ޕާކިސްތާނު ޑިފޯލްޓް ވަމުން ނުދާނެ ކަމަށް ޕާކިސްތާނުގެ އިގުތިސޯދީ މެނޭޖަރުން ޔަގީންކަން ދެއްވައިފިއެވެ. ޕާކިސްތާންގެ ރުޕީސްގެ އަގު 0.83 ޕަސަންޓް ދަށަށް ދިޔަ ނަމަވެސް، ރުޕީސްގެ އަގު މިވަގުތައް ހަމައަކަށް އެޅިފައިވާ ކަމަށާއި، މަހެއްހާ ދުވަހަށް ވުރެ ގިނަ ދުވަސް ވަންދެން ފުދޭ ވަރަށް ޕެޓްރޯލް އެބަހުރި ކަމަށެވެ.
ފިނޭންސް މިނިސްޓަރު މިފްތާހް އިސްމާއިލްއާއެކު ބޭއްވި ނޫސްވެރިންގެ ބައްދަލުވުމެއްގައި ޑިފެންސް މިނިސްޓަރު ޚަވާޖާ އާސިފް ވަނީ ސަރުކާރުގެ އިސް މުވައްޒަފުންނަށް ދޭ "އެގްޒެކެޓިވް އެލަވަންސް" އުވާލުމަށް ގޮވާލައްވާފައެވެ.
ވަކިން ޚާއްސަކޮށް އެނަރޖީ މިނިސްޓަރ ޚުއްރަމް ދޯސްތުގިރް ވިދާޅުވީ ޕާކިސްތާންގެ ޕެޓްރޯލިއަމް ޕްރޮޑަކްޓްގެ ރިޒާވް ހުރީ ރަގަޅު "ރެކޯޑް މިންވަރެއްގައި" ކަމަށެވެ.
ރުޕީސްގެ އަގު ދަށަށް ދިއުމުގެ މައިގަނޑު ސަބަބަކީ، އެމެރިކާ ޑޮލަރު ބާރުގަދަ ވުމާއި ގުޅިގެންނެވެ. މިހާރު ޑޮލަރު ހުރީ 20 އަހަރުގެ ތެރޭގައި ހުންނާނެ އެންމެ މަތީ އަގުގައެވެ. ޕާކސްތާން ރުޕީސް ވަނީ 204.85 ރުޕީސްއިން ގޮސް 227 އަށް ވެއްޓިފައެވެ.
މި ބައްދަލުވުމުގައި ތިއްބެވި ވަޒީރުން ވިދާޅުވީ ހާލަތަށް ރިއާޔަތްކޮށް ޕާކިސްތާނުގެ ސަރުކާރުގެ ސައިޒު ވީހާވެސް ބޮޑަށް ކުޑަކުރަން ޖެހޭ ކަމަށާއި، ނަމަވެސް އެއީ ވަރަށް ބޮޑު ކަމެއް ކަމަށެވެ. އަދި ބައެއް އާދަކާދައިގެ ވައްޓަފާޅިއަށް ބަދަލު ގެންނަން ޖެހޭ ކަމަށާއި، ބައެއް ވިޔަފާރިތައްވެސް ހަމައެކަނި ދުވާލު ގަޑީގައި ހުޅުވާފައި ބަހައްޓަން ޖެހޭ ކަމަށް ވެސް ހުށަހެޅުއްވިއެވެ.
