އިންޑިއާއަކީ ތަރައްގީގައި ހަމައެކަނި އަވަށްޓެރި ގައުމުތަކުގެ ބައިވެރިއެއް ނޫންނެވެ. އެފްރިކާ ބައްރުގައިވެސް ތަރައްގީއަށް އިންޑިއާއިން ގައުމުތަކާ ގުޅިގެން މުހިންމު މަސައްކަތްތަކެއް ކުރެއެވެ.
އިންޑިއާއިން ވަނީ 162 މަޝްރޫޢަކަށް ޖުމްލަ 14.27 ބިލިއަން ޑޮލަރުގެ 37 ލައިން އޮފް ކްރެޑިޓް (އެލް.އޯ.ސީ) އަވަށްޓެރި 5 ޤައުމަކަށް ދޫކޮށްފައެވެ.
އެފްރިކާގެ 42 ޤައުމަކަށް 357 މަޝްރޫއަކަށް 14.07 ބިލިއަން ޑޮލަރުގެ އިތުރު 222 އެލް.އޯ.ސީ ދޫކޮށްފައި ވެއެވެ.
އިންޑިއާ ސަރުކާރުން ބުނާ ގޮތުން މި މަޝްރޫއުތަކަކީ މަގުތަކާއި ރޭލްވޭ، އަދި އިންޖީނުގެ އާއި ބަނދަރާއި ޝިޕިން، ޓެލެކޮމް ދާއިރާއާއި ހެލްތު، އެޑިއުކޭޝަން އަދި އޭވިއޭޝަން ފަދަ ދާއިރާތަކަށް ދީފައިވާ ގްރާންޓްތައް ކަމަށެވެ.
މި މަހުގެ ކުރީކޮޅު ނިއުދިއްލީގައި އިންޑިއާ އެގްޒިމް ބެންކާއި ވިޔަފާރި ވެރިން ގުޅިގެން ބޭއްވި އެފްރިކާއާއެކު އޮންނަ ގުޅުމާ ބެހޭ ސެމިނާރުގައި ޚާރިޖީ ވަޒީރު އެސް ޖައިޝަންކަރު ވިދާޅުވީ، ވަސީލަތްތައް ގިނަ އެފްރިކާ ކޮންޓިނެންޓަކީ އިންޑިއާގެ ހާރިޖީ ސިޔާސަތުގެ ތަސައްވުރުގައި ވަރަށް މުހިންމު ދައުރެއް އަދާކުރާ ކޮންޓިނެންޓެއް ކަމަށެވެ.
އަދި އެކަން ފެނިގެންދަނީ އެފްރިކާގެ 43 ގައުމެއް މިހާރު ކަވަރު ކުރާ ފުޅާވަމުން އަންނަ އިންޑިއާގެ ޑިޕްލޮމެޓިކް ފުޓްޕްރިންޓުން ކަމަށެވެ. އިންޑިއާއިން އެފްރިކާ ބައްރުގައި 197 މަޝްރޫޢެއް މިހާތަނަށް ނިންމާފައިވެއެވެ. އަދި އިތުރު 65 މަޝްރޫޢެއް މިހާރުވެސް ތަންފީޒުކުރަމުންދާއިރު، 81 މަޝްރޫޢެއް އޮތީ ސޮއިކުރުމުގެ މަރުހަލާގައެވެ.
އޭގެ އިތުރުން، އެފްރިކާގެ ގައުމުތަކަށް 700 މިލިއަން ޑޮލަރުގެ އެހީ ދީފައިވާ ކަމަށް އިންޑިއާ ސަރުކާރުން ބުނެއެވެ.އަދި އިންޑިއާއިން ވަނީ އަވަށްޓެރި ގައުމުތަކަށް ދީފައިވާ 37 ލައިން އޮފް ކްރެޑިޓްގެ މުއްދަތު ފަސް ގައުމަކަށް އިތުރުކޮށްދީފައެވެ. އެ އަވަށްޓެރި ފަސް ގައުމަކީ ބަންގްލަދޭޝް، ރާއްޖެ، މިޔަންމާ، ނޭޕާލް އަދި ސްރީލަންކާއެވެ.
މިގައުމުތަކުގެ ތެރޭން އެންމެ ގިނަ އެލްއޯސީގެ އެހީގެ ދަށުން، އިންޑިއާއިން އެންމެ ގިނަ އަދަދަކަށް މަޝްރޫއުތައް ތަންފީޒު ކުރަމުން ދަނީ ނޭޕާލްގައި 27 އަދި މިޔަންމާގައި 15، ބަންގްލަދޭޝްގައި 12، ލަންކާގައި 11 އަދި ރާއްޖޭގައި ތިން ޕްރޮޖެކްޓެވެ.
