އެމެރިކާގެ ހައުސް އޮފް ރެޕްރެޒެންޓޭޓިވްސްގެ ރައީސް ނެންސީ ޕެލޯސީ ޓައިވާނަށް ވަޑައިގަތުމަށް ރާއްވަވާފައިވާ ކަމަށް ރިޕޯޓްކޮށްފައިވާ ޕްލޭންތަކާ ޗައިނާއިން ދެކޮޅު ހަދައިފިއެވެ.
ޕެލޯސީގެ ދަތުރުފުޅު ކުރިއަށް ގެންދަވާނަމަ ޗައިނާއިން ވަރުގަދަ އަދި ރައްދުގައި ހަރުދަނާ ފިޔަވަޅުތަކެއް އަޅާނެ ކަމަށް ޗައިނާގެ ޚާރިޖީ ވުޒާރާއިން ވަނީ އިންޒާރު ދީފައެވެ.
ފައިނޭންޝަލް ޓައިމްސްގައި ރިޕޯޓު ކޮށްފައި ވާގޮތުން، ޕެލޯސީ ޓައިވާނަށް ވަޑައިގަތުމަށް ހަމަޖެހިފައި ވަނީ އޮގަސްޓު މަހުގެ ތެރޭގައެވެ. ޕެލޯސީ ކޮވިޑް-19 އަށް ޕޮޒިޓިވްވުމާ ގުޅިގެން އެޕްރީލް މަހު ކުރައްވަން ހަމަޖެހިފައި އޮތް ދަތުރު ލަސްކޮށްފައި ވަނީއެވެ.
މިއީ އެމެރިކާގެ ގާނޫނު ހަދާ މަޖިލީހުގެ ރައީސް ނިއުޓް ގިންރިޗް ޓައިވާނަށް ވަޑައިގެންނެވި ފަހުން އެމެރިކާގެ ގާނޫނު ހަދާ މަޖިލީހުގެ އެންމެ މަތީ ފަންތީގެ ވެރިއަކު 25 އަހަރުގެ ތެރޭގައި ޓައިވާނަށް ކުރައްވާ ފުރަތަމަ ދަތުރުފުޅެވެ.
ޗައިނާއިން ވަނީ ބާރުގެ ބޭނުންކޮށްގެން ވިއަސް ޓައިވާން ހިފުމަށް ވައުދުވެފައެވެ. އަދި ޓައިވާނުގެ ވައިގެ ސަރަހައްދު ކައިރީގައި ހަނގުރާމަމަތީ މަތިންދާ ބޯޓުތައް އުދުއްސައި، އަސްކަރީ ތަމްރީނުތައް ބާއްވަމުން ގޮސްފައެވެ. ޗައިނާގެ އެ އަމަލުތަކުގެ މަގުސަދަކީ އެ ރަށުގެ މިނިވަންކަމަށް ވަކާލާތުކުރާ ފަރާތްތަކާއި ބޭރުގެ އެކުވެރި ގައުމުތަކުން އެ ރަށަށް އެހީވުން ހުއްޓުވުން ކަމަށް މުހައްލިލުން ދެކެއެވެ.
ޕެލޯސީގެ މި ދަތުރުފުޅުގެ ސަބަބުން "ޗައިނާގެ ސިޔާދަތާއި ސަރަހައްދީ މިނިވަންކަމަށް ވަރަށް ބޮޑަށް ހީނަރުކަން އައިސް، ޗައިނާ-އެމެރިކާގެ ގުޅުމުގެ ބިންގަލަށް ބޮޑެތި އަސަރުތަކެއް ކުރާނެ" ކަމަށް ޗައިނާއިން ބުނެއެވެ.
އަދި މިއީ ޓައިވާންގެ މިނިވަންކަމަށް ވަކާލާތު ކުރާ ބާރުތަކަށް ވަރަށް ބޮޑު ނުބައި ސިގްނަލެއް ފޮނުވުން ކަމަށްވެސް ފޮރިން މިނިސްޓްރީގެ ތަރުޖަމާނު ޒާއޯ ލިޖިއާންގް ވިދާޅުވި އެވެ.
ޒާއޯ ވިދާޅުވީ، އެމެރިކާއިން ނުބައި މަގުން ދިއުމަށް ބާރު އަޅާނަމަ، ޗައިނާއިން އެގައުމުގެ ސިޔާދަތާއި ސަރަހައްދީ އެއްބައިވަންތަކަން ރައްކާތެރިކުރުމަށް ހަރުދަނާ އަދި ވަރުގަދަ ފިޔަވަޅުތަކެއް އަޅާނެއެވެ.
