ދުނިޔޭގެ އިންފްރާސްޓްރަކްޗަރ ބިނާކުރުމަށް ބޭނުންވާ ފައިސާ ހޯދުމަށް 600 ބިލިއަން އެމެރިކާ ޑޮލަރުގެ ވަޢުދެއް ދުނިޔޭގެ މުއްސަނދި ގައުމުތަކުން ވަނީ ވެފައެވެ. މިއީ ޗައިނާއިން ހިންގާ ބެލްތް އެންޑް ރޯޑް ޕްރޮޖެކްޓްތަކާ ވާދައަށް ސިނާއީ ހަތް ގައުމުން ކުރިއަށް ގެންދާ ޕާޓްނަރޝިޕް ފޮރ ގްލޯބަލް އިންފްރާސްޓްރަކްޗަރ އެންޑް އިންވެސްޓްމަންޓް (ޕީ.ޖީ.އައި.އައި)ގެ ނަމުގައި ހިންގާ މަޝްރޫއުތަކެކެވެ.
އިރުމަތީ އޭޝިއާ އިން ފެށިގެން ޔޫރަޕާއި އެފްރިކާއާ ހަމައަށް މީގެ 10 ވަރަކަށް އަހަރު ކުރިން ޗައިނާއިން ފެށި ޒަމާނީ ސިލްކް ރޯޑް ބަދަލުކޮށް ލުމަށް މުއްސަނދި ގައުމުތަކުން ފަށާ މަޝްރޫއެކެވެ.
ޕީޖީއައިއައި އަކީ މުޅިން އާ ވިސްނުމެއްވެސް ނޫނެވެ. މިއީ މީގެ އަހަރެއްހާ ދުވަސް ކުރިން ޖީ7 އިން ހުށަހެޅި ބިލްޑް ބެކް ބެޓަރ ވޯލްޑް (ބީ3ޑަބްލިއު) އިނީޝިއޭޓިވް އަލުން ބްރޭންޑް ކުރުމެކެވެ.
މިމަސައްކަތުގެ މަގްސަދަކީ ދުނިޔޭގައި ޗައިނާގެ އިތުރުވަމުން އަންނަ ނުފޫޒު، ވަކިން ހާއްސަކޮށް ތަރައްގީވަމުން އަންނަ ގައުމުތަކުގައި އިތުރުވާ ނުފޫޒު ހުއްޓުވުމެވެ.
ޕީ.ޖީ.އައި.އައިއަކީ ޗައިނާގެ ބެލްޓް އެންޑް ރޯޑާ ތަފާތު ވިސްނުމެކެވެ. ޕީ.ޖީ.އައި.އައިގައި މޫސުމާއި ހަކަތައިގެ ރައްކާތެރިކަމާއި ޑިޖިޓަލް އިގްތިސޯދުގައި ސޮފްޓް އިންފްރާސްޓްރަކްޗާ ތަރައްގީ ކުރުމަށް ފޯކަސް ކުރުމަށް ސަމާލުކަން ދެއެވެ.
އޭގައި ސިންގަޕޫރުން ފަރަންސޭސިވިލާތާއި ފަރަންސޭސިވިލާތާ ގުޅުވައިދޭ 600 މިލިއަން ޑޮލަރުގެ ގްލޯބަލް ސަބްމެރިން ޓެލެކޮމިއުނިކޭޝަން ކޭބަލެއް އެޅުމާއި، މިޞްރާއި، އެފްރިކާގެ މުލި މެދުވެރިކޮށް، ސިންގަޕޫރުން ފަރަންސޭސިވިލާތާ ގުޅުވައިދޭ ކޭބަލް އެޅުން މި މަޝްރޫޢުގެ ތެރޭގައި ހިމެނެއެވެ. ސާފު ހަކަތައިގެ ޓެކްނޮލޮޖީ ގެ ވަސީލަތްތައް ތަޢާރަފްކުރުން އަވަސްކުރުމުގެ ގޮތުން ދެކުނު އިރުމަތީ އޭޝިޔާގެ ސްމާޓް ޕަވަރ ޕްރޮގްރާމަށް 40 މިލިއަން އެމެރިކާ ޑޮލަރުގެ އިންވެސްޓްމަންޓަކާއި (އަދި އިތުރު 2 ބިލިއަން އެމެރިކާ ޑޮލަރުގެ އިންވެސްޓްމަންޓްތައް ކުރުމަށް) ވަނީ ހަމަޖެހިފައެވެ.
