ސޮލޮމަން އައިލެންޑްސްގެ ބޮޑުވަޒީރު ވިދާޅު ވަނީ ބެއިޖިންއާއެކު ހަދާ ސަލާމަތީ އެއްބަސްވުމެއްގެ ސަބަބުން ސަރަހައްދީ ސަލާމަތަށް ބުރޫއަރާނެ ކަމަށާއި، ސޮލޮމޮން އައިލެންޑްސްއަކީ އަސްކަރީ ހަމަލާއެއްގެ އަމާޒަކަށް ހަދައި، ގައުމާއި ރައްޔިތުން ނުރައްކަލަށް ހުށަހެޅުމެއް ނެތް ކަމަށް ވިދާޅުވެ، ޗައިނާގެ އަސްކަރީ މަރުކަޒެއް ދުވަހަކުވެސް އެގައުމުގައި ނުހަދާނެ ކަމުގެ ޔަގީންކަން ދެއްވާފައެވެ.
އަދި އޮސްޓްރޭލިއާ އަކީ ސޮލޮމަން އައިލެންޑްސްގެ "ސެކިއުރިޓީ ޕާޓްނަރު އޮފް ޗޮއިސް" ގެ ގޮތުގައި އަދިވެސް ބަލާ ގައުމެއް ކަމަށެވެ.
މިއަހަރުގެ ކުރީކޮޅު ޗައިނާއާއެކު ސެކިއުރިޓީ ޑީލްގައި ސޮއިކުރި ފަހުން ސިބީސީއަށް ދެއްވި ފުރަތަމަ އިންޓަވިއުގައި ވާހަކަ ދައްކަވަމުން މަނަސެހް ސޮގަވަރޭ ވިދާޅުވީ، މިއީ އިތުބާރު" ކުރަންވީ ވަގުތު ކަމަށެވެ.
"އަޅުގަނޑު ތިޔަ ހުރިހާ ބޭފުޅުންނަށް އަނެއްކާވެސް ޔަޤީންކޮށް އަރުވަން، މި އެއްބަސްވުމުގައި އަސްކަރީ މަރުކަޒެއްވެސް، އަދި މުއައްސަސާއެއްވެސް ނެތް. އަދި އެއީ މި ސަރަހައްދުގެ ގައުމުތަކަށް ތަކުރާރުކޮށް އަޅުގަނޑު އިއްވަން ބޭނުންވާ ވާހަކައެއް ކަމަށް ބުނަން" އޭނާ ވިދާޅުވި އެވެ.
ޗައިނާއާއެކު ވެފައިވާ އެއްބަސްވުމުގެ ޚަބަރުތައް ހުޅަނގުގެ ޤައުމުތަކުގެ މެދުގައި، ބަލާފައިވަނީ ނުތަނަވަސް ކަމެއްގެ ގޮތުގައެވެ. އަދި ޗައިނާގެ މަނަވަރުތަކަށް ސޮލަމަންއަށް ޒިޔާރަތްކޮށް ބަނދަރުކުރުމަށް ހުއްދަ ދޭނެ ކަމަށް ބުނެ ވަރަށް ބޮޑަށް ކަންބޮޑުވުން ފާޅުކޮށްފައި ވެއެވެ.
"އަޅުގަނޑު ކުރިން ވެސް ދެންނެވިން އަދި އަޅުގަނޑު އަނެއްކާވެސް ދަންނަވާނަން، ޕެސިފިކްގެ އެއްވެސް ޖަޒީރާ ގައުމެއްގައި އަސްކަރީ މަރުކަޒެއް ގާއިމް ކުރުން އަދި ސޮލޮމަންގައިވެސް އަސްކަރީ މަރުކަޒެއް ގާއިމް ކުރުމަކީ އެއީ އެއްވެސް މީހެއްގެ މަސްލަހަތު އޮތް ކަމެއް ނޫން، އަދި މި ސަރަހައްދުގެ މަސްލަހަތުގަ ވެސް އޮތް ކަމެއް ނޫން" ސޮގަވަރޭ ވިދާޅުވި އެވެ.
"އަޅުގަނޑުމެން ބޭރުގެ ޢަސްކަރީ މަރުކަޒެއް މި ގައމުގައި ޤާއިމުކުރާ ވަގުތުން އަޅުގަނޑުމެން ދުޝްމަނަކަށް ވެގެންދާނެ. އަދި އަސްކަރީ ޙަމަލާތައް އަމާޒުވެދާނެ ފަދަ ޙަމަލާތަކަށް އަޅުގަނޑުމެންގެ ޤައުމާއި ރައްޔިތުން ވެސް ހުށަހަޅާކަށް ބޭނުމެއް ނޫން" އޭނާ ވިދާޅުވިއެވެ.
