ދެކުނު އިރުމަތީ އޭޝިޔާގެ ގައުމެއް ކަމަށްވާ ލާއޯސްގައި ޗައިނާއިން ފައިނޭންސް ކޮށްގެން ހައި-ސްޕީޑް ރޭލެއް ބިނާކޮށްފައި ވެއެވެ. މި ޕްރޮޖެކްޓްގެ ސަބަބުން ލާއޯސް ޑިފޯލްޓް ވެދާނެ ކަމުގެ ބިރުވެސް ހީވެފައި ވެއެވެ. ހަމައެއާއެކު ޗައިނާގެ ދަރަނީގެ ދަންތުރައިގެ ޑިޕްލޮމެސީއަށް ފާޑުކިއުންތައް އަމާޒު ވެފައި ވެއެވެ.
އޭޝިއާ ޓައިމްސްނޫހުން ރިޕޯޓްކުރާ ގޮތުގައި ލާއޯސްއަށް އިގުތިސޯދީ އަދި މާލީ ކާރިސާތައް އިތުރު ވަމުންދާއިރު، ޗައިނާގެ ބެއިލްއައުޓް ނުވަތަ ދަރަނި މައާފުކުރުމުގެ އެހީތެރިކަމެއް ނެތި ސަލާމަތެއް ނުވެވޭނެ ކަމަށެވެ.
ކޮމިއުނިސްޓު ލާއޮސްއަށް ޗައިނާގެ ބެއިލްއައުޓް ލިބޭނެ ކަމަށް ބަލަން ޖެހޭ ސަބަބުތަކެއް އެބަހުއްޓެވެ. ޗައިނާގެ ބެލްޓް އެންޑް ރޯޑް އިނީޝިއޭޓިވް (ބީއާރުއައި) އިން ދެކުނު އިރުމަތީ އޭޝިއާ އަށް ކަނޑައަޅާފައިވާ 5.9 ބިލިއަން ޑޮލަރުގެ ރޭލްވޭ ނިންމާލުމަށް ފަހު މިހާ އަވަހަށް ލާއޯސް ޑިފޯލްޓް ވާން ފުރުސަތު ދީފިނަމަ ބެއިޖިން އަށް ޖިއޮޕޮލިޓިކަލް ގޮތުން ގެއްލުން ވާނެ އެވެ.ޔުނިވާސިޓީ އޮފް ޓޯކިޔޯގެ ގްރެޖުއޭޓް ސްކޫލް އޮފް ޕަބްލިކް ޕޮލިސީގެ ޕްރޮފެސަރެއް އަދި 2018 ވަނަ އަހަރާއި 2020 ވަނަ އަހަރާ ދެމެދު ލާއޯސް ސަރުކާރަށް ފިސްކަލް ޕޮލިސީގެ ލަފާ ދެއްވި ޓީމުގެ މެމްބަރެއް ކަމަށްވާ ޓޮޝިރޯ ނިޝިޒާވާ ވިދާޅުވާ ގޮތުގައި ލާއޯސްއަށް އިގުތިސޯދީ އަދި މާލީ ގޮތުން ބޮޑެތި ދަތިތަކާ ކުރިމަތިލާން ޖެހިފައިވީނަމަވެސް ޗައިނާއިން ލާއޯސް ޑިފޯލްޓް ވާން ދޫކޮށްނުލާނެ ކަމަށެވެ.އޭނާ ވިދާޅުވަނީ ދަރަނީގެ އަދަދުގެ ބޮޑުކަމުން އެކަނި ވެސް ދައްކުވައިދެނީ ޑިފޯލްޓް ވުމަކީ ލާއޮސްއަށް ލާޒިމު ކަމެއް ކަމަށެވެ. ނަމަވެސް، މާލީ ގޮތުން ޕާކިސްތާނަށް ކުރިމަތިވި މައްސަލަތަކުން އަރައިގަތުމަށް ބެއިޖިންއިން ވަނީ މިދިޔަ މާޗް މަހު އިސްލާމްއާބާދުން ދައްކަން ޖެހޭ 4.5 ބިލިއަން ޑޮލަރުގެ ލޯނު އަނބުރާ ދެއްކުން ފަސްކޮށްދީފައެވެ. އެހެންނަމަވެސް ސްރީލަންކާއަށް އެހީވާން އެދުމުން ޗައިނާއިން އިހުމާލު ވިއެވެ.
ލާއޯސްއިން ޗައިނާއަށް ދައްކަންޖެހޭ ސީދާ ދަރަނީގެ މިންވަރަކީ ކޮހާ އަދަދެއްކަން ސާފެއް ނޫނެވެ. ވޯލްޑް ބޭންކުން ލަފާކުރާ ގޮތުގައި އެއީ އެ ގައުމުގެ ރަސްމީ ދަރަނީގެ ގާތްގަނޑަކަށް ދެބައިކުޅަ އެއްބައެވެ.ވިލިއަމް އެންޑް މޭރީގްލޯބަލް ރިސާޗް އިންސްޓިޓިއުޓްގެ ރިސާޗް ލެބެއް ކަމަށްވާ އެއިޑްޑޭޓާއިން ބުނާ ގޮތުގައި ގާތްގަނޑަކަށް 12.2 ބިލިއަން ޑޮލަރު ލާއޮސްއިން ޗައިނާއަށް ދައްކަން ޖެހެއެވެ.ޗައިނާ ވަނީ ދުނިޔޭގެ އެތައް ގައުމަކަށް ބޮޑެތި އަދަދުތަކުން ދަރަނި ދީފައެވެ. ހާވާޑް ބިޒްނަސް ރިވިއުއިން 2020 ވަނަ އަހަރު އަންދާޒާކޮށްފައިވާ ގޮތުގައި ޗައިނާގެ ދައުލަތާއި އެގައުމުގެ ސަރުކާރު ކުންފުނިތަކުގެ ސަބްސިޑަރީތަކުން ދުނިޔޭގެ 150 އަށް ވުރެ ގިނަ ގައުމަށް ސީދާ ލޯނާއި ޓްރޭޑް ކްރެޑިޓްގެ ގޮތުގައި ގާތްގަނޑަކަށް 1.5 ޓްރިލިއަން ޑޮލަރު ދީފައިވެއެވެ.
ވޯލްޑް ބޭންކުން ޖެނުއަރީ މަހު ރިޕޯޓުކޮށްފައިވާ ގޮތުގައި ދުނިޔޭގެ އެންމެ ދަށް ފަންތީގެ އާމްދަނީ ލިބޭ 74 ގައުމުގެ ތެރެއިން މި އަހަރު ދަރަނީގެ ގޮތުގައި ދައްކަން ޖެހޭ 35 ބިލިއަން ޑޮލަރުގެ ތެރެއިން ގާތްގަނޑަކަށް 13.1 ބިލިއަން ޑޮލަރަކީ ޗައިނާގެ ފަރާތްތަކަށް ލިބެންޖެހޭ ފައިސާ އެވެ. އޭޝިއާ ޓައިމްސް ނޫހުން ބުނީ ލާއޯސް އިން ޗައިނާއަށް އަހަރަކު 700 މިލިއަން ޑޮލަރު ދަރަނީގެ ފައިސާގެ ގޮތުގައި ދައްކަން ޖެހޭ ކަމަށެވެ.
