އަފްޣާނިސްތާނުގެ 69 އިންސައްތަ ރައްޔިތުން ބުނާ ގޮތުން އެމީހުންނަށް އިންޑިއާއަކީ އެމީހުންނަށް އިތުބާރު ކުރެވޭ ރަހުމަތްތެރި ގައުމެކެވެ. ބްރަސަލްސްގައި ނިކުންނަ "އީޔޫ ރިޕޯޓަރ" އިން ބުނާގޮތުގައި އަފްޣާނިސްތާނުގެ ރައްޔިތުންނާ މެދު ދިރާސާއެއްކޮށް ސާވޭއެއް ކުރިއަށް ގެންގޮސްފައިވަނީ، އެގައުމުގެ ރައްޔިތުންގެ ކުރީގެ ހާލަތާއި، މިހާރުގެ ހާލަތާއި، އެމީހުންގެ މުސްތަގުބަލުގެ އުއްމީދުތަކާ މެދު ގެންގުޅޭ ފިކުރާައި ރަސައްވަރު ބެލުމުގެ ގޮތުންނެވެ.
މި ސާވޭއަކުން ދެއްކި ގޮތުގައި އަފްޣާނިސްތާނުގެ 67 ޕަސެންޓަށް ވުރެ ގިނަ މީހުން ގަބޫލުކުރާ ގޮތުގައި އެމެރިކާއިން އެގައުމުން ބޭރުވެގެން ދިޔައީ ނިކަން ދޯހަޅި ގޮތަކަށެވެ. އަދި އެމެރިކާއިން އަމަލު ކުރި ގޮތުން ކާބުލްއަށް ވަދެގަތުމަށް ތާލިބާނުންނަށް ހިތްވަރު ލިބިގެން ދިޔައީއެވެ.
އަފްޣާނިސްތާނުގައި އިންޑިއާއިން ވަނީ ގިނަ އަދަދަކަށް އިންވެސްޓް ކޮށްފައެވެ. މި ދެ ޤައުމަކީ ޒަމާންވީ ތާރީޚީ އަދި ޘަޤާފީ ގުޅުންތަކެއް ހިއްސާ ކުރާ ދެ ޤައުމެވެ.
އަވަށްޓެރި ޕާކިސްތާނުން ގަދައަޅައި މަސައްކަތް ކުރާއިރު ރައްޔިތުންގެ ފެންވަރުގައި އިންޑިއާ-އަފްޣާނިސްތާނުގެ ގުޅުން އަދިވެސް އޮތީ ނިކަން ބަދަހިކޮށް ކަމަށް މި ސާވޭން ދައްކައެވެ. ޑިޕްލޮމެޓިކް ފެންވަރުގައި އިންޑިއާ އަފްޣާނިސްތާންގައި ތަމްސީލު ނުވުމަކީ އިންޑިއާގެ މަސްލަހަތަށް އޮތް ނުރައްކަލެއް ކަމަށާއި، އާދައިގެ އަފްޣާނިސްތާނުގެ ރައްޔިތުންގެ މެދުގައި އިންޑިއާއަށް އޮތހިތްހެޔޮކަމުގެ ގުޅުން އޭގެ ސަބަބުން އެތައް އަހަރެއް ފަހަތަށް ޖައްސާލަފާނެ ކަމަށްވެސް މީހުން ބުނެފައި ވެއެވެ.
މި ސަރަހައްދުގެ ގައުމުތަކުގެ ތެރެއިން އަފްޣާނިސްތާނުގައި އެންމެ ބޮޑު އެހީއެއް ވެދޭ ގައުމަކީ އިންޑިއާއެވެ. ގާތްގަނޑަކަށް 3 ބިލިއަން އެމެރިކާ ޑޮލަރުގެ އެހީގެ ޕްރޮޖެކްޓްތަކެއް އިންޑިއާއިން ދަނީ އަފްޣާނިސްތާންގައި ހިންގަމުންނެވެ.
އިންފްރާސްޓްރަކްޗާ ބިނާކުރުންފަދަ މަސައްކަތުގައި އިންޑިއާއިން ހަރަކާތްތެރިވާއިރު މެޑިކަލް ސްޓާފުން ފޮނުވުމާއި ކާބޯތަކެތީގެ އެހީ ދިނުމުގައިވެސް އިންޑިއާއިން އުޅެއެވެ.
ކާބުލްގައި ހުންނަ އަފްޣާން ޕާލަމެންޓްގެ އާ އިމާރާތަކީ އިންޑިއާއިން ދީފައިވާ ހަދިޔާއެކެވެ. އަފްޣާން ގިނަބަޔަކު އިންޑިއާއަށް ބޭސްފަރުވާއަށް އާދެއެވެ. އަދި އަފްޣާނިސްތާނުގެ ދަރިވަރުން ގިނަ އަދަދަކަށް އިންޑިއާގެ ކޮލެޖްތަކާއި ޔުނިވާސިޓީތަކުގައި ކިޔަވަމުން ދެއެވެ. ދެހެރާދުންގައި ހުންނަ އިންޑިއަން މިލިޓަރީ އެކަޑަމީއަކީ އަފްޣާނިސްތާނުގެ ކެޑޭޓުން ގަވާއިދުން ތަމްރީން ކުރާ އެކަޑަމީއެކެވެ. އަފްޣާނިސްތާނުގައި ތާލިބާނުން ގެ ވެރިކަމެއް އޮންނަ އަފްޣާނިސްތާނަށް އިންސާނީ އެހީ އެންމެ ދީލަތި ކޮށް ފޯރުކޮށްދޭ ގައުމުތަކުގެ ތެރޭގައި އިންޑިއާ ވެސް ހިމެނެ އެވެ.
އަފްޣާނިސްތާނަށް އިންޑިއާއިން އެކްސްޕޯޓްކުރާ މުދަލުގެ މަގު ހުޅުވާލުމަށް ޕާކިސްތާނުން ދެކޮޅު ހެދުމުން، ދެގައުމުގެ ދެމެދުގައި ކުރާ ވިޔަފާރީގެ މުއާމަލާތްތައް މާބޮޑަށް އިތުރު ވެފައެއް ނުވެއެވެ.
އީޔޫ ރިޕޯޓަރއިން އެއްކުރި ޑާޓާއިން ދައްކާ ގޮތުގައި 78 ޕަސެންޓް މީހުން ގަބޫލުކުރަނީ ކުރީގެ ސަރުކާރަކީ ކޮރަޕްޓް ސަރުކާރެއް ކަމަށާއި ބޭރުގެ ގައުމުތަކުން ދިން އެހީއަކީ ދުވަހަކު ވެސް އާންމު ރައްޔިތުންނާ ހަމައަށް ފޯރި އެއްޗެއް ނޫން ކަމަށެވެ. އަދި 72 ޕަސެންޓް މީހުން ގަބޫލުކުރާ ގޮތުގައި ތާލިބާނުންނަށް ވެރިކަން ލިބުނީ ސަރަހައްދުތަކުގެ ލީޑަރުންގެ ކޮރަޕްޝަނުގެ ސަބަބުންނެވެ.
