އެމެރިކާ އާއި ޗައިނާއާ ދެމެދު އޮންނަ ވާދަވެރިކަން ދުވަހެއް ދުވަހަކަށް ދަނީ ބޮޑުވެ ފުޅާވަމުންނެވެ. އެކަން ހާމަވެގެންދަނީ 29 ޖޫންގައި މެޑްރިޑްގައި ބޭއްވި ނޭޓޯގެ ސަމިޓްގައި ފާސްކުރި ނޭޓޯގެ 2022 ވަނަ އަހަރުގެ ސްޓްރެޓީޖިކް ކޮންސެޕްޓްގެ ގަރާރުންނެވެ. ބައެއް ރިޕޯޓްތައް ބުނާގޮތުން ޖަރުމަނުވިލާތާއި ފަރަންސޭސިވިލާތާއި އީޔޫއާ އަޅާބަލާއިރު ޗައިނާއާމެދު އެމެރިކާއާއި އިނގިރޭސިވިލާތުން ދެކޭގޮތް މާ ހަރުކަށްޓެވެ.
އެހެންވެ، ނޭޓޯގެ ސްޓްރެޓީޖިކް ކޮންސެޕްޓް ވަނީ 2010 ވަނަ އަހަރު ލޯންޗުކުރި ކުރީގެ ޑޮކިއުމެންޓަށް ވުރެން ބޮޑަށް ތަފާތު ވެފައި ހަރުކަށި ވެފައެވެ.
ނޭޓޯއިން 2022 ވަނަ އަހަރު ނެރުނު ސްޓްރެޓީޖިކް ކޮންސެޕްޓްގައި ފާހަގަކޮށްފައިވާ ގޮތުގައި ނިޒާމީ ގޮތުން އެމެރިކާއާއި ހުޅަނގަށް ގޮންޖެހުމެއްގެ ގޮތުގައި ޗައިނާއިން ދަނީ އެގައުމުގެ ބާރު ދެއްކުމަށް ސަރަހައްދީ އަދި ދުނިޔޭގެ ފެންވަރުގައި މިހާރަށްވުރެ ބޮޑަށް ހަރަކާތްތެރިވުމަށް ސިޔާސީ އަސްކަރީ އަދި އިގްތޮސާދީ އަދި ޑިޕްލޮމެޓިމް ވަސީލަތްތަކުގެ ބޭނުން ހިފަމުންނެވެ.
ނޭޓޯއިން ފާހަގަ ކުރާ ގޮތުގައި ދެކުނު ޗައިނާ ކަނޑުގައި ޖަޒީރާ ރަށްތައް ހިއްކުމާއި އަސްކަރީ ހަރަކާތްތަކުގެ އިތުރުން، ދެކުނު ޗައިނާ ކަނޑުގެ މައްޗަށް ގަދަވެގަތުމަށް ޗައިނާއިން ދަނީ ކަނޑުގެ ސިފައިންގެ މިލިޓަރީގެ ބޭނުން ދުވަހެއް ދުވަހަކަށް އިތުރު ކޮށް ފުޅާ ކުރަމުންނެވެ.
ޗައިނާއިން ދަނީ އަސްކަރީ ހަނގުރާމަތަކުގައި އާޓިފިޝަލް އިންޓެލިޖެންސާއި އަސްކަރީ ޖާސޫސީ މައުލޫމާތުގެ ބޭނުން ހިފައިގެން، ދެކުނު ޗައިނާ ކަނޑުގެ ސަރަހައްދުގެ ޙާއްސަ ތަންތަނަށް ޗައިނާގެ ޒާތީ ސިޔާދަތު އޮތްކަން ހާމަ ކުރަމުންނެވެ. އިޤްތިޞާދީ ރޮނގުންނާއި، ވިޔަފާރިއާއި، އިންވެސްޓްމަންޓާއި، ސިޔާސީ ސަރަހައްދީ ސްޓްރެޓީޖިކް ބާރު ދެއްކުމަށް ޗައިނާއިން ގެންގުޅޭ މައިގަނޑު އަސާސަކީ، ޗައިނާގެ ބެލްޓް އެންޑް ރޯޑް އިނީޝިއޭޓިވްއެވެ.
ޝަންހާއީގެ ފުޑާން ޔުނިވާސިޓީގެ ގްރީން ފައިނޭންސް އެންޑް ޑިވެލޮޕްމަންޓް ސެންޓަރުން ބުނަނީ ޗައިނާގެ ބެލްޓް އެންޑް ރޯޑް އިނީޝިއޭޓިވް މަޝްރޫއުތަކާ ގުޅިގެން މަސައްކަތް ކުރުމަށް މިހާތަނަށް 147 ގައުމަކުން އެއްބަސްވެފައިވާ ކަމަށެވެ. މިއީ މަދު އަދަދެއްގެ ގައުމުތަކެއް ނޫނެވެ.
ޗައިނާގެ އިންވެސްޓްމަންޓްތަކާއި، ލޯނުތަކާއި، ހިލޭ އެހީގެ ޒަރިއްޔާއިން ޗައިނާއިން ވަނީ އެތައް ކޮންޓިނެންޓެއްގައި އެކި ގައުމުތަކާއެކު ވަރުގަދަ ގުޅުންތަކެއް ބިނާކޮށްފައެވެ.
