މިދިޔަ އޭޕްރީލް މަހުގެ ފަހުކޮޅު ޝެހްބާޒް ޝަރީފް ބޮޑުވަޒީރުކަމާ ހަވާލުވެވަޑައިގެންނެވި ފަހުން އަސްކަރިއްޔާއާ ގުޅުން ހުރި އިދާރާތަކުން ޕާކިސްތާނުގެ ނޫސްވެރިންނަށް ބިރު ދެއްކުމުގެ ނުވަ އަމަލެއް ހިންގާފައިވާ ކަމަށް ރިޕޯޓާސް ވިތައުޓް ބޯޑާސްއިން ބުނެއެވެ. އެ ޖަމާއަތުން ޕާކިސްތާން ސިފައިންގެ ހައި ކޮމާންޑްގައި އެދިފައި ވަނީ މީޑިއާއަށް އިތުރު ފުރައްސާރަކުރުންތަކާ ކުރިމަތިލިޔަ ނުދިނުމަށް މަސައްކަތް ކުރުމަށެވެ.
މިދިޔަ ދެ ބަސް ތެރޭގައި ފުރައްސާރަ ކުރުމާ ކުރިމަތިލާން ޖެހުނު ހުރިހައި ނޫސްވެރިންނަކީ ސިފައިންނަށް ފާޑު ކިޔާފައިވާ މީހުންނެވެ.
އެޖަމާއަތުން ބުނެފައިވާ ގޮތުގައި މި ކަމުގެ ސީދާ ޒިންމާ އުފުލަން ޖެހޭނެ ފަރާތަކީ ޖެނެރަލް ބާޖުވާ ކަމަށެވެ.
ޕާކިސްތާންގައި ނޫސްވެރިއަކާ ދެކޮޅަށް ހިންގާފައިވާ އެންމެ ފަހުގެ މައްސަލައަކީ އިސްލާމްއާބާދުގެ މެލޮޑީގައި ހުންނަ ޓީވީ ޗެނަލްގެ ސްޓޫޑިއޯގެ ބޭރުގައި، ނިއުސްގެ އެންކަރ ސާމީ އިބްރާހީމަށް ޖުލައި މަހުގެ 9 ވަނަ ދުވަހު ތިން މީހަކު އަނިޔާކޮށްފައިވާ މައްސަލައެވެ.
އޭގެ އަނެއް ދުވަހު އޭނާގެ ޔޫޓިއުބް ޗެނަލްގައި އާންމުކުރި ވީޑިއޯއެއްގައި އިބްރާހިމް ބުނީ، އެ މީހުން ތިބީ އޭނާ ނިކުންނަންދެން އިންތިޒާރުގައި ކަމަށެވެ. އަދި އަނިޔާކޮށްފައި އެމީހުން އަރައިގެން ދިޔައީ ފެހި ކުލައިގެ ލައިސަންސް ޕްލޭޓްތަކެއް ހަރުކޮށްފައި ހުރި ދައުލަތުގެ ނިޝާން ޖެހި ކާރެއްގައެވެ.
އެ ހާދިސާ ހިނގާފައި މިވަނީ ސިފައިންނަށް ފާޑު ކިޔައިގެން އޭނާއާ ދެކޮޅަށް ދައުވާ ފެށިތާ ހަ ހަފްތާ ފަހުންނެވެ. އޭނާއާ ދެކޮޅަށް ދައުވާ ކޮށްފައިވާ މާއްދާތަކަށް ބަލާއިރު ކުށްވެރި ވެއްޖެނަމަ އުމުރު ދުވަހުގެ ހުކުމެއް އަންނާނެއެވެ.
އެނާއަށް ތުހުމަތު ކުރެވޭ މައްސަލައަކީ ޕާކިސްތާނުގެ ދައުލަތުގެ ނިޒާމުގައި ހާއްސަކޮށް ސިޔާސީ މައިދާނުގައި ސިފައިންގެ ދައުރާ ބެހޭ ގޮތުން ސުއާލު ކުރުމެވެ.
