އާބާދީއާ ބެހޭ އދގެ އެންމެ ފަހުގެ ރިޕޯޓް ކަމަށްވާ "ޕޮޕިއުލޭޝަން ޕްރޮސްޕެކްޓްސް" އިން ލަފާކުރާ ގޮތުގައި 2023 ވަނަ އަހަރު އަންނަ އިރު، އިންޑިއާގެ އާބާދީ ޗައިނާގެ އާބާދީއަށް ވުރެ އިތުވާނެއެވެ. އަދި 2030 ވަނަ އަހަރު 1.5 ބިލިއަނަށް އަދި 2050 ވަނަ އަހަރު 1.66 ބިލިއަނަށް އިންޑިއާގެ އާބާދީ އަރާނެއެވެ.
އދގެ ޕޮޕިއުލޭޝަން ޕްރޮސްޕެކްޓްސް އިން 2027 ވަނަ އަހަރު އިންޑިއާގެ އާބާދީ ޗައިނާގެ އާބާދީއަށް ވުރެ އިތުރުވާނެ ކަމަށް ލަފާކޮށްފައިވަނީ މީގެ ތިން އަހަރު ކުރިންނެވެ. އެކަމަކު އިންޑިއާގެ އާބާދީ އިތުރުވާ ރޭޓް ޗައިނާއަށް ވުރެ ހަލުވިކަމުން ބައިނަލްއަގްވާމީ އޭޖެންސީތަކުން ތިން އަހަރު ތެރޭ އަންދާޒާތަކަށް ބޮޑު ބަދަލެއް ގެންނަން ޖެހުނެވެ.
ކޮންމެ ޤައުމަކުންވެސް އެ ޤައުމެއްގެ ރައްޔިތުންނަށް ފާގަތި ދިރިއުޅުމެއް ހީދައި ދިނުމުގެ މަޤްޞަދު ޙާޞިލު ކުރުމަށްޓަކައި ސިޔާސަތުތަކެއް ބައްޓަން ކުރެއެވެ.
އެންމެ ބާރަށް ފަގީރުކަމުގެ ހާލަތުން އަރައިގަތް ޗައިނާ 1978 ވަނަ އަހަރުން ފެށިގެން ހޯދާފައިވާ ކާމިޔާބީއަކީ ތަފާތު ވާހަކައެކެވެ. ޗައިނާގެ ތަޖުރިބާތަކުން އިންޑިއާއަށް މުހިންމު ފިލާވަޅުތަކެއް ލިބިދެއެވެ.
ޚާއްޞަކޮށް 1978 ވަނަ އަހަރު ޗައިނާއިން އެޤައުމުގެ އިޤްތިޞާދީ އިޞްލާޙުތައް ފެށިއިރު، އެޤައުމުގެ ބޮލަކަށްޖެހޭ އާމްދަނީ އަކީ 156.4 ޑޮލަރެވެ. އެއިރު އިންޑިޔާގެ އާމްދަނީ ހުރީ 205.7 ޑޮލަރަށްވުރެ ދަށުގައެވެ. ދެ ޤައުމަކީވެސް އެއިރު ފަޤީރުކަމުގައި އޮތް ދެ ޤައުމެވެ.
މިއަދު ޗައިނާ އޮތީ ބޮލަކަށް ޖެހޭ އާމްދަނީގެ ނިސްބަތުން އިންޑިއާއަށް ވުރެ ހަ ގުނަ ކުރީގައެވެ. 2021 ވަނަ އަހަރު ޗައިނާގެ ބޮލަކަށް ޖެހުނު އާމްދަނީ އަކީ 12556 ޑޮލަރެވެ. 2020 ވަނަ އަހަރު އިންޑިއާގެ ބޮލަކަށް ޖެހޭ އާމްދަނީ ހުރީ 1933 ޑޮލަރުގައެވެ.
ޗައިނާގެ މި އިގުތިސޯދީ ފުދުންތެރިކަމުގެ ސަބަބުން ޗައިނާގެ އަސްކަރީ ގާބިލްކަން ބިނާކުރުމަށް ބެއިޖިންގއަށް ބޮޑެތި ހޭދަތަކެއް ކުރުމަށް މަގުފަހިވެގެން ދިޔައެވެ.
ޗައިނާއިން މި ހުރިހާ ކަމެއް ކުރީ ކިހިނެއްތޯ އެއީ ކޮށްލަން ރަގަޅު ސުއާލެކެވެ.
ޗައިނާއިން އިޤްތިޞާދީ އިޞްލާޙުތައް ގެންނަން ފެށީ، 1978 ވަނަ އަހަރުއެވެ. ޗައިނާއިން ދަނޑުވެރިކަމަށް ވަރަށް ބޮޑު އަހަންމިއްޔަތެއް ދިނެވެ.
ކޮމިއުނިސްޓް ނިޒާމުން ވަކިވެ، ދަނޑުވެރިކަން ސަރުކާރުގެ ކޮންޓްރޯލުން މިނިވަންކުރި އެވެ. ނަތީޖާއެއްގެ ގޮތުން 1978-1984 ވަނަ އަހަރާ ދެމެދު ޗައިނާގެ ދަނޑުވެރިކަމުގެ ބޮލަކަށް ޖެހޭ ނިސްބަތް އަހަރަކު 7.1 އިންސައްތަ އިތުރު ވިއެވެ. ހަމައެފަދައިން ދަނޑުވެރިންގެ ޙަޤީޤީ އާމްދަނީ އަހަރަކު 14 އިންސައްތައިގެ ކުރިއެރުމެއް ހޯދިއެވެ. ހަމައެއާއެކު ޗައިނާއިން ދަނޑުގޮވާމުގެ ބާވަތްތައް ބާޒާރަށް ދޫކޮށްލައި މިނިވަންކޮށްލިއެވެ.
