ޗައިނާގެ ސަރަހައްދެއް ކަމަށް ބަލާ ޓައިވާންގެ މައްސަލާގައި ބެއިޖިންގއިން ރުޅިވެރިކަމާއެކު ދޭ ޖަވާބުތަކަކީ އެމެރިކާއަށް އައު ކަމެއް ނޫނެވެ. ނަމަވެސް އެމެރިކާގެ ހައުސް އޮފް ރެޕްރެޒެންޓޭޓިވްސްގެ ސްޕީކަރ ނެންސީ ޕެލޯސީ ޓައިޕޭއަށް ކުރެއްވަން އުޅުއްވާ މަތީ ފެންވަރުގެ ދަތުރުފުޅާ ދެކޮޅަށް މިދިޔަ ހަފްތާގައި ޗައިނާއިން ދިން އިންޒާރުތަކުގެ ސަބަބުން ވޮޝިންޓަންގައި ކަންބޮޑުވުން އުފެދިފައިވާކަމަށް ވަނީ ހާމަކޮށްފައެވެ.
ޕެލޯސީގެ ދަތުރުފުޅުގެ ޕްލޭންތަކާ ބެހޭ ރިޕޯޓްތައް ލިބުމާ އެކު، ޗައިނާގެ ފޮރިން މިނިސްޓްރީން މިދިޔަ އަންގާރަ ދުވަހު ވަނީ އެ ދަތުރު ކުރިއަށް ގެންދާނަމަ "ވަރުގަދަ ފިޔަވަޅުތަކެއް" އަޅާނެ ކަމަށް އިންޒާރު ދީފައެވެ.
އޭގެ ފަހުން އެމެރިކާގެ އޮފިޝަލުން ގެ ފަރާތުން ގިނަ ވާހަކަތަކެ ދެކެވި އިތުރަށް މައްސަލަ ހޫނުވެފައި ވެއެވެ.
އެމެރިކާގެ ރައީސް ޖޯ ބައިޑަން ނޫސްވެރިންނާ ވާހަކަ ދައްކަވަމުން ވިދާޅުވީ މި ވަގުތު ޕެލޯސީ ޓައިވާންއަށް ދަތުރުފުޅު ކުރެއްވުން ރަގަޅެއް ނޫންކަމަށެވެ.
ނަމަވެސް އޭގެފަހުން ޕެލޯސީ ވިދާޅުވީ ޓައިވާނަށް ތާއީދު އޮތްކަން ހާމަކުރުމަކީ މުހިންމު ކަމެއް ކަމަށާއި ނަމަވެސް ސަލާމަތީ ކަންކަމާ ގުޅޭ ގޮތުން އެއްވެސް މައުލޫމާތެއް ހިއްސާކުރައްވަން ދެކޮޅު ހެއްދެވިއެވެ. "އަޅުގަނޑަށް ހީވަނީ ރައީސް އެ ވިދާޅުވާ އެއްޗަކީ އަޅުގަނޑުގެ މަތިންދާބޯޓު ވައްޓާލައިގެން ނުވަތަ އެފަދަ ކަމެއް ވެދާނެތީ ސިފައިން ބިރުގަތީ ކަމަށް ވެދާނެ. އަޅުގަނޑަށް ސީދާ ނޭނގޭ،" ޕެލޯސީ ވިދާޅުވި އެވެ.
އެމެރިކާގެ ކުރީގެ ޚާރިޖީ ވަޒީރު މައިކް ޕޮމްޕެއޯވެސް ވަނީ ޕެލޯސީގެ މި ދަތުރުފުޅުގައި ޕެލޯސީއާ ގުޅިވަޑައިގަތުމަށް އޭނާ ތައްޔާރަށް ހުންނެވިކަމަށް ވިދާޅުވެފައެވެ.
އެމެރިކާގެ އޮފިޝަލަކު ސީއެންއެންއަށް ވިދާޅުވި ގޮތުގައި ޓައިވާން ސަރަހައްދުގައި އުދުހުން މަނާ ސަރަހައްދެއް ޗައިނާއިން ކަނޑައަޅައި، އެ ދަތުރު ނިމުމަކަށް ގެނައުމަށް ޗައިނާއިން މަސައްކަތް ކޮށްފާނެ ކަމުގެ ކަންބޮޑުވުން ބައިޑަންގެ ސަރުކާރުގެ އޮފިޝަލުން ވަނީ ފާޅުކުރައްވާފަ އެވެ.
މިހާރު އޮތް ގޮތުން ޕެލޯސީގެ ދަތުރު ލަސްކުރެއްވުން ނުވަތަ ޓައިވާނަށް ވަޑައިނުގަތުމަށް ނިންމެވުން ފަދަ ކޮންމެ ނިންމުމަކީ ޗައިނާއަށް ދެވޭ ދޫ ދިނުމެއްގެ ގޮތުގައި ދެކެފާނެ ކަމުގެ ބިރުވެސް އެބައޮތެވެ.
"ސްޕީކަރ ޕެލޯސީ ޓައިވާނަށް ވަޑައިގަންނަވަން ޖެހޭ، އަދި ރައީސް ބައިޑަން ޗެއަރމަން ޝީއަށް ވަރަށް ސާފުކޮށް ވިދާޅުވެދެއްވަން ޖެހޭ، ޗައިނާގެ ކޮމިއުނިސްޓް ޕާޓީއަށް އެކަމުގައި ކުރެވޭނެ މާބޮޑު ކަމެއް ނެތްކަމަށް" ރިޕަބްލިކަން ޕާޓީގެ ސެނެޓަރަކު ވިދާޅުވިއެވެ.
މި ދަތުރުފުޅާ ގުޅިގެން ޗައިނާ ސަރުކާރުން އަޅަން ރާވާފައިވާ "ބާރުގަދަ ފިޔަވަޅުތަކަކީ" ކޮބައިކަން ފާޅުގައި ބަޔާންކޮށްފައި ނުވި ނަމަވެސް، ޗައިނާއާ ބެހޭ ބައެއް ތަޖުރިބާކާރުން ވިދާޅުވާ ގޮތުގައި ބެއިޖިން އިން ދޭން އުޅޭ ރައްދުގައި އަސްކަރީ ކަންތައްތަކެއް ހިމެނިފައި އޮތުމަކީ އެކަށީގެންވާ ކަމެކެވެ.