މި މަރުހަލާތައް ފަށާފައިވަނީ އިސްލާމްއާބާދުގެ ހުޅަނގުން 70 ކިލޯމީޓަރު ދުރުގައި އޮންނަ ޕަންޖާބު ޕްރޮވިންސްގެ ސިޓީއެއް ކަމަށްވާ އަޓޮކްގައި ފުލުހުންނަށް ހުށަހެޅި ޝަކުވާތަކުގެ ނަތީޖާއެއްގެ ގޮތުންނެވެ.
މިހާދިސާގެ އިތުރުން އެކްސްޕްރެސް ނިއުސް ޓީވީގެ އެންކަރ އިމްރާން ރިޔާޒް ޚާން، ވަނީ 5 ޖުލައިގެ ހަވީރުގެ ވަގުތެއްގައި ޕަންޖާބުގެ ސްޕެޝަލް އެލީޓް ފޯސްގެ މެމްބަރުންނާއި ފުލުހުން ގުޅިގެން ހައްޔަރުކޮށްފައެވެ.
ޚާންއަކީ އިލެކްޓްރޯނިކް ކުށްތައް ހުއްޓުވުމުގެ ގާނޫނާއި، ގާނޫނުލް އުގޫބާތުގެ ގިނަ މާއްދާތަކެއް ގެ ދަށުން މެއި މަހުން ފެށިގެން ޕަންޖާބުގެ ޕްރޮސެކިއުޓަރުގެ އޮފީހުން އޭނާގެ މައްޗަށް މަދުވެގެން 17 ދައުވާއެއް އުފުލާފައިވާ ނޫސްވެރިއެކެވެ.
ޚާންއަކީ އިމްރާން ޚާނަށް ސަޕޯޓް ކުރާ ނޫސްވެރިއެކެވެ.
އަދި ޖޫން މަހުގެ 30 ވަނަ ދުވަހުގެ ރޭ ޕަންޖާބުގެ ވެރިރަށް ލާހޯރުގައި ޓީވީގެ އެހެން ނޫސްވެރިއެއް ކަމަށްވާ އަޔާޒް އާމިރު އަށް ހަމަލާދީ ޒަހަމްކޮށްފައި ވެއެވެ.
ޓީވީ ޗެނަލް ދުންޔާ ނިއުސްގައި ޕްރޮގްރާމެއް ރެކޯޑް ކޮށްފައި ދަނިކޮށް އޭނާ ކާރުން ދަމައިގަނެ، އޭނާއަށް ބަޔަކު އަނިޔާ ކުރީއެވެ.
ފާހަގަކޮށްލެވޭ ގޮތުގައި އާމިރު ވަނީ ދާދި ފަހުން ވެރިކަން ބަދަލުވި ގޮތާ ބެހޭ ގޮތުން ސެމިނާއެއްގައި ބައިވެރިވެގެން ސިފައިންނަށް ފާޑު ކިޔާފައެވެ.
އަދި ސިފައިންގެ ޖެނެރަލުންނަކީ "ޕްރޮޕަޓީ ޑީލަރުން" ގެ ގޮތުގައި ސިފަކޮށްފައެވެ.
ޕާކިސްތާން ސިފައިންނަށް ތަކުރާރުކޮށް ތުހުމަތު ކުރެވޭ ކަންކަމުގެ ތެރޭގައި، ނޫސްވެރިންނަށް ފުރައްސާރަކުރުމާއި، ޖިސްމާނީ ހަމަލާދިނުމާއި، ބަޑީގެ ހަމަލާތައް ދިނުމާއި، މީހުން ވަގަށް ނެގުމާއި، ބޭރު ގައުމުތަކުގައި ދިރިއުޅޭ ނޫސްވެރިންނަށް ބިރުދެއްކުމާއި، ބްރޯޑްކާސްޓް ސިގްނަލްތައް ބްލޮކްކުރުމާއި، ޓްރެޑިޝަނަލް މީޑިއާއާއި، ވީޑިއޯ ޕްލެޓްފޯމް އަދި ސޯޝަލް މީޑިއާ ފަދަ ވަސީލަތްތައް ސީދާ ސެންސަރުކުރުން ހިމެނެއެވެ.
