ރަޝިޔާގެ މުދާ އީރާނުގެ ތެރޭން ލައިގެން އިންޑިއާއަށް ގެނައުމަށް ކުރާ މަސައްކަތުގައި ފުތރަތަމަ ޝިޕްމެންޓް އީރާނަށް އައިސްފިކަމަށް ތެހެރާނުން ބުނެފިއެވެ. ރޭލުގައި ރަޝިޔާގެ ފުރަތަމަ ކާގޯ ކޮންޓެއިނާތައް އީރާނަށް އެތެރެވެފައި ވަނީ ރޭލްގެ ޒަރީއާއިންނެވެ.
އީރާނަށް 39 ކޮންޓެއިނަރު ހިފައިގެން ރަޝިޔާގެ ޗެޚޯވް ސްޓޭޝަނުން ފުރައިގެން ރޭލު ފުރާފައި ވަނީ ޖުލައި މަހުގެ 6 ވަނަ ދުވަހުއެވެ. މި ރޭލް ވަނީ ކަޒަކިސްތާނާއި ތުރުކުމެނިސްތާނު ތެރޭން ލައިގެން ދަތުރުކޮށް 3800 ކިލޯމީޓަރު ކަޑައްތު ކޮށްފައެވެ.
ތެހެރާން ޓައިމްސް ނޫހުން ރިޕޯޓްކުރާ ގޮތުގައި ދެން މި ކާގޯ އަނެއްކާވެސް އީރާނުގެ ރޭލެއްގައި އީރާނުގެ ދެކުނުގެ ބަންދަރު އައްބާސް ބަނދަރަށް ގެންދެވޭނެއެވެ. އެއީވެސް 1600 ކިލޯމީޓަރުގެ ރޭލް ދަތުރެކެވެ.
ރަޝިއާގެ ރޭލް އީރާނަށް ވަން އިރު އީރާންގެ ނާއިބް ރައީސާއި ޓްރާންޕޯޓާ ޝިޕިންގ މިނިސްޓަރުންތައް މަރުޙަބާއަށް ސަރަހައްދަށް ވަޑައިގެްނ ތިއްބެވެ.
އީރާންގެ ނައިބު ރައީސް މުހަންމަދު މުޚްބަރް ވިދާޅުވީ އަވަށްޓެރި ގައުމުތަކަށް މުދާ ބަދަލުކޮށްދޭ އީރާނުން ޓްރާންސިޓް ގައުމެއްގެ ގޮތުގައި އީރާނުން ވިޔަފާރި ފުޅާ ކުރާނެ ކަމަށެވެ.
އީރާންގައި މިހާރުގެ ޓްރާންސިޓް މުދާ ބަލައިގަތުމުގެ ކެޕާސިޓީއަކީ 20 މިލިއަން ޓަނެވެ. ނަމަވެސް އަހަރެއްގެ މައްޗަށް 300 މިލިއަން ޓަނުގެ މުދާ ޓްރާންސިޓް ކުރުމުގެ ކެޕާސިޓީ އިތުރު ކުރުމަށް އީރާނުން މަސައްކަތް ކުރާނެ ކަމަށް މުޚްބަރު ވިދާޅުވި އެވެ.އީރާންގައި މުދާ ޓްރާންސިޓް ކުރަނީ ނޯތު-ސައުތު ކޮރިޑޯ މެދުވެރިކޮށެވެ. މިކޮރިޑޯއަކީ ތިން ރޫޓަކުން ގުޅާލާފައިވާ ކޮރިޑޯއެކެވެ.
އިންޓަރނޭޝަނަލް ނޯތު-ސައުތު ޓްރާންސްޕޯޓް ކޮރިޑޯ އުފެއްދީ އިންޑިއާއާއި އީރާނާއި ރަޝިޔާ ގުޅިގެންނެވެ.
ރޭލުގައި އިންޑިއާއަށް ރަޝިޔާއިން ބުދާ ގެންނަނީނަމަ، ފްރައިޓްގެ އަގު 30 ޕަސެންޓް ހެޔޮ ވެއެވެ. އަދި މުދާ އެތެރެ ކުރުމަށް އާދައިގެ މަތިން ނަގާ 40 ދުވަހުގެ މުއްދަތު 20 ދުވަހަށް ކުރު ކޮށްލެވެއެވެ.
