ޕާކިސްތާން ބޮޑުވަޒީރުގެ ކުޑަ ދަރިކަލުން ސުލޭމާން ޝެހްބާޒްގެ މައްޗަށް 16 ބިލިއަން ރުޕީސްގެ މަނީ ލޯންޑަރިންގެ މައްސަލައެއްގައި ތުހުމަތުކޮށްފިއެވެ. މި މައްސަލާގައި އޭނާއާއި އިތުރު އެހެން މީހަކަށް ދައުވާ ކޮށްފައިވާއިރު މި ދެމީހުންވެސް ފިލައިގެން އުޅޭކަމަށް ކޯޓުން ވަނީ ކަނޑައަޅާފައެވެ.
މި މައްސަލާގައި ފެޑެރަލް އިންވެސްޓިގޭޝަން އޭޖެންސީ (އެފްއައިއޭ) އިން ވެސް ތުހުމަތުކޮށްފައިވާ ޕަންޖާބުގެ ޗީފް މިނިސްޓަރު ހަމްޒާ ޝެހްބާޒް ވެސް ކޯޓަށް ހާޒިރުކޮށްފައި ވެއެވެ. އަދި ޕީއެމް ޝެހްބާޒްގެ ފަރާތްޕުޅުން ވަނީ ދިފާއުގައި ވަކީލަކު މެދުވެރިކޮށް ވަކާލާތު ކުރުމުގެ ހުއްދައެއް އެދިފަ އެވެ.
މައްސަލަ ބެއްލެވި ފަނޑިޔާރު އިޖާޒް ހަސަން އަވާން ވަނީ، ޖުލައި މަހުގެ 30 ވަނަ ދުވަހު ބާއްވާ އަޑުއެހުމުގައި، ސްޕެޝަލް ކޯޓް (ސެންޓްރަލް-1) އަށް ހާޒިރުވެވަޑައިގެންނެވޭކަން ކަށަވަރު ކުރެއްވުމަށް ބޮޑުވަޒީރަށް އަންގަވާފައެވެ.
ޝަރީއަތުގެ އަޑުއެހުމުގައި އިންވެސްޓިގޭޝަން އޮފިސަރު ވަނީ ސުލޭމާން އާއި ތާހިރު ނަގްވީ ޝަރިއަތަށް ހާޒިރުނުވުމުން މިމީހުންނަކީ ފިލައިގެނ އުޅޭ ބައެއް ކަމަށް ބުނެފައެވެ.
މައްސަލަ ބައްލަވާ ފަނޑިޔާރު ވަނީ އެ މީހުން ފިލައިގެން އުޅޭކަމަށް ކަނޑައަޅައި، ތުހުމަތު ކުރެވޭ ދެ މީހުންގެ މިލްކިއްޔާތުގައި ހަރުމުދަލުގެ ތަފްސީލް ހޯދުމަށާއި އެމުދާ ފްރީޒް ކުރުމަށް އަންގައިފަ އެވެ.
ފަނޑިޔާރު އިތުރަށް އެންގެވީ މިމައްސަލާގައި ތުހުމަތު ކުރެވޭ އެހެން މީހެއްކަމަށްވާ ރަމަޒާން ޝުގަރ މިލްސްގެ ޕިޔޯނު މާލިކް މަޤްޞޫދު އަޙުމަދު މަރުވި ގޮތާއި އޭނާގެ މަރުގެ ސެޓްފިކެޓްގެ މައުލޫމާތު ދިނުމަށެވެ.
މި މަނީ ލޯންޑަރިންގެ މައްސަލައަކީ ޕާކސްތާން ބޮޑުވަޒީރު ޝެހްބާޒް ޝަރީފާއި ޕަންޖާބްގެ ޗީފް މިނިސްޓަރ ހަމްޒާ ޝެހެބާޒްވެސް ހިމެނޭ މައްސަލައެކެވެ. މި ދެ ބޭފުޅުން ކަފާލާތުގެ ދަށުން މިދިޔަ ޖޫން މަހުގެ 11 ވަނަ ދުވަހު ކޯޓުން ވަނީ ދޫކޮށްފައެވެ.
މި މައްސަލާގައި ޝެހްބާޒާއި އޭނާގެ ބޭފުޅުންނަށް ތުހުމަތުކޮށް ތަހުގީގު ފަށާފައި ވަނީ ނޮވެމްބަރު 2020 ގައެވެ.