އަދި ދެކުނު އެންގޯލާގައި 2 ބިލިއަން ޑޮލަރުގެ ސޯލާ ޕްރޮޖެކްޓެއް ގާއިމް ކުރުންވެސް ހިމެނެއެވެ.
ބެލްޓް އެންޑް ރޯޑް އިނީޝިއޭޓިވްއަކީ ޝީ ޖިންޕިންގެ އޭޝިއާ ޕެސިފިކް ސަރަހައްދުގެ ޖިއޯސްޓްރެޓީޖިކް ތަސައްވުރުގެ އެންމެ ބޮޑު ނާރެހެވެ.
ދެކުނު އިރުމަތީ އޭޝިޔާގެ ޤައުމުތަކުގެ މެދުގައި އިންފްރާސްޓްރަކްޗަރގެ ދާއިރާއިން އިތުރުވަމުން އަންނަ ޝައުގެއްގެ ސަބަބުން، ޕީ.ޖީ.އައި.އައި. ދެކުނު އިރުމަތީ އޭޝިއާގައި މަގްބޫލު ވެދާނެއެވެ.
އާސިއާންގެ ޑިޖިޓަލް މާސްޓަރޕްލޭންގައި ހިމެނޭ މައިގަނޑު އެއް ބަޔަކީ ޑިޖިޓަލް އިންފްރާސްޓްރަކްޗަރ ކަމަށްވާއިރު، ޓެކްނޮލޮޖީގެ ގޮތުން މެމްބަރު ޤައުމުތައް 2025 ވަނަ އަހަރު އަންނަންވާއިރަށް ޑިޖިޓަލް އިޤްތިޞާދަކަށް އަދި ޑިޖިޓަލް މުޖުތަމަޢަކަށް ބަދަލުކުރުމަކީ އެ ޑިޖިޓަލް އިންފްރާސްޓްރަކްޗަރގެ ތަސައްވުރުގެ މުހިންމު ބައެކެވެ.
ގޫގުލްއިން ދާދި ފަހުން ކުރި ސާވޭއަކުން ދެއްކި ގޮތުގައި އާސިއާންގެ ޑިޖިޓަލް އިގްތިސޯދު 2030 ވަނަ އަހަރު އަންނަންވާއިރަށް އެއް ޓްރިލިއަން ޑޮލަރަށް އަރައެވެ. އަދި ހާއްސަކޮށް އީ-ކޮމާސް އަދި ވާޗުއަލް ފައިނޭންސް ދާއިރާތަކުގައި ކުރިއަރާނެ ކަމަށް ވެއެވެ.
މޫސުމަށް އަންނަ ބަދަލުތަކުގެ ސަބަބުން ދެކުނު އިރުމަތީ އޭޝިޔާގެ ހާލަތުގެ ނާޒުކުކަމަށް ބަލާއިރު، ފެހި އިންފްރާސްޓްރަކްޗަރއަކީ، ސަރަހައްދުގެ ގައުމުތަކުން ޝައުޤުވެރިކަން އިތުރުވާނެ ދާއިރާއެކެވެ. އާސިއާންގެ ޤައުމުތަކުން ވަނީ 2015 ވަނަ އަހަރު އެކުލަވާލި ޕެރިސް އެގްރީމަންޓާއި، ކޮމިއުނިޓީ ވިޝަން 2025 ގައި ސޮއިކޮށްފައެވެ.
