މިހާރު އެންމެ ގިނައިން ރެމިޓެންސް ލިބޭ ގައުމަކީ އިންޑިއާ ކަމަށް ވެއްޖެއެވެ. އިންޑިއާއަށް 2021 ވަނަ އަހަރު 87 ބިލިއަން ޑޮލަރުގެ ރެމިޓެންސް ލިބިފައިވެއެވެ. މިއީ ޗައިނާ އާއި މެކްސިކޯ ފަދަ ގައުމުތަކަށްވުރެ ކުރީގައި އިންޑިއާ އުޅޭ ކަމަށް ބުނެ ދުނިޔޭގެ ސިއްހަތު ޖަމްއިއްޔާއިން ބުދަ ދުވަހު ނެރުނު ރިޕޯޓެއްގައި ބުނެފައިވާ ވާހަކައެކެވެ.މިއީ ރެފިއުޖީންނާއި ހިޖުރަވެރިންގެ ސިއްހަތާ ބެހޭ ގޮތުން ޑަބްލިއުއެޗްއޯއިން ނެރުނު ފުރަތަމަ ވޯލްޑް ރިޕޯޓެވެ. އޭގައި ބުނެފައި ވަނީ މިއަދު ދުނިޔޭގެ ކޮންމެ 8 މީހަކުން އެކެއް، އެއީ ގާތްގަނޑަކަށް އެއް ބިލިއަން މީހުންނަކީ ހިޖުރަވެރިން ކަމަށެވެ.
ބައިނަލްއަގުވާމީ އާންމު ސިއްހަތާ ބެހޭ އދގެ އިދާރާގެ ރިޕޯޓްގައި ބުނެފައި ވަނީ 2021 ވަނަ އަހަރު އެމެރިކާ ޑޮލަރުން އެންމެ ގިނައިން ފައިސާ ލިބޭ ފަސް ގައުމަކީ އިންޑިއާ، ޗައިނާ، މެކްސިކޯ، ފިލިޕީންސް އަދި މިސްރު ކަމަށެވެ. އަދި 2021 ވަނަ އަހަރުގެ އަންދާޒާތަކަށް ބަލާއިރު، ޗައިނާ އާއި މެކްސިކޯގެ 53 ބިލިއަން ޑޮލަރާއި ފިލިޕީންސްގެ 36 ބިލިއަން ޑޮލަރ ރެމިކޓެންސާއި އަދި މިސްރުގެ 33 ބިލިއަން ޑޮލަރަށް ވުރެ ކުރީގައި އޮތީ އިންޑިއާ އެވެ.
ބޭރަށް އެންމެ ގިނައިން ފައިސާ ފޮނުވި ގައުމަކީ 2020 ވަނަ އަހަރު އެމެރިކާއެވެ. ލަފާ ކުރެވޭ ގޮތުގައި ރެމިޓެންސް 2022 ވަނަ އަހަރު ވެސް އިތުރުވަމުން ދާނެއެވެ. ނަމަވެސް ކޮވިޑް-19 ގެ ކާރިސާ ފަދަ ގޮންޖެހުންތައް އެބަހުރި ކަމަށާއި އޭގެ ސަބަބުން އަދިވެސް އެންމެ ބޮޑު އެއް ރިސްކެއް އޮތީ ދަށް އަދި މެދު ފަންތީގެ އާމްދަނީ ލިބޭ ގައުމުތަކަށް ކަމަށް ބުނެއެވެ.
