އިންޑިއާގެ ސިފައިންގެ ތެރޭގައި ޗައިނާ ބަސް މެންޑަރިން ބަސް ދަންނަ މީހުން އިތުރު ކުރުމަށް ސިފައިންނަށް ހުއްދަ ލިބިއްޖެއެވެ. އެއާއެކު ސިފައިން ވަނީ ޗައިނާ ބަސް ދަސްކޮށްދިނުމުގެ މަސައްކަތް ވަރަށް ބާރަށް ކުރިއަށް ގެންދަން ފަށާފައެވެ.އިންޑިއާ ސިފައިންގެ ތެރޭގައި މެންޑެރިން ދަންނަ އެ ބަހުގެ ތަޖުރިބާކާރުން ހޯދުމަށް ގިނަ ފިޔަވަޅުތަކެއް އަޅާފައި ވެއެވެ. އޭގެ ބޭނުމަކީ ޖޫނިއާ އަދި ސީނިއާ މިލިޓަރީ ކޮމާންޑަރުންނަށް ޗައިނާ ސިފައިންގެ މީހުންނާ މުއާމަލާތް ކުރަން އެނގުމެވެ. އަދި ހާލަތު ނިޔާކުރާ ގޮތުން ޗައިނާ ސިފައިންނާ މުއާމަލާތް ކުރުމުގެ ބާރު ކޮމާންޑަރުންނަށް ދިނުމެވެ.
މެންޑަރިންގެ ހުނަރު ރަނގަޅުވެގެން، އިންޑިއާ ސިފައިންނަށް އެމީހުން ބޭނުންވާ ފެންވަރުގައި ޗައިނާ ސިފައިންނާ މުއާމަލާތު ކުރެވޭނެއެވެ.
މިހާރުވެސް އިންޑިއާ ސިފައިންގެ ތެރޭގައި ފަންނީ ފެންވަރެއްގައި ޗައިނާ ބަސްދަންނަ އަދި އެބަހުން ތަހުލީލު ހަދާ ލެވޭ ފެންވަރުގެ މީހުން ތިބޭކަމަށް ސިފައިން ބުނެއެވެ. އިންޑިއާގެ މަގްސަދަކީ، އެކަށީގެންވާ ފެންވަރެއްގައި ހުރިހައި ފަންތިއެއްގައިވެސް ތަހުލީލު ކުރެވޭ ވަރުގެ ޗައިނާ ބަހުގެ ތަޖުރިބާކާރުން ސިފައިންގެ ތެރޭގައި ތިބުމެވެ.
ކޯޕްސް ކޮމާންޑަރ ލެވެލްގެ މަޝްވަރާތަކާއި، ފްލޭގް މީޓިންގތަކާއި ޖޮއިންޓް އެކްސަސައިޒްތަކާއި، ބޯޑަރ ޕާރސަނަލް މީޓިންގތަކާއި، އެނޫންވެސް ތަފާތު މުޢާމަލާތްތަކުގައި، ޗައިނާއާއެކު މުއާމަލާތު ކުރުމަށް އެކަށީގެންވާ އަދަދަކަށް ޗައިނާ ބަސް ދަންނަ މީހުން ބޭނުންވާކަމަށް ސިފައިން ބުނެފައި ވެއެވެ.
އިންޑިއާގެ ސިފައިން ވަނީ މެންޑެރިން ބަހުގެ ތަމްރީނުތައް ސިފައިންނަށް ހެއްދުމަށް ނޭޝަނަލް ރަކްޝާ ޔުނިވާސިޓީއާއި ސެންޓްރަލް ޔުނިވާސިޓީ އޮފް ގުޖުރާތާއި ޝިވް ނާދަރް ޔުނިވާސިޓީއާ އެކު އެމްއޯޔޫއެއް ހަދާފައެވެ. އޭގެ އިތުރުން އާރމީ ޓްރެއިނިންގ ސްކޫލާއި ދިއްލީގެ ސްކޫލް އޮފް ފޮރިން ލޭންގުއޭޖްސްގައިވެސް މި ތަމްރީންތައް ހަދާނެއެވެ.
