އިންޑިއާގެ ނޭޝަނަލް ސެކިއުރިޓީ ކައުންސިލް ސެކްރެޓޭރިއެޓުން އިންޑިއާ، ދިވެހިރާއްޖެ، މޮރިޝަސް އަދި ސްރީލަންކާ ހިމެނޭ ގޮތަށް ބެއްވި ކޮލަމްބޯ ސެކިއުރިޓީ ކޮންކްލޭވްގެ ބައްދަލުވުން އިއްޔެ ކޮޗީގައި ބާއްވައިފިއެވެ. މިއީ ނޭޝަނަލް ސެކިއުރިޓީ އެޑްވައިޒަރ ލެވެލްގެ 6 ވަނަ ބައްދަލުވުމެވެ.
މި ބައްދަލުވުމުގައި ރާއްޖެ ތަމްސީލު ކުރެއްވީ ފޮރިން ސެކްރެޓެޓީ އަޙުމަދު ލަތީފެވެ.
މި ބައްދަލުވުމުގައި މެމްބަރު ޤައުމުތަކުން ވަނީ ޤައުމުތަކުގެ މެދުގައި އެއްބާރުލުން ދިނުމުގެ މަގުޗާޓު 2022 އިން 2023 އަށް ތަންފީޒު ކުރުމާއި ގުޅޭ ގޮތުންނާއި މިއަހަރުގެ މާރިޗު މަހުގެ 9 އިން 10އަށް ރާއްޖޭގައި ބޭއްވި ނޭޝަނަލް ސެކިއުރިޓީ އެޑްވައިޒަރުންގެ 5 ވަނަ ބައްދަލުވުމުގައި ނިންމި ނިންމުތަކާ ގުޅޭގޮތުން މަޝްވަރާ ކޮށްފައެވެ.
މީގެ ތެރޭގައި ކަނޑުމަތީގެ ސަލާމަތާއި ރައްކާތެރިކަމާއި، ހަރުކަށި ފިކުރާއި، ޓެރަރިޒަމާއި ދެކޮޅަށް މަސައްކަތް ކުރުމާއި، ރާވައިގެން ހިންގާ ކުށްތަކާއި، ވަގުވިޔަފާރި ހުއްޓުވުމާއި، ސައިބަރ ސެކިއުރިޓީ އާއި ޓެކްނޮލޮޖީގެ ނާޒުކު ވަސީލަތްތައް ޙިމާޔަތްކުރުން އަދި އިންސާނީ އެހީ ފޯރުކޮށްދިނުމާއި ކާރިސާތަކުން ލިބޭ ގެއްލުންތަކުން އަރައިގަތުމުގައި އެހީވުން ހިމެނެއެވެ.
