އިންޑިއާއިން ސްރީލަންކާއަށް އިންސާނީ އެހީގެ ގޮތުގައި 3.8 ބިލިއަން އެމެރިކާ ޑޮލަރު ދީފައިވާއިރު، އިންޑިއާ ވަނީ އެގައުމަށް އެންމެ ގިނައިން އެހީ ދީފައިވާ ގައުމަށެވެ.
ސްރީލަންކާއާ ބެހޭގޮތުން ބޭއްވި ސިޔާސީ ޕާޓީތަކުގެ ބައްދަލުވުމަށްފަހު އިންޑިއާގެ ޚާރިޖީ ވަޒީރު އެސް ޖައިޝަންކަރު ވިދާޅުވީ، އިންޓަރނޭޝަނަލް މަނިޓަރީ ފަންޑާއި އެހެނިހެން ދަރަނިދޭ ފަރާތްތަކާ އެކު، ޝްރީލަންކާއިން ކުރާ މަސައްކަތުގައި އިންޑިއާއިން އެހީވެ މަގުފަހިކޮށްދޭނެ ކަމަށެވެ.
ޖައިޝަންކަރު ވިދާޅުވީ، ސިޔާސީ ޕާޓީތަކާ ސްރީލަންކާގެ ހާލަތު ޙިއްސާކޮށްލަން ބޭނުންފުޅުވީ ސްރީލަންކާގައި ވަރަށް ސީރިއަސް ކާރިސާއެއް އުފެދިފައިވާތީ ކަމަށެވެ.
އޭނާ ވިދާޅުވީ ފެންނަމުން މިދާ މަންޒަރުތަކާއި އޭގެ ސަބަބުން މާލީ، އިޖްތިމާއީ އަދި ސިޔާސީ ގޮތުން ނުކުމެދާނެ ނަތީޖާތަކަށް ބަލާއިރު، ކުރިން ދިމާނުވާ ފަދަ ހާލަތެއް ސްރީލަންކާގައި މިއޮތީ ކުރިމަތިވެފައެވެ. ސްރީލަންކާއަކީ އިންޑިއާގެ ވަރަށް ގާތް އަވަށްޓެރިއަކަށް ވުމުން ކަންބޮޑުވުންތައް ހުރުމަކީ ވަރަށް ތޮބީޢީ ކަމެއް ކަމުގައި ވިދާޅުވިއެވެ.
އަދި ކަންތައްތައް ދާގޮތުން މި ހަމަނުޖެހުމުގެ އަސަރު އިންޑިއާއަށް ފޯރަފާނެކަމުގެ ކަންބޮޑުވުން، އެބަ އޮތްކަމަށްވެސް ވިދާޅުވިއެވެ.
އަދި އަވަށްޓެރި އެއްވެސް ޤައުމެއްގައި ހަމަނުޖެހުމެއް އުފެދިއްޖެނަމަ، ނުވަތަ އެއްވެސް ކަހަލަ އެތެރޭގެ ތަޅާފޮޅުމެއް ހިނގާނަމަ، އެކަމަކީ އިންޑިއާއިން ކަންބޮޑު ވާން ޖެހޭނެ ކަމެއް ކަމުގައި ވިދާޅުވިއެވެ.
ސިޔާސީ ޕާޓީތަކުގެ ބައްދަލުވުމުގައި ބައިވެރިން ވަނީ ދެ މައްސަލައެއް ސަމާލުކަމަށް ގެނަސްފައެވެ. އެއީ، އިންޑިއާގެ މަސްވެރިންގެ މައްސަލައާއި، ޓެމިލްނާޑޫއާ ހަމައެކަނި 12 ކިލޯމީޓަރުގެ ދުރުގައި އޮންނަ ޖެފްނާ ހިސާބުން ޓެމިލްނާޑޫއަށް ކޮށްފާނެ އަސަރެކެވެ. ނަމަވެސް ޖައިޝަންކަރު ވިދާޅުވީ އެފަދަ ޒަޟާންވީ މައްސަލަތަކެއް އެބަހުރިކަމަށާއި ނަމަވސް މިހާރުގެ ފޯކަސްއަކީ ސްރީލަންކާއިން ބޭރުގެ ފަރާތްތަކަށް ދޭން ހުރި ފައިސާއާއި ދަރަނީގެ މައްސަލަ ކަމަށެވެ.
އިންޑިޔާއާއި ސްރީލަންކާއާ ދެމެދު ހުރި މައްސަލަތަކަކީ އަޅާ ކިޔޭނެ މައްސަލަތަކެއް ނޫން ކަމުގައިވެސް ވިދާޅުވިއެވެ.
އިދިކޮޅު ލީޑަރު ރާހުލް ގާންދީ ވަނީ ދެ ދުވަސް ވަންދެން ކުރެއްވި ޓްވީޓްތަކުގައި އިންޑިއާއާއި ސްރީލަންކާގެ ހާލަތު އަޅުވައި ކިޔާފައެވެ.
ޑީއެމްކޭ އާއި އޭއައިއޭޑީއެމްކޭ ފަދަ ޓެމިލް ނާޑޫގެ ސިޔާސީ ޕާޓީތަކުން ވަނީ އިންޑިއާގެ ގާނޫނު ހަދާ މަޖިލީހުގެ މޮންސޫން ސެޝަން ފެށުމުގެ ކުރިން ސިޔާސީ ޕާޓީތަކުގެ ޖަލްސާއެއް ބާއްވަން އެދިފައެވެ. އަދި އެ ޕާޓީތަކުން ވަނީ އިންޑިއާއިން ސްރީލަންކާގެ މައްސަލައަށް ވަންނަންވާނެ ކަމަށް ބުނެފައެވެ. ނަމަވެސް އަމަލީ ގޮތުން ސްރީލަންކާގެ މައްސަލައަށް ވަނުމާ ބެހޭ ގޮތުން ޖަޔަޝަންކަރު އެއްޗެއް ވިދާޅެއް ނުވެއެވެ.
ކޮލަމްބޯގައި ހުންނަ އިންޑިއާ އެމްބަސީން ވަނީ އިންޑިއާއިން ސްރީލަންކާގެ ހާލަތަށް ނުފޫޒު ނުފޯރުވާނެ ކަމަށް ނުވަތަ އިތުބާރު ގެއްލިފައިވާ ރާޖަޕަކްސަގެ ވެރިކަން ސަލާމަތް ކުރުމަށް އެއްވެސް ގޮތަކުން މަސައްކަތް ނުކުރާނެ ކަމަށް ބުނެފައެވެ. އަދި އިންޑިއާއާ އަޅުގައިގެން ދެކެވޭ ވާހަކަތައް ތަކުރާރުކޮށް އިންޑިއާ އެމްބަސީން ވަނީ ދޮގުކޮށްފައެވެ.
މި ބައްދަލުވުމުގައި ކޮލަމްބޯގައި ހުންނަވާ އިންޑިއާ ސަފީރު ގޯޕާލް ބާގްލޭ އާއި ފިނޭންސް މިނިސްޓްރީގެ މަސްއޫލުވެރިން ބައިވެރިވެ ވަޑައިގެންނެވިއެވެ. އަދި ފިނޭންސް މިނިސްޓްރީން ވަނީ ޕްރެންޓޭޝަންތަކެއްވެސް ހަދާފައެވެ.
