އެމެރިކާގެ ރައީސް ޖޯ ބައިޑެންގެ ހުކުރު ދުވަހުގެ ދަތުރުފުޅާއެކު ސައޫދީ އަރަބިއްޔާއާއެކު އޮތް ގުޅުން ރަނގަޅު ކުރުމަށް އެމެރިކާގެ ރައީސް މާބޮޑު ކަމެއް ކުރެއްވިކަމަށް ނުބެލެވެއެވެ. ފުރަތަމަ ކަމަކަށް، ބައިޑެން ވަނީ މުޙައްމަދު ބިން ސަލްމާނާ އަތާ އަތްޖޯޑު ކޮށް ސަލާން ކުރެއްވުމަށް އުޒުރު ވެރިވެވަޑައިގެންފައެވެ. އެމރިކާ މަސްއޫލުވެރިން ވިދާޅުވަނީ ސަބަބކީ ކޮވިޑެވެ. ނަމަވެސް އިޒްރޭލުގައި ޔަހޫދީ މަސްއޫލުވެރިންނާ ބައިޑެން ވަނީ އަތާ އަތްޖޯޑުކޮށް ސަލާން ކުރައްވާފައެވެ.
އެކަމަކުވެސް މޮޅު ލިބިވަޑައިގެންނެވި ބޭފުޅަކީ ސައޫދީ ވަލީ ޢަހުދު މުޙައްމަދު ބިން ސަލްމާނެވެ. އެއީ އެމެރިކާގެ ރައީސް އޭނާގެ ގަނޑުވަރުގެ އޮޅިގަނޑާހަމައަށް ގެންނެވުމުގައި މުޙައްމަދު ބިން ސަލްމާން ކާމިޔާބު ވެވަޑައި ގަތުމުންނެވެ.
މެދުއިރުމައްޗާއި އަފްޣާނިސްތާންގައި ގިނަ އަދަދަކަށް މުސްލިމުންގެ ކޭ އޮރުވާލުމަށްފަހި މިހާރު އެމެރިކާ މެދުއިރުމަތީގެ ލެއިން ފޫހިވެފައިވާ ފަދައެވެ. މާބޮޑު ޝައުގުވެރިކަމެއް އެމެރިކާއިން އަރަބި ލެއަށް ނުދެއްކުމުން ޗައިނާ ވަނީ އަރަބި ޕެޓްރޯ ގޭސް ޑޮލަރުތަކަށް ޝައުގުވެރިވެގެން ފައެވެ.
މެދުމަރުމަތީގައި ސައޫދީ އަރަބިއްޔާއާ ނުލައި އެމެރިކާއިން ސްޓްރެޓެޖީއެއް ގެންގުޅެވޭނެކަމަށް ބެލެވެނީނަމަ އެއީ މޮޔަ ވިސްނުމެކެވެ. ކުވެއިތާއި ޔޫއޭއީ ނުވަތަ ގަތަރަކީ ސައޫދީގެ ބަދީލެއް ނޫނެވެ. އަދި އީރާނަކީ ކޮންމެ ދުވަހަކު ދެ ދަޅައަށް އެމެރިކާ ފަނާވުމަށް އެދި ބަދު ދުއާ ކުރުން މަތީގައި ދެމި އޮންނަ ގައުމެކެވެ.
މަގާމާ ހަވާލުވެވަޑައިގެން ބައިޑެން ވިދާޅުވީ މުޙައްމަދު ބިލްސަލްމާނާ މުއާމަލާތެއް ނުކުރައްވާނެ ކަމަށެވެ.ނަމަވެސް އާޚިރުގައި މުހައްމަދު ބިން ސަލްމާގެ ދޮރުގައި ޓަކި ޖެއްސެވީ އެމެރިކާގެ ރައީސެވެ.
އެމެރިކާގެ ރައީސް ސައޫދީއަށް ވަޑައިގަތް އިރު އޭނާގެ މަގްބޫލުކަން އުޅެނީ ދުވަހަކުވެސް ނުދާވަރަށް ދަށަށް ގޮސްފައެވެ. ދުނިޔެއިން އެމެރިކާގެ ލީޑާޝިޕެއް ނު ފެނެއެވެ. އެމެރިކާގެ އިގްތިސާދީ އަދި އަސްކަރީ ބާރަށް ހުރިހައި ބިތެއްގައި ވަނީ ގޮންޖެހުންތައް ކުރިމަތި ވެފައެވެ. އެމެރިކާއަށް ދުނިޔޭގެ މަސްރަހުގައި ކޮއްޅަށް ހުރެވެނީ ކޮންމެ ސަރަހައްދަކުންވެސް އެންމެ ބާރުގަދަ ގައުމު އެމެރިކާއާއި ކޮނޑާ ކޮނޑު ޖެއްސުމުންނެވެ.
އޭޝިއާ ޕެސިފިކްގައި ޖަޕާނެވެ. އޭޝިއާގައި އިންޑިއާއެވެ. އެހެން ސަރަހައްދުތަކުގައި ޔޫރަޕެވެ. އެމެރިކާގެ ބަސްއަހާ ގައުމެއްވެސް މަދެވެ.
ޗައިނާއަކީ މިހާރުވެސް ސައުދިއަރަބިޔާގެ ތެޔޮ އެންމެ ގިނައިން ގަންނަ ޤައުމެވެ. ޗައިނާގެ ސިފައިން ދަނީ ބާބުލްމަންދަބުގައި ފޯރި މަރަމުންނެވެ. ސައޫދީއަށް މިސައިލް ޓެކްނޮލޮޖީ ދެމުންނެވެ.
ޗައިނާގެ ކަނޑުގެ ސިފައިންގެ އަސްކަރީ މަރުކަޒެއް ޖިބޫޓީގައި މިހާރުވެސް އޮންނަ އިރު، ބެއިޖިންގއަށް މެދުނުކެނޑި ތެޔޮ ލިބޭނެކަން ކަށަވަރު ކުރުމަށްޓަކައި ޗައިނާ ސިފައިން އެސަރަހައްދުގައި ބައިތިއްބަން ބޭނުންވެއެވެ.
މިއިން އެއްވެސް ކަމަކާ ކުރިމަތިލާކަށް އެމެރިކާއަށް ސްޓްރޭޓެޖީއެއް ނެތެވެ!