އަދި ދެކުނު ކޮރެޔާގެ މެނުފެކްޗަރިންގ ޖަޔަންޓުންނަކީ މިފަހުން ޗައިނާއިން ވިއެޓްނާމް ފަދަ އެހެން ޤައުމުތަކަށް އެމީހުންގެ އޮޕަރޭޝަންތައް ބަދަލުކޮށްފައިވާ ކުންފުނިތަކަކަށްވާތީ، ޕީ.ޖީ.އައި.އައިގެ އިންވެސްޓްމަންޓްތަކުން ވިޔަފާރީގެ މާޙައުލާއި އިންވެސްޓަރުންގެ ވިސްނުން މިހާރަށްވުރެ ރަނގަޅު ވެގެންދާނެ އިންވެސްޓްމަންޓްތަކެއް ކަމަށް ބެލެވެއެވެ. އެހެންވެ ޕީ.ޖީ.އައި.އައިގެ އިންވެސްޓްމަންޓްތައް ވަރަށް އީޖާބީ ގޮތެއްގައި ބަލައިގަންނާނެ ކަމަށް ބުނެވިދާނެއެވެ.
އިގުތިސޯދީ ޚާއްސަ ކޮރިޑޯތަކުގައި ވިޔަފާރި ކުރުމަށް މަގުފަހި ކުރުމުގެ ގޮތުން މަގުތަކާއި ރެއިލްވޭ އަދި ކަނޑު ބަނދަރުތަކުން ގުޅުވާލުމަށް ޗައިނާއިން ކުރާ މަސައްކަތަކީ ޗައިނާގެ ބެލްޓް އެންޑް ރޯޑްގެ ބޮޑު ތަސައްވުރެކެވެ. ނަމަވެސް ކޮވިޑް-19ގެ ބަލިމަޑުކަމުގެ ތެރޭގައި ބީއާރުއައިގެ މަޝްރޫއުތައް ހިންގި ގިނަ ގައުމުތަކެއްގައި ފުރަބަންދާއި ބޯޑަރު ބަންދުކުރުމުގެ ސަބަބުން އުމްރާނީ ތަރައްގީގެ މަޝްރޫއުތަކަށް ވަނީ މަޑުޖެހުމެއް އައިސްފައެވެ.
މިކަމުގެ ސަބަބުން ޗައިނާއިން އިންފްރާސްޓްރަކްޗަރ އިންވެސްޓްމަންޓް މަޝްރޫޢުތަކަށް ދޭ ސަމާލުކަން އިތުރުވެ، ޑިޖިޓަލް ސިލްކް ރޯޑް (ޑީ.އެސް.އާރް) އާއި، ހެލްތު ސިލްކް ރޯޑް (އެޗް.އެސް.އާރް) އަށް ދޭ ސަމާލުކަން އިތުރުވެގެން ދިޔައެވެ. އަދި މުޅި ދުނިޔެއަށް ކުރިމަތިވެފައިވާ ވަބާގެ ތެރޭގައި، ބައިނަލްއަގްވާމީ ތަރައްގީގެ އެއްބާރުލުން ކުރިއެރުވުމަށް، ޗައިނާއިން ވެކްސިން ޑިޕްލޮމެސީ ފެށިއެވެ.
ދެކުނު އިރުމަތީ އޭޝިޔާގެ ޤައުމުތަކާއެކު ބެއިޖިންގއިން ޓެކްނޮލޮޖީގެ ރޮނގުން ގުޅުން ބަދަހިކުރުމުގެ މައިގަނޑު އެއް ބަޔަކީ އިންފޮމޭޝަން އެންޑް ޓެލެކޮމިއުނިކޭޝަން ޓެކްނޮލޮޖީ (އައި.ސީ.ޓީ) އެވެ. ބެއިޖިން އިން ވަނީ އައިސީޓީ އަށް ސަމާލުކަން ދީގެން ޓެލެކޮމިއުނިކޭޝަން އަދި ޑިޖިޓަލް އިންފްރާސްޓްރަކްޗާގެ އިތުރުން ދެކުނު އިރުމަތީ އޭޝިއާގެ ފައިބާ އޮޕްޓިކް ޓެރެސްޓީރިއަލް އަދި ސަބްމެރިން ކޭބަލް ނެޓްވޯކްތަކަށް އިންވެސްޓްކޮށްފަ އެވެ.
ކޮންމެއަކަށް ޕީ.ޖީ.އައި.އައިގެ ސަބަބުން 2027 ވަނަ އަހަރާ ހަމައަށް އިންފްރާސްޓްރަކްޗާގެ ބޮޑެތި ކާމިޔާބީ ތަކެއް ފެނުމަކީ އެކަށީގެންވާ ކަމެކެވެ.