ރައްޔިތުންނަށް ތަނަވަސްކަން ލިބި، ދަނޑުވެރިންގެ ޙަޤީޤީ އާމްދަނީ ދެގުނައަށް އިތުރުވެގެން ދިޔުމުން، ޗައިނާގެ ފަޤީރުކަން، އެންމެ 6 އަހަރު ދުވަހުގެ ތެރޭގައި ދެބައިކުޅަ އެއްބަޔަށް ދަށަށް ދިޔައެވެ.
އެވަރުން ފުދުނީކީއެއް ނޫނެވެ! ރަށްފުށުގެ ރައްޔިތުންގެ އާމްދަނީވެސް އިތުރު ވީއެވެ. ނަތީޖާއެއްގެ ގިތުން ސިނާޢީ އުފެއްދުންތަކަށް ވަރަށް ބޮޑު ޑިމާންޑެއް އުފެދި، ޗައިނާގެ އިގްތިސާދީ އިޞްލާޙީ އެޖެންޑާ އިތުރަށް ކުރިއަށް ގެންދިޔުމަށް ސިޔާސީ ގޮތުން ވެސް ސަރުކާރަށް ޤާނޫނީ ހުއްޖަތެއް ލިބިގެންދިޔައެވެ.
ގައުމުގެ އެތެރޭގައި އުފެދުނު ޑިމާންޑަށް ޓަކައި ޓައުން އެންޑް ވިލެޖް އެންޓަޕްރައިޒަސް (ޓީވީއީ) މެދުވެރިކޮށް ޗައިނާގެ ސިނާއަތް ވާންވެގެން ދިޔައެވެ.
އެކަމަކު މި މުއްދަތުގެ ތެރޭގައި މާ ބޮޑު ސަމާލުކަމެއް ނައައި ކަމަކީ އާބާދީ ކޮންޓްރޯލު ކުރުމަށް އެއް ކުއްޖަކު ކޮންމެ ދެމަފިރިއަކަށް ހޯދުމަށް ކޮންތްރޯލު ކޮށްފައި އޮތް ސިޔާސަތެވެ. މި ސިޔާސަތެއް ތައާރަފުކުރީ 1980 ވަނަ އަހަރުގެ ސެޕްޓެމްބަރު މަހު އެވެ. މިސިޔާސަތު 2016 ވަނަ އަހަރުގެ ކުރީކޮޅަށް ދެމިއޮތެވެ.
ޗައިނާގެ އާބާދީ މިއަދު ކުރިއަރަނީ އިންޑިއާގެ 1.1 އިންސައްތައާއި އަޅާބަލާއިރު އަހަރަކު އެންމެ 0.1 އިންސައްތައިގައެވެ.
އިންޑިއާގެ މުޅި ކުރިއެރުމުގެ ވާހަކައަކީ، އެކަށީގެންވާ ކާމިޔާބީއެއް ކަމަށް ބެލިނަމަވެސް، އެއީ ޗައިނާފަދަ ކުލަގަދަ ކާމިޔާބީއެއް ނޫނެވެ. ޔަގީނުންވެސް ދަނޑުވެރިކަމުގެ ދާއިރާގައި އިންޑިއާ ކާމިޔާބެއް ނޫނެވެ.
މިދިޔަ 40 އަހަރުގެ ދިގު މުއްދަތެއްގެ ތެރޭގައި 1978-2018 އަށް ޗައިނާގެ ދަނޑުވެރިކަން އަހަރަކު 4.5 އިންސައްތައިގައި ކުރިއަރާފައިވާއިރު، 1991 ވަނަ އަހަރު އިންޑިއާގެ އެގްރި-ޖީޑީޕީ ކުރިއަރާމިންވަރު ވަނީ އަހަރަކު 3 އިންސައްތައާ ގާތްކުރާ މިންވަރަކަށެވެ.
ދަނޑުވެރިކަމުގެ ބާޒާރާއި އަގުތައް މިނިވަން ކުރުމަކީ އަދިވެސް އިންޑިއާގައި ބަހުސް ކުރަމުންދާ އަމަލީ ސިފައެއް ނުފެންނަ މައްސަލައެކެވެ. ކާބޯތަކެތީގެ އަގު އުފުލެމުންދާކަމުގެ އެއްވެސް އިޝާރާތެއް ލިބުއްޖެނަމަ ސަރުކާރުން އެކްސްޕޯޓް ކުރުން ކޮންޓްރޯލް ކޮށްލައެވެ.
އިންޑިއާއިން މިޑްޑޭ މީލް ސްކޫލުގައި ތައާރަފް ކުރުމާއި ސާފު ބޯފެން ހުރިހައި ވިލެޖަކަށް ލިބޭ ގިތް ހެދުމާއި އެނޫނަސް އެހެން ސިއްޙީ ދާއިރާގައި އަޅާފައިވާ ފިޔަވަޅު ތަކުން މިފަހަކަށް އައިސް ކުއްލިއަކަށް ދިރިއުޅުމުގެ ހާލަތު ވަނީ ރަގަޅު ވެފައެވެ.
އަދިވެސް އިންޑިއާގައި ލޭބާފޯސްގައި އަންހެނުންގެ ބައިވެރިވުން 25 ޕަސެންޓަށް އޮތުމަކީ މައްސަލައެކެވެ. ކުރިއަށް އޮތްތާނގައި އަންހެނުންގެ ތައުލީމަށް އިތުރަށް ސަމާލުކަން ދީ އެމީހުން އުފެއްދުންތެރިބަޔަކަށް ހެދުމުން ނަތީޖާ ބޮޑުކޮށް ބަދަލު ވެދާނެ ކަމަށް ބެލެވެއެވެ.
