އިނގިރޭސިވިލާތުގެ ސަރުކާރުގެ އެހީތެރިކަމާއި، ޔޫކޭގެ އިންޓެލިޖެންސް ދާއިރާގެ އެހީތެރިކަމާއެކު ސްރީލަންކާގެ އީސްޓާ ސަންޑޭގެ ހަމަލާ ތަހުގީގު ކުރުމަށް ބޭނުންފުޅުވާކަމަށް ސްރީލަންކާގެ ވަގުތީ ރައީސް ރަނިލް ވިކްރަމަސިންހަ ވިދާޅުވެއެވެ. އޭނާ ވިދާޅުވީ، އީސްޓަރ ސަންޑޭގެ ރަނގަޅު ތަހުގީގެއް ކުރިއަށް ނުދާތީ މި މައްސަލައަށް ފުރިހަމަ ހައްލެއް ލިބިފައި ނުވާކަން މިއިން ދޭހަކޮށްދޭ ކަމެވެ.
ހައްދުފަހަނައަޅާފައިވާ ހަރުކަށި މުސްލިމުންގެ ބަޔަކު ވަނީ ސްރީލަންކާގެ ވެރިރަށް ކޮޅުނބުގެ ތިން ފައްޅިއަކަށާއި ލަގްޒަރީ ހޮޓަލަކަށް 21 އޭޕްރިލް 2019ގައި ޖާނު ގޮއްވާލައިގެން ބޮމުގެ ހަމަލާތަކެއް ދީފައެވެ.
އެ ހާދިސާގައި 250 އަށް ވުރެ ގިނަ މީހުން މަރުވެ އެތައް ބަޔަކު ޒަހަމްވި އެވެ. އިސްތިއުފާ ދެއްވާފައިވާ ރާޖަޕަކްސަ އާއިލާއަށް އަލަށް ވެރިކަމަށް އައުމަށް މަގުފަހިވެގެން ދިޔައީ މިހާދިސާއެވެ.
މި ހަމަލާތަކުގެ ޒިންމާ ތައުހީތު ޖަމާއަތް ނަމަކަށް ކިޔާ ޓެރަރިސްޓް ޖަމާއަތަކުން ވަނީ އުފުލާފައެވެ. މިކަމާ ގުޅިގެން ސްރީލަންކާގައި އޭޕްރީލް މަހުން ފެށިގެން އޮގަސްޓް މަހުގެ ނިޔަލަށް ހަތަރު މަސް ދުވަހުގެ މުއްދަތައް ކުއްލި ނުރައްކަލުގެ ހާލަތު އިއުލާން ކުރެވުނެވެ.
އީސްޓަރ ހަމަލާތަކާ ގުޅިގެން ޖުމްލަ 676 މީހަކު ހައްޔަރުކޮށްފައިވާއިރު، އޭގެ ތެރެއިން 202 މީހަކު އަދިވެސް ރިމާންޑް ޖަލެއްގައި ބަންދުގައި އެބަތިއްބެވެ. އަދި 66 މީހަކު ތަހުގީގަށް ބަންދުކޮށް، ކަފާލާތުގެ ދަށުން 408 މީހަކު ދޫކޮށްލާފައިވާ ކަމަށްވެސް ސްރީލަންކާގެ ޑެއިލީ މިރަރ ނޫހުން ބުނެއެވެ.
ވިކްރަމަސިންހަ ވަނީ ސްރީލަންކާގެ އިގްތިސާދީ ކާރިސާއާ ގުޅިގެން އިސްތިއުފާ ދެއްވި ގޯތާބޭ ރައީސްގެ ވެރިކަމުގައި މެއި މަހުގެ 13 ވަނަ ދުވަހު ބޮޑުވަޒީރު ކަމަށް އައްޔަން ކުރައްވާފައެވެ. ސްރީލަންކާއިން ދުވާލަކު 5 ގަޑިއިރަށް ކަރަންޓް ކެނޑި، އިގްތިސާދު ހީނަރުވުމާ ގުޅިގެން ރައީސް ވަނީ އިސްތިއުފާ ދެއްވާފައެވެ.
ވަގުތީ ރައީސް ކަމަށް އައްޔަން ކޮށްފައިވާ ވިކްރަމަސިންހަ ވިދާޅުވީ އިގުތިސޯދީ ކާރިސާއާ ކުރިމަތިލާން ޖެހިފައިވާ ރައްޔިތުންނަށް ސަރުކާރުން އެހީތެރިކަން ފޯރުކޮށްދެމުން އަންނަ ކަމަށެވެ.
