ޕާކިސްތާނުގެ ކުރީގެ ބޮޑުވަޒީރު އަދި ޕާކިސްތާން ތަހްރީކޭ އިންސާފްގެ ވެރިޔާ އިމްރާން ޚާން ވަނީ އައު ސަރުކާރުން ވެރިކަމަށް އައުމުން މަދަނީންނާއި ސިފައިންގެ ދެމެދުގެ ގުޅުންތަކުގައި ނުތަނަވަސްކަން އުފެދިފައިވާ ކަމަށް ވިދާޅުވެ އެކަމުގެ ޒިންމާ އައު ސަރުކާރުގެ ބޮލުގައި އަޅުވާފައެވެ.
އަދި އިމްރާން ޚާން ވަނީ މިހާރުގެ ސަރުކާރަށް ސިފައިން ތާއީދުކުރުމަށް ވިސްނި ވިސްނުން މުރާޖައާ ކުރުމަށްވެސް އެދިވަޑައިގެންފައެވެ. އިމްރާން ޚާން މި ވާހަކަ ދައްކަވާފައި ވަނީ ޕަންޖާބުގައި ބާއްވާ ބައި އިލެކްޝަންގައި އޭނާގެ ޕާޓީން ވާދަކުރާ 20 ގޮނޑިއަށް ކެންޑިޑޭޓުންނަށް ތާއީދު ހޯއްދެވުމަށް ބޭއްވެވި ޖަލްސާގައެވެ.
ޚާން ވިދާޅުވީ ޕާކިސްތާން ޕީޕަލްސް ޕާޓީ (ޕީޕީޕީ) އާއި ޕާކިސްތާން މުސްލިމް ލީގް (ނަވާޒް) (ޕީއެމްއެލް-އެން)އިން ވެރިކަމަށް އައިސްފައި ވަނީ އެޕާޓީތަކުގެ ލީޑަރުންގެ ބޮލުގައި އެޅިފައިވާ ކޮރަޕްޝަންގެ މައްސަލަތަކުން ސަލާމަތްވުމަށްކަމަށެވެ.
އަދި އެކަންކަމުގެ ސަބަބުން މަދަނީ ލީޑަރޝިޕާއި ސިފައިންނާ ދެމެދު ބައިބައި ވުމެއް އުފެދިފައިވާ ކަމަށް ޚާންއާ ޙަވާލާދީ ޑޯން ނޫހުން ބުންޏެވެ.
