ސްރީލަންކާއަށް ކުރިމަތިވެފައިވާ ސިޔާސީ ބޮޑު ކާރިސާއެއްގެ ތެރޭގައި، އިންޑިއާއާއި ސްރީލަންކާއާ ދެމދުގެ ސަރަހައްދު އިންޑިއާގެ ކޯސްޓްގާޑުން ބަލަހައްޓަން ފަށައިފިއެވެ. އިންޑިއާ ކޯސްޓްގާޑުން ފާރަވެރިވަނީ، ދެ ފަރާތުގެ ކަނޑުގެ ބޯޑަރުގައި ރެފިއުޖީން ނުވަތަ އިންޑިއާއާ ދެކޮޅު ހަރަކާތްތެރިވާ ފައުޖުތައް އެތެރެވުން ހުއްޓުވުމަށްޓަކައެވެ. އިނޑިއާއިން ވަނީ ހޯވަރކްރާފްޓްތަކާއި، މަތިންދާ ބޯޓްތަކާއި، ޕެޓްރޯލް ބޯޓްތައް މި ސަރަހައްދުގައި ބާއްވާފައެވެ.
ޓެމިލްނާޑޫގެ އައްސޭރިފަށުން ފެށިގެން ކެރެލާގެ އައްސޭރިފަށުގެ ސަރަހައްދުތަކުގައި ކޯސްޓްގާޑުން ސާވޭލަންސް އިތުރުކޮށްފައިވާ ކަން ވަނީ ކަށަވަރު ކޮށްދީފައެވެ.
ސްރީލަންކާގެ ރިޔާސީ ގަނޑުވަރަށް އާންމުން ވެރިވެ ގަނެ، ވެރިރަށް ކޮލަމްބޯއިން ލީޑަރުން ފިއްލަވާފައިވާ ކަމަށް ރިޕޯޓްތައް ބުނެއެވެ.
އިންޑިއާގެ ސެންޓްރަލް އޭޖެންސީތަކުގެ އިތުރުން، ޓެމިލް ނާޑޫ ކޯސްޓަލް ފުލުހުންވެސް މިހާރު އޮތީ ހައި އެލާޓްގައެވެ. މަސްއޫލުވެރިން ވިދާޅު ވަނީ ސްރީލަންކާއަށް ކުރިމަތިވި އިގުތިސާދީ ހީނަރުކަމާއި ސިޔާސީ ކޯޅުންތަކުގެ ސަބަބުން ސަރަހައްދު ހުރަސްކުރަން މަސައްކަތް ކުރާ މީޙުންތަކެއް އުޅޭ ކަމަށެވެ. ނަމަވެސް އެ އަދަދުތަކަކީ މާ ބޮޑު އަދަދުތަކެއް ނޫން ކަމަށެވެ.މޫސުމް ގޯސް ވުމުގެ ސަބަބުން މިހާރުއެހިސާބު ވަރަށް ގަދަވެފައިވާ ކަމަށާއި، މިއީ އިންޑިއާގެ ކަނޑުގެ ސަރަހައްދަށް ވަނުމަށް ކަނޑުގެ މަގު ބޭނުން ކުރަން އުޅޭ މީހުންނަށް ހުރަސްއެޅޭނެ ކަމެއްކަމަށްވެސް އިންޑިއާގެ މަސްއޫލުވެރިން ދެކެއެވެ.
މިޔަންމާގެ މަންޑަލޭގައި ޙަރަކާތްތެރިވާ ހޯވަރކްރާފްޓް ޔުނިޓްތައް ވަނީ އިންޑިއާއާއި ސްރީލަންކާގެ ދެމެދުގެ ތިލަ ސަރަހައްދުގައި ހަރަކާތްތެރިވުމަށް ގެނަސްފައެވެ. މިއީ ބާރަށް ދުވާ އަދި މި ސަރަހައްދަށް އެކަށީގެންވާ އުޅަނދުތަކެކެވެ. ކޯސްޓްގޑުގެ ޑޯނިއަރ ސަރވެއިލެންސް މަތިންދާބޯޓުތައްވެސް ދަނީ އެ ސަރަހައްދުގައި ހަރަކާތްތެރި ވަމުންނެވެ.