ވައިޓް ހައުސްގެ ޕްރެސް ސެކްރެޓަރީ ކެރީން ޖީން ޕިއެރޭ ވަނީ ޕެލޯސީ ޓައިވާނަށް ކުރައްވާ ދަތުރުފުޅާ ބެހޭ ގޮތުން އެއްވެސް ކޮމެންޓެއް ކުރައްވަން ބޭނުންފުޅު ނުވާކަމަށް ވިދާޅުވެފައެވެ. ޖީން ޕިއެރޭ ވިދާޅުވީ، ޓައިވާނަށް އެމެރިކާއިން ކުރާ ތާއީދު އަދިވެސް އޮތީ ވަރަށް ވަރުގަދަކޮށް ކަމަށާ، "ވަން ޗައިނާ" ސިޔާސަތަށް އެމެރިކާއިން ދޭ އަހައްމިއްޔަތުކަން އެގޮތުގައި އޮންނާނެ ކަމަށާއި އެހެންނަމަވެސް، ޓައިޕޭއާއެކު ނުރަސްމީ ގުޅުންތަކާއި ދިފާއީ ގުޅުންތައް ކުރިއަށް ގެންދިޔުމަށް ފުރުސަތު އޮންނާނެކަމަށެވެ.
ޓައިވާނަށް އެމެރިކާއިން ހަތިޔާރު ވިއްކުމާ ގުޅިގެން ޗައިނާ ސިފައިންވެސް ވަނީ ނަރުގަދަ ރައްދެއް ދީފައެވެ.
ޓައިވާންގެ މިނިވަންކަމަށް ބޭރުގެ ބާރުތަކުންނާއި، ވަކިވެގަތުމަށް މަސައްކަތްކުރާ ފަރާތްތަކުން ހިންގާ ކޮންމެ ނުފޫޒެއް ނާކާމިޔާބުކޮށްލުމަށް ވަރަށް ސާބިތުކަމާއެކު ޗައިނާއިން މަސައްކަތް ކުރާނެ ކަމަށް ދިފާއީ ވުޒާރާގެ ވެބްސައިޓްގައ އާންމުކުރި ބަޔާނެއްގައި ބުނެފައި ވެއެވެ.
ޕެލޯސީގެ ދަތުރުފުޅާ ގުޅިގެން ޗައިނާއިން އަޅާނެ ފިޔަވަޅުތަކާ ބެހޭ އެއްވެސް ތަފްސީލެއް ޒާއޯ ދެއްވާފައި ނުވެއެވެ. ބެއިޖިންއިން އާންމު ގޮތެއްގައި ޓައިވާން މަތިން ދުއްވާ އަސްކަރީ ފްލައިޓްތަކާއި ހަނގުރާމައިގެ ގޭމްތައް ބޭނުންކޮށްފައިވަނީ ޗައިނާގެ ހިތްހަމަ ނުޖެހުން ހާމަކުރުމުގެ ގޮތުންނެވެ.
ދެކުނު ޗައިނާ ކަނޑުގައި ބޭރުގެ ހަނގުރާމަމަތީ މަނަވަރުތަކަށް އުނދަގޫކުރުމަށް ޗައިނާއިން ލޭޒަރއާއި އެނޫންވެސް އުކުޅުތައް ބޭނުން ކުރެއެވެ.
ޗައިނާގެ އައްސޭރިފަށުގެ ބައިނަލްއަޤުވާމީ ވައިގެ ސަރަޙައްދުގައި ޙަރަކާތްތެރިވާ އެމެރިކާއާއި އެޤައުމުގެ އެކުވެރި ޤައުމުތަކުގެ ސަވައިލެންސް މަތިންދާބޯޓުތަކާ ދެކޮޅަށް ހަރުކަށި ފިޔަވަޅު އަޅާކަމުގެ ތުހުމަތުވެސް ޗައިނާގެ ޕައިލެޓުންނަށް ވަނީ ކުރެވިފައެވެ.
ޓައިވާނާ ދެކޮޅަށް ޗައިނާއިން އެންމެ ބޮޑު ނުރައްކަލެއް ކުރިމަތިކުރީ 1995-96 ވަނަ އަހަރު އޭރުގެ ރައީސް ލީ ޓެންގް-ހުއި އެމެރިކާއަށް ކުރެއްވި ދަތުރުފުޅާ ގުޅިގެން އެ ގައުމުގެ އުތުރާއި ދެކުނުގެ ކަނޑުގެ ސަރަހައްދުގައި އަސްކަރީ ތަމްރީނުތަކެއް ޗައިނާއިން ބާއްވައި މިސައިލްތައް ޓެސްޓް ކުރިއިރުގައެވެ.