އިމްރާން ޚާންގެ ސަރުކާރު ބަދަލުވުމުންވެސް ނޫސްވެރިންނަށް ފުރައްސާރަކުރުން ތަކަށް އެއްވެސް މަޑުޖެހުމެއް އައިސްފައެއް ނުވެއެވެ.
ޖިއޯ ނިއުސް ޓީވީގައި ގިނަ އަހަރުތަކެއް ވަންދެން މަސައްކަތް ކުރި މިނިވަން ކޮމެންޓޭޓަރެއް ކަމަށްވާ އަރްސަލަން ޚާން ވަގަށް ނަގާފައިވަނީވެސް މިދިޔަ ޖޫން މަހުގެ 24 ވަނަ ދުވަހު ކަރާޗީގައި އޭނާގެ ގެއިންނެވެ.
އޭނާ ވަގަށް ނެގީ ގާތްގަނޑަކަށް ދިހަވަރަކަށް މާސްކު އަޅައިގެން ތިބި ފިރިހެނުން ފަތިހު 4:00 ހާއިރު އޭނާގެ ގެއަށް ވަދެއެވެ. އަދި 24 ގަޑިއިރު ފަހުން، ޕެރަމިލިޓަރީ ރޭންޖާރސްއިން އޭނާ ދޫކޮށްލީ، "ޓެރަރިސްޓް ޖަމާއަތްތަކާ" ގުޅުން އޮންނަ ކަމަށް އޭނާ އިއުތިރާފް ވުމުންނެވެ.
އެހެން ނޫސްވެރިއެއް ކަމަށްވާ އާޖް ނިއުސް ޓީވީގެ ނޫސްވެރިޔާ ނައީމް ނާޒިމް ކަރާޗީގައި ދުވާލުގެ ވަގުތުތަކުގައި ވަގަށް ނަގާފައިވަނީ މިދިޔަ ޖޫން މަހުގެ 13 ވަނަ ދުވަހުއެވެ، އޭނާ ވަގަށް ނެގީ ލޮރިއެއްގައި އައި ކުލަ ހެދުމުގައި ތިބި ބަޔަކެވެ. އޭނާއާ އެތައް ގަޑިއިރެއް ވަންދެން ސުވާލުކުރުމަށް ފަހުން، ޖެހިގެން އައި ދުވަހު ފަތިހު 4:00 ހާއިރު އޭނާ ވެސް ވަނީ ދޫކޮށްލާފައެވެ.
ޕާކިސްތާނުގެ އަސްކަރީ ޖާސޫސީ އިދާރާއިން ނޫސްވެރިންނަށް ބިރުދެއްކުމުގެ ގޮތުން 24 ގަޑިއިރު ނޫސްވެރިން ވަގަށް ނެގުމުގެ މަސައްކަތަކީ ވަރަށް ގިނައިން ބޭނުންކުރާ އުކުޅެކެވެ.
މީގެ ކުރިން ވެސް ތަކުރާރުކޮށް އެ އުކުޅު ބޭނުން ކޮށްފައި ވެއެވެ. މިސާލަކަށް 2020 ވަނަ އަހަރުގެ ސެޕްޓެމްބަރު މަހު އެކްސްޕްރެސް ޓްރިބިއުނގެ އެޑިޓަރު ބިލާލް ފާރޫގުއީ އާއި 2020 ވަނަ އަހަރުގެ ޖުލައި މަހު ރިޕޯޓަރު މަތީޢުالله ޖާން އާއި ކުރީގެ ފްރީލާންސަރު ތާހާ ސިދްގީ ވަނީ އެގޮތަށް ހިފަހައްޓައިގެން ގެންގުޅެފައެވެ.
