އެމެރިކާ، އިންޑިއާ، އިޒްރޭލް އަދި ޔުނައިޓެޑް އަރަބް އެމިރޭޓްސްގެ ލީޑަރުން ބުރާސްފަތި ދުވަހު ފުރަތަމަ ވާޗުއަލް ސަމިޓް ބާއްވައިފިއެވެ. އިސްރާއީލުގެ ބޮޑުވަޒީރު ޔާއިރު ލަޕެޑް އާ ހަވާލާދީ ބައިނަލްއަގުވާމީ މީޑިއާއިން ރިޕޯޓްކުރާ ގޮތުގައި، މި ސަމިޓްގެ ވިސްނުން ބައްޓަން ކުރެއްވީ މިދިޔަ އަހަރު ވޮޝިންޓަންގައި، ޔޫއޭއީގެ އެމްބަސެޑަރުގެ ގެކޮޅުގައެވެ.
މި ސަމިޓްގައި ވާހަކަ ދައްކަވަމުން ޔޫއޭއީގެ ރައީސް މުހައްމަދު ބިން ޒައިދު އަލް ނަހްޔާންގެ އިފްތިތާހީ ތަގުރީރުގައި ވިދާޅުވީ އަޅުގަނޑު ވެސް އުންމީދު ކުރަން އަޅުގަނޑުމެންގެ ސަރަހައްދަކީ ސުލްހައާއި ފާގަތިކަމަށް އެދޭ ފަރާތްތަކަށް ނަމޫނާ އަކަށް ވާނެ ކަމަށެވެ.
ޔޫއޭއީއިން ނެރުނު ގުޅިފައިވާ ބަޔާނުގައި ވަނީ، ދެކުނު އޭޝިއާ އާއި މެދުއިރުމަތީގެ ކާބޯތަކެތީގެ ނުތަނަވަސްކަން ނައްތާލުމަށް އިންޑިއާގައި "ފުޑް ޕާކް" ތަކެއް ތަރައްގީ ކުރުމަށް އިންޑިއާގައި ދަނޑުވެރިކަމުގެ ދާއިރާގައި އިންވެސްޓް ކުރުމަށް 2 ބިލިއަން ޑޮލަރުގެ މަޝްރޫއެއް ހިންގާނެކަމަށެވެ.
މި ހަތަރު ގައުމުން މަޝްވަރާ ކުރިގޮތުގައި އެންމެ ފަހުގެ ކްލައިމެޓް ޓެކްނޮލޮޖީ ބޭނުންކޮށްގެން ދަނޑުވެރިންނާއި ދަނޑުވެރިކަމުގެ އުފެއްދުންތައް ޕްރޮސެސް ކުރާ ފަރާތްތަކާއި ރީޓެއިލަރުން އެއްތަނަކަށް ގެނެސް އިސްރާފު ކުޑަ ގޮތަކަށް އަދި ފެން ޚަރަދު ކުޑަވާ ގޮތަކަށް ގޮވާމުގެ ބާވަތްތައް އެންމެ ގިނައިން ލިބޭ ގޮތަށް ދަނޑުވެރިކަން ކޮށް ރައްކާ ކުރުމަށް ބާރުއަޅާފައި ވެއެވެ.
އަދި މި ހަތަރު ގައުމުން އިންޑިއާގައި އިއާދަކުރަނިވި ހަކަތައިގެ މަޝްރޫއުތައް ވެސް ތަރައްގީ ކުރުމަށް ބާރުއަޅާކަމަށްވެސް އެ ގައުމުތަކުން ނެރުނު ބަޔާނުގައި ބުނެފައިވެ އެވެ.
އެ ހަތަރު ގައުމުން ވެސް އިންޑިއާގައި އިއާދަކުރަނިވި ހަކަތައިގެ މަޝްރޫއުތައް ކުރިއަރައިގެންދާނެ ކަމަށް އެ ގައުމުން ނެރުނު ބަޔާނެއްގައި ބުންޏެވެ. އިއާދަ ކުރަނިވި ހަކަތައިގެ ދާއިރާގައި އެމެރިކާއާއި އިސްރާއީލުގެ ޕްރައިވެޓް ސެކްޓަރަށް ދައުވަތު ދިނުމަށާއި އެފަރާތްތަކުގެ ޓެކްނޮލޮޖީ ބޭނުން ކޮށްގެން އީޖާދީ ހައްލުތައް ހޯދުމަށް މަސައްކަތް ކުރުމަށްވެސް ގުޅިފައިވާ ބަޔާނުގައި ވެއެވެ.
ޔޫކްރެއިންގައި ހިނގަމުންދާ ހަނގުރާމައިގެ ސަބަބުން ދުނިޔޭގެ ކާބޯތަކެތީގެ ދަތިކަން އިންތިހާއަށް ކުރިމަތިވެދާނެ ކަމުގެ ބިރު ހީވެފައިވާ ދަނޑިވަޅެއްގައި، ކާބޯތަކެތީގެ ރައްކާތެރިކަމާއި ސާފު ހަކަތައިގެ މައްޗަށް ސަމާލުކަން ދިނުމަށް ޔޫއޭއީ، އިސްރާއީލު އަދި އިންޑިއާގެ ލީޑަރުންނާއެކު އެމެރިކާގެ ރައީސް ޖޯ ބައިޑަން ވާޗުއަލްކޮށް ބޭއްވި ސަމިޓްގައި މަޝްވަރާ ކޮށްފައި ވެއެވެ.
