ޕާކިސްތާނުގައި ހަވަރު އެއްވެ މީހުންނަށް އަނިޔާ ކުރުމާއި މެރުމުގެ އަމަލުތައް ހިންގަމުން ގެންދާތީ ހިއުމަން ރައިޓްސް ކޮމިޝަން އޮފް ޕާކިސްތާން (އެޗްއާރްސީޕީ) އިން އެކަން ކުށްވެރިކޮށްފިއެވެ.
މިހަފްތާ ފެށުނު އިރުވެސް ކަރާޗީގައި ހިނގި ވައްކަމުގެ މައްސަލައަކާ ގުޅިގެން އާންމުންގެ ބަޔަކު ވަނީ ތުހުމަތު ކުރެވުނު މީހާގެ ގަޔަށް ބަޑި ޖަހައި މަރާލާފައެވެ.
ޕާކިސްތާންގެ ހިއުމަން ރައިޓްސް ކަންކަން ބަލަހައްޓާ އިދާރާއިން ބުނީ ހަވަރު އެއްވެ، ސުލްޙަމަސަލަސްކަން އަތްމައްޗަށް ނެގުމުގެ ސަބަބުން ވަރަށް ބޮޑަށް ކަންބޮޑުވާ ކަމަށެވެ.
އަދި މިފަދަ ކަންކަމަކީ މުޖުތަމަޢުގައި އަނިޔާވެރިކަން އިތުރުވެފައި ވުމާއި ފަސޭހައިން ހަތިޔާރު ލިބެން ހުރުމުގެ އަލާމާތެއް ކަމުގައި ވީނަމަވެސް، މިކަމުގެ އަސްލަކީ ފަޤީރުކަން އިތުރުވުން ކަމުގައި ބުނެފައި ވެއެވެ. އަދި ޤާނޫނުގެ ބާރު ނެގެހެއްޓުމަށް ރައްޔިތުން ކުރާ އުންމީދުތައް އިތުރުވެގެން ގޮސްފައިވާ ކަމުގައިވެސް ހިއުމަންރައިޓްސް ކަމިޝަނުން ބުންޏެވެ. ފާއިތުވެދިޔަ އެތައް މަހެއްގެ ތެރޭގައި ޕާކިސްތާނުގައި ހަވަރު އެއްވެ ހަމަނުޖެހުން އުފެއްދުމުގެ އެތައް މައްސަލަތަކެއް ވަނީ ކަންބޮޑުވާ ދަރަޖައަކަށް އިތުރުވެފައެވެ.މިދިޔަ މަހުގެ 29 ވަނަ ދުވަހު، އޮރަންގީ ޓައުންގައި ހުންނަ ކަރާޗީގެ ޖައުހަރު ޗޯކްގައި އާއިލާއެއްގެ އަތުން މޯބައިލް ފޯނުތަކެއް ޖަހައިގަނެގެން ދިޔަ މީހަކުވެސް ހިފަހައްޓައި އާނމުންގެ ބަޔަކު ވަނީ އަނިޔާކޮށްފައެވެ.
