އިންޑިއާއިން ދަނީ ދުނިޔޭގެ އެކި ކޮންޓިނެންޓްތަކުގައި އެގައުމުގެ ދިފާއީ ސާމާނު އެކްސްޕޯޓު ކުރުމަށް ބާރުއަޅަމުންނެވެ. އިންޑިއާގެ ދިފާއީ އެކްސްޕޯޓް ވަނީ ނިމިދިޔަ މާލީ އަހަރު 13،000 ކްރޯޑު ރުޕީސްގެ ރެކޯޑެއް މުގުރާލާފައެވެ. އެ ކާމިޔާބީއަކީ އެއިރޯސްޕޭސް އުފެއްދުމުގައި ޕްރައިވެޓް ސެކްޓަރއިން މުހިންމު ދައުރެއް އަދާކުރުމުން ލިބުނު ކާމިޔާބީއެއް ކަމަށް އިންޑިއާއިން ބުނެއެވެ.
އިންޑިއާ ސަރުކާރުން ބުނާ ގޮތުން ނިމިދިޔަ މާލީ އަހަރު ހާސިލުކޮށްފައިވާ ކާމިޔާބީއަކީ މީގެ ފަސް ވަރަކަށް އަހަރު ކުރިން އަސްކަރީ ވިޔަފާރި އެކްސްޕޯޓް ކުރުމުގައި ހުރި މިންވަރުގެ އަށް ގުނަ އިތުރު އަދަދެކެވެ.
އިންޑިއާގެ ދިފާއީ އެކްސްޕޯޓްގައި ސަރުކާރު ކުންފުނިތަކުގެ ހިއްސާ ވަނީ 10 ޕަސެންޓުން 30 ޕަސެންޓަށް އިތުރު ވެފައެވެ. މިކަމުގެ އަސްލަކީ، ބްރަހްމޯސް މިސައިލްތައް ވިއްކުމަށް އިންޑިއާއިން ފިލިޕީންސާއެކު ހެދި 2500 ކްރޯޑު ރުޕީސްގެ އެއްބަސްވުން ކަމަށްވެސް އިންޑިއާ އިން ބުނެއވެ.
އިންޑިއާގެ ދިފާއީ ސެކްޓަރގެ ވިޔަފާރިއަކީ އެއިރޯ ސްޕޭސް ސެކްޓަރގެ ވިޔަފާރިއެވެ. މިސާލަކަށް ދުނިޔޭގެ އެކި ކަންކޮޅުތަކުގައި ވިއްކާ އެމެރިކަން އެޓޭކް ހެލިކޮޕްޓަރު އަޕާޗޭގެ ހުރިހާ ފްލައިޓްތަކެއް މިހާރު އިންޑިއާގައި އުފައްދާފައި ވަނީ ބޮއިންގް އާއި ޓާޓާ ގުޅިގެން އުފައްދާފައިވާ ޖޮއިންޓް ވެންޗާއަކުންނެވެ. ހަމަ އެފަދައިން އަދާނީ ޑިފެންސް އާއި ލޯހިއާ ގްރޫޕް ފަދަ ކުންފުނިތަކުން ވެސް އިޒްރޭލުގެ ގިނަ ޑްރޯންތަކެއްގެ ބޮޑީގެ ބައިތައް ހަދަމުންދެއެވެ.
ދިފާއީ ވުޒާރާގެ ޑޭޓާއަށް ބަލާއިރު، 2017 ވަނަ އަހަރާއި 2021 ވަނަ އަހަރާ ދެމެދު އިންޑިއާގެ ދިފާއީ އެކްސްޕޯޓް ވަނީ ގާތްގަނޑަކަށް ހަ ގުނަ އިތުރުވެފައެވެ. އެއީ 1520 ކްރޯޑު ރުޕީސްއިން 8435 ކްރޯޑަށެވެ.