ރަޝިޔާއިން ދަނީ މުއްދަތު އަދިވެސް މިއަށް ވުރެން ކުރުކޮށް އަދި ފްރައިޓް އަގުތައް ހެޔޮ ކުރުމަށް މަސައްކަތް ކުރަމުންނެވެ. އެގޮތުން ރަޝިޔާއިން އީރާނާއެކު ވާހަކަ ދައްކަމުން ދަނީ ރޭލުގެ ބަދަލުގައި ކެސްޕިއަން ކަނޑު މަރުން ރަޝިޔާއިން އީރާނަށް މުދާ އެތެރެ ކުރެވޭ ގޮތް ހެދުމަށެވެ.
އިންޓަރނޭޝަނަލް ނޯތު-ސައުތު ޓްރާންސްޕޯޓް ކޮރިޑޯއަކީ 7200 ކިލޯމީޓަރުގެ ދިގު މަގެކެވެ. މި މަގުގައި ފްރައިޓް އުފުލަނީ އެއްގަމު މަގުންނާއި އާގު ބޯޓުތަކާއި، ރޭލްވޭތަކުގައެވެ. މި މަގަކީ އީރާނާއި އަޒަރުބައިޖާން މެދުވެރިކޮށް އިންޑިއާ އާއި ރަޝިއާ ގުޅުވައިދޭ މަގެކެވެ.
ތެހެރާން ޓައިމްސްނޫހުން ރިޕޯޓްކުރާ ގޮތުގައި އިސްލާމިކް ރިޕަބްލިކް އޮފް އީރާން ޝިޕިން ލައިންސްއިން ވަނީ ރަޝިއާ އާއި އިންޑިއާއާ ދެމެދު މުދާ އުފުލުމަށް 300 ކޮންޓެއިނަރު ހަމަޖައްސާފައެވެ. އިންޓަރނޭޝަނަލް ނޯތު-ސައުތު ޓްރާންސްޕޯޓް ކޮރިޑޯގެ އެއްބަސްވުމުގައި ތިން ގައުމުން ސޮއިކޮށްފައިވަނީ 2002 ވަނަ އަހަރުއެވެ.އިންޓަރނޭޝަނަލް ނޯތު-ސައުތު ޓްރާންސްޕޯޓް ކޮރިޑޯގެ މަޝްރޫޢުގައި 13 މެމްބަރު ޤައުމު އޮވެއެވެ. އެއީ އިންޑިއާ، އީރާން، ރަޝިޔާ، އަޒަރުބައިޖާން، އަރުމީނިއާ، ކަޒަކިސްތާން، ބެލަރޫސް، ތަޖިކިސްތާން، ކިރްގިސްތާން، އޮމާން، ތުރުކީ، ސޫރިޔާ އަދި ޔޫކްރެއިންއެވެ.ބަލްގޭރިއާއަކީ އޮބްޒަރވަރ ސްޓޭޓެވެ. ލެޓްވިއާ އާއި އެސްޓޯނިއާ ފަދަ ބޯލްޓިކް ގައުމުތަކުން ވެސް ވަނީ އިންޓަރނޭޝަނަލް ނޯތު-ސައުތު ޓްރާންސްޕޯޓް ކޮރިޑޯގައި ބައިވެރިވުމަށް ތައްޔާރަށް އޮތްކަން ހާމަކޮށްފައެވެ.އަފްޣާނިސްތާނާއި އުޒްބެކިސްތާން ފަދަ ގައުމުތަކަށް މި ކޮރިޑޯގެ މެންބަރުކަން ފުޅާކުރުމަށް އިންޑިއާއިން ވަނީ އަންގާފައެވެ.
މި ކޮރިޑޯގައި އީރާންގައި އިންޑިއާއިން އޮޕަރޭޓް ކުރާ ޗާބާރު ޕޯޓްވެސް ހިމަނަން އިންޑިއާއިން ބޭނުންވެއެވެ.އިންޓަރނޭޝަނަލް ނޯތު-ސައުތު ޓްރާންސްޕޯޓް ކޮރިޑޯ މެދުވެރިކޮށް މުދާ ބަދަލު ކުރާ ދާއިރާގެ ތެރޭގައި، މޭވާ އާއި ތަރުކާރީއާއި، އޭޓީއެމްއާއި، އިންޑަސްޓްރިއަލް ޕްރިންޓަރ، ތްރީޑީ ޕްރިންޓަރ، ރޮބޮޓިކް އެސެމްބްލީ އެކްސެސަރީޒް، ފަދަ އަގުބޮޑު މުދާ ހިމެނެއެވެ.
