ޗައިނާގެ ގޭންގްތަކުން އިންޑިއާގައި މީހުންނަށް މަކަރު ހަދައި ފައިސާ ހޯދުމުގެ ގާނޫނާ ހިލާފަށް ކަންތައްތަކެއް ހިންގަމުން ގެންދާ ކަމަށް އެ ގައުމުގެ ނޫސްތަކުން ބުނެއެވެ. ފަހަކަށް އައިސް އެތައް ޑިޖިޓަލް ލޯންޝާކް ކޭސްތަކެއް މީޑިއާގައި ރިޕޯޓް ކޮށްފައި ވެއެވެ.
ދާދި ފަހުން ދިއްލީގެ ދަވާރްކާ އޭރިއާގައި 'ޗައިނީޒް ލޯން އެޕް' ގެ ނަމުގައި މަކަރު ހަދަމުން ދިޔަ ބައެއްގެ މައްސަލައެއް ފެންމަތިވި އެވެ.
މި ގޭންގް ހިންގަމުން ދިޔައީ ޗައިނާގެ ބައެއް އަޑީގައި ތިބެގެން ލޯކަލް ކޮންސަލްޓިން ފާމެއް ކަމަށްވާ ފްލައި ހައި ގްލޯބަލް ސާވިސަސް އެންޑް ޓެކްނޮލޮޖީގެ ނިވަލުގައެވެ.
މިމީހުން މީސްމީޑިއާގައި އިޝްތިހާރު ކުރަން ފެށީ އޮންލައިން ލޯން އެޕްގެ ގޮތުގައެވެ. އެއީ މިނެޓުތަކެއްގެ ތެރޭގައި އުނދަގުލަކާ ނުލާ ލޯނު ލިބޭ ގޮތް ހަދައިދޭ ކަމަށް ބުނެއެވެ.
ކޮމިޑާ ގުޅިގެން ކުއްލި ޚަރަދުތައް ހަމަޖެއްސުމަށް އެންމެ ބޮޑަށް ގެއްލުން ލިބުނު އަދި އާއިލާތަކަށް އެފަދަ ފަސޭހައެއް އޮތީ ވަރަށް ބޮޑަށް ބޭނުންވެފައެވެ.
މި އެޕް ޑައުންލޯޑް ކުރާއިރު ވިކްޓިމްސްގެ ކޮންޓެކްޓްތަކަށް އެކްސެސް ވުމުގެ ހުއްދައަށް އެދެއެވެ.
މިމީހުންގެ މައްސަލަތައް ބޮޑުވެގެން ފުލުހަށް މައްސަލަ ހުށަހެޅި ގިނަ މީހުންނަކީ އެ މީހުންނަށް ބިރު ދައްކައި، އަނިޔާކޮށް، ބްލެކްމެއިލް ކުރި މީޙުންނެވެ. އަދި މިމީހުން މީހުންގެ ޒާތީ މައުލޫމާތާއި ޓެކްސް މައުލޫމާތަށް ޖާސޫސް ކުރިކަމަށްވެސް ތަހުގީގަށް ސާބިތުވެފައިވާ ކަމަށް ފުލުހުން ބުނެއެވެ.
ފާއިތުވެދިޔަ ހަތަރު މަސް ދުވަހުގެ ތެރޭގައި އެ ގޭންގުން 12 މިލިއަން ޑޮލަރާ ގާތްކުރާ އަދަދަކަށް މީޙުންގެ އަތުން ފައިސާ އަތުލާފައިވާ ކަމަށް ތުހުމަތު ކުރެވެއެވެ. މިމީހުން ނިވާފައްގަނޑަކަށް ބޭނުން ކުރި އިންޑިއާ ކުންފުންޏަށް 30 ޕަސެންޓް ދޭން އެއްބަސްވެފައި ވެއެވެ.
ދަވަރްކާގައި މި މީޙުން ބޭނުން ކުރި އޮފީސް ރެއިޑް ކުރުމުގެ ތެރޭގައި ފުލުހުންނަށް 300 ސިމް ކާޑާހޯދައި ގަނެވުނެވެ. އަދި އެކުންފުނީގައި މިމަސައްކަތުގައި 150 އެއްހާ ސްޓާފުން މަސައްކަތް ކުރާކަން އެނގުމުން ފުލުހުންވެސް ހައިރާންވި ކަމަށ ްބުނެއެވެ.
