ރަޝިޔާއާ ދެކޮޅަށް ހުޅަނގުން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން އެ ރަޝިޔާ ހަލާކެއްނުވާނެ ކަމަށާއި އެހެންނަމަވެސް ތިންވަނަ ދުނިޔޭގެ ޤައުމުތަކަށް އެކަމުގެ ގެއްލުން ބޮޑަށް ކުރާނެކަމަށް ސްރީލަންކާގެ ވަގުތީ ރައީސް ރަނިލް ވިކްރަމަސިންހަ ވިދާޅުވެއްޖެއެވެ.
"ދަތިކުރުމުގެ ފިޔަވަޅުތަކުގެ ސަބަބުން ފައިދާއެއް ކުރާނެ ކަމަށް ހީކުރަންވީތޯ؟ އޭގެ ސަބަބުން ބާޒާރުގައި އަގުތައް އުފުލިގެން ނޫނީ ނުދާނެ. މިހާރު އަޅަމުންދާ ދަތިކުރުމުގެ ފިޔަވަޅުތަކަށް ބަލައި، މިއީ ކޮންމެހެން ކުރަން ޖެހޭ ކަމެއްތޯ އަމިއްލަ ނަފްސާ ސުވާލުކޮށްލަން އެބަ ޖެހޭ. ދަތިކުރުމުގެ ފިޔަވަޅުތަކުގެ ސަބަބުން ރަޝިއާ ދެ ކަކޫ މައްޗަށް ތިރިއެއް ނުވާނެ، އެކަމަކު އޭގެ ސަބަބުން ތިން ވަނަ ދުނިޔޭގެ އެހެން ގައުމުތައް ކުޑަކަކޫ މައްޗަށް ތިރިވާނެ،" ބަނޑުހައިހޫނުކަމާއި ކާބޯތަކެތީގެ ރައްކާތެރިކަމާ ބެހޭ ބައިނަލްއަގުވާމީ ޕެނަލް ޑިސްކަޝަންގައި ދޫރުދަރްޝަން ޓީވީގައި ވާހަކަ ދައްކަވަމުން ވިކްރަމަސިންހަ ވިދާޅުވި އެވެ.ސްރީލަންކާގެ ވަގުތީ ރައީސް ވިދާޅުވީ، ދަތިކުރުމުގެ ފިޔަވަޅުތަކުގެ އަސަރު ސްރީލަންކާ ފަދަ ގައުމުތަކަށް ކުރާ ފަދައިން އާންމު ގޮތެއްގައި ކާބޯތަކެތީގެ ބާވަތްތައް އެތެރެ ކުރަން ޖެހޭ ގައުމުތަކަށް ކުރާނެ ކަމަށެވެ. އޭނާ ވިދާޅުވިގޮތުގައި، ސްރީލަންކާގައި މިހާރު ކުރިމަތިވެފައިވާ މައްސަލައަކީ، މުޅި ދުނިޔެއަށް ކުރިމަތިވެފައިވާ ކާރިސާއާ ގުޅުންހުރި ކާރިސާއެއް ކަމަށެވެ.ވިކްރަމަސިންހަ ވިދާޅުވީ ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާއި ޔޫކްރެއިންގައި ހިނގާ ހަނގުރާމައިގެ ސަބަބުން ދުނިޔެއަށް ކާބޯތަކެއްޗާއި ތެލުގެ ކާރިސާތައް ކުރިމަތިވެފައިވާ ކަމަށެވެ.
އަހަރު ފެށުނީއްސުރެ ގޮދަނާއި އެއްގަމު މަހުގެ ބާވަތްތަކުގެ އަގުތައް ވަނީ މައްޗަށް ގޮސްފައެވެ. މެއި މަހުގެ 21 ވަނަ ދުވަހު ބޭއްވި އދގެ ސަލާމަތީ މަޖިލީހުގެ ބައްދަލުވުމެއްގައި ދުނިޔޭގެ ގޮދަނުގެ ސްޓޮކް ހަމައެކަނި ދިހަ ހަފްތާއަށް ވާވަރަށް ހުރިކަމަށް ބުނެފައި ވެއެވެ. އަދި 2007 ވަނަ އަހަރާއި 2008 ވަނަ އަހަރު ދުނިޔޭގެ ހާލަތު އޮތް މިންވަރަށްވުރެ ހާލަތު މިހާރު ގޯސްކަމަށް އދގެ ސަލާމަތީ މަޖިލީހުގެ ބައްދަލުވުމެއްގައި ބުނެފައި ވެއެވެ.
