެ.
ޖަޕާނުގައި ބަޑި ގެންގުޅުމަށް ލަންސަންސް ހޯދުމަށް ދިގު އަދި އުދަގޫ އިޖުރާއަތްތައް ފުރިހަމަ ކުރަން ޖެހެއެވެ.
އަދި ބަޑިއެއް ގަންނަން ބޭނުންވާ މީހާއަށް އެންމެ ފުރަތަމަ ޝޫޓިން އެސޯސިއޭޝަނުން ރެކޮމެންޑޭޝަނެއް ހޯދަން ޖެހެއެވެ. އަދި އެއަށްފަހު ފުލުހުންގެ ހަރުކަށި ފާރަލުމެއްގައި އުޅެންވެސް ޖެހެއެވެ.
އާބޭ އެންމެ ފުރަތަމަ ބޮޑުވަޒީރުކަމަށް ވަޑައިގެންނެވީ 2006 ވަނަ އަހަރު އެވެ. އޭނާއަކީ ދެވަނަ ބޮޑު ހަނގުރާމައަށްފަހު އެގައުމުގައި ވެރިކަމަށް ވަޑައިގެންނެވި އެންމެ ޒުވާން ބޭފުޅާއެވެ.
