ޕާކިސްތާނަކީ ނިއުކްލިއަރ ބާރެކެވެ. އެހެންނަމަވެސް، އެ ގައުމުން ދަނީ ބޭރު ފައިސާގެ ރިޒާވް ބާރަށް ހުސްވެ، މާލީ އަދި އިގްތިސާދީ ކާރިސާއަކާ ދިމާއަށް މިސްރާބު ޖަހާފައެވެ. ސްޓޭޓް ބޭންކް އޮފް ޕާކިސްތާނުގެ ރިޒާވް 9.32 ބިލިއަން ޑޮލަރަށް ވެއްޓިފައިވާއިރު، މިއީ 45 ދުވަހުގެ އިމްޕޯޓަށް ދައްކަންޖެހޭ މިންވަރަށް ވުރެ މަދު އަދަދެއްގެ ރިޒާވްއެކެވެ. ސްޓޭޓް ބެންކު އޮފް ޕާކިސްތާންގެ ބޭރު ފައިސާގެ ރިޒާވްގެ ރެޑްލައިން އަކީ "ޑިފޯލްޓް" ވިޔަ ނުދިނުމަށް 7.5 ބިލިއަން ޑޮލަރެވެ.ޕާކިސްތާނުގެ ސިޔާސީ ނުތަނަވަސްކަމުގެ ސަބަބުން، މުހިންމު ލޯނުދޭ ފަރާތްތަކުގެ އިތުބާރު އަލުން ހޯދުމަށް ކުރަމުންދާ މަސައްކަތް ހުއްޓުމަކަށް އައުމުގެ ބިރުވެސް ވަނީ ހީވެފައެވެ. އިންވެސްޓަރުންގެ ކަންބޮޑުވުންތަކުން ރަމްޒުކޮށްދެނީ، ލަންކާއަށް ފަހު، ދެން ޕާކިސްތާންގެ އިގްތިސާދު ބަނގްރޫޓުވެ، ބޭރުގެ ދަރަނިތައް ނުދެއްކި، ޑިފޯލްޓްވެދާނެ ކަމުގެ ބިރު އޮތް ކަމެވެ.އެމެރިކާގެ ޑޮލަރުގައި މީގެ 20 އަހަރު ކުދިން ޖެހިފައި ނުވާރަށް މިހާރު ވަރު ޖެހުމުގެ ސަބަބުން ކުރިއަރަމުން އަންނަ ގައުމުތަކުގެ ފައިސާތަކަށް އޭގެ ހޫނުކަން އިޙުސާސް ކުރެވެން ފަށާފައި ވެއެވެ.
ޕާކިސްތާނުގެ ސްޓޮކް އަދި މަނީ މާކެޓުގައި އިތުރު ބިރުވެރިކަމެއް އުފެދިފައި މިވަނީ، ކުރީގެ ބޮޑުވަޒީރު އިމްރާން ޚާންގެ ޕާޓީން ޕަންޖާބުގެ ބައި-އިލެކްޝަން ކާމިޔާބު ކުރުމާއި އަދި ސިޔާސީ ހަމަނުޖެހުންތަކާއި، އައިއެމްއެފްއާއެކު ހަދާފައިވާ ބެއިލްއައުޓް އެއްބަސްވުން ތަންފީޒު ވުމާމެދު މީހުން ކަންބޮޑު ވެފައިވަނިކޮށެވެ. ރިޕޯޓްތައް ބުނާގޮތުން އަދި މާކެޓްގެ ޓްރެންޑްތައްވެސް ހުރި ގޮތަށް ބަލާއިރު ޕާކިސްތާނުގައި ޑޮލަރުގެ އަގު ކޮންޓްރޯލް ނުކުރެވުމުގެ ސަބަބުން ރުޕީސް އިތުރަށް އަގު ވެއްޓި ދަށަށް ހިނގައިދާނެ ކަމުގެ ބިރު ވަނީ ބޮޑުވެފަ އެވެ.
