އަފްޣާނިސްތާނުގައި ހަރަކާތްތެރިވާ އދގެ މިޝަން (އުނާމާ) އިން ބުދަ ދުވަހު ބުނީ ތާލިބާނުން ވެރިކަން އަތުލިފަހުން މިވީ 10 މަސް ދުވަހުގެ ތެރޭގައި ގާނޫނީ އިމުން ބޭރުން މީހުން މެރުމާއި، ލާއިންސާނީ އަނިޔާދިނުމާއި، ނުހައްގުން މީހުން ހައްޔަރުކުރުމާއި، ލާއިންސާނީ އަދަބުތައް ދިނުމުގެ އަމަލުތައް އިތުރު ވެގެން ގޮސސްފައިވާ ކަމަށެވެ. އަދި އެކަމުގެ ޒިންމާ ނަގަން ޖެހޭ ފަރާތަކީ ތާލިބާނުން ކަމަށް ބުންޏެވެ.
އުނާމާގެ ރިޕޯޓުގައި ބުނެފައިވަނީ، ތާލިބާނުން ގާނޫނުން ބޭރުން ހިންގާ އަމަލުތައް ގިނަ ފަރާތްތަކަށް އަމާޒުކޮށްފައިވާ ކަމަށާއި، އޭގެ ތެރޭގައި ވެރިކަމުން ދުރުކޮށްފައިވާ ކުރީގެ ސަރުކާރަށް ތާއީދު ކުރާ ފަރާތްތަކާއި، އިންސާނީ ހައްގުތަކަށް ވަކާލާތު ކުރާ ފަރާތްތަކާއި، ނޫސްވެރިންވެސް ހިމެނޭ ކަމަށެވެ. އަދި އަންހެނުންގެ ހައްގުތައް ވެސް ފުޅާ ދާއިރާއެއްގައި ނިގުޅައިގެންފައިވާ ކަމަށް ބުނެފައި ވެއެވެ.
"އުނާމާއިން ކަންބޮޑުވަނީ، އިންސާނީ ހައްގުތަކަށް އަރައިގަތުމުގެ އަމަލުތައް ހިންގާފަރާތްތަކަށް އަދަބު ނުދެވޭތީ،" އެ ބަޔާނުގައި ބުންޏެވެ.
ތާލިބާން ސަރުކާރުގެ ތަރުޖަމާނަކު ވަނީ އެ ރިޕޯޓުގެ ހޯދުންތައް ބަލައިނުގަންނާނެ ކަމަށް ބުނެފައެވެ. އަދި އެއީ އެއްވެސް އަސާސެއް ނެތް ހޯދުންތަކެއް ކަމަށް ސިފަކޮށްފައިވެއެވެ.
"އެއްވެސް ހަމައެއް ނެތި މީހުން ހައްޔަރުކުރުމާއި ޝަރުއީ އިމުން ބޭރުން މީހުން މެރުމަކީ ތާލިބާނުން ހުއްދަ ކުރާ ކަމެއް ނޫން،" ޒަބީހުالله މުޖާހިދު ޓްވިޓާގައި ވިދާޅުވި އެވެ. އަދި އެއްވެސް ފަރާތަކުން ކުރާ އެފަދަ ގާނޫނާ ހިލާފު އަމަލެއް ސާބިތުވެއްޖެ ކޮންމެ މީހަކީ ކުށްވެރިއެއް ކަމަށް ކަނޑައަޅާ ކަމަށާއި އަދި ޝަރީއާ ގާނޫނުގައިވާ ގޮތުގެ މަތިން އެ މީހަކާ މެދު އަމަލު ކުރާނެ ކަމަށްވެސް އޭނާ ވިދާޅުވި އެވެ.
ތާލިބާނުންގެ އޮފިޝަލުން މީގެ ކުރިން ބުނެފައި ވަނީ ބަދަލު ހިފުމުގެ ހަމަލާތައް ހިނގަމުން ދަނީ އެ ޖަމާއަތުގެ ލީޑާޝިޕްގެ ރުހުމާއެކު ނޫން ކަމަށާއި އަދި ތާލިބާނަށް ނިސްބަތްވާ މީހުންނަށް އެފަދަ އަމަލުތައް ކުރުން މަނާކޮށްފައިވާ ކަމަށެވެ. އަދި އިރުޝާދުތަކަށް ފުރިހަމައަށް ބޯނުލަނބާ އެލެމެންޓްތަކުގެ ސަފުތައް ފޫއަޅުވާލުމުގެ ޕްރޮގުރާމެއް ވެސް ފެށި ކަމަށް އެ މީހުން ބުންޏެވެ.
