އަފްޣާނިސްތާނުގެ ނޫސްވެރިންގެ މަރުކަޒު (އޭއެފްޖޭސީ) އިން ބުނި ގޮތުގައި ފަރިޔާބް ޕްރޮވިންސްގައި ތާލިބާނުންގެ އިންޓެލިޖެންސް ޔުނިޓުން ނޫސްވެރިއަކު ހައްޔަރުކޮށްފައެވެ.
އޭއެފްޖޭސީން ކުރި ޓުވީޓެއްގައި ބުނެފައިވަނީ ފަރިޔާބުގެ ޕްރޮވިންޝަލް ޑިސްޓްރިކްޓްގެ މައިމާނާއިން ސަލާމް ވަތަންދާރް ރޭޑިއޯގެ ސީނިއާ ރިޕޯޓަރު މިއަދު ހެނދުނު 10:30 ހާއިރު ހައްޔަރު ކޮށްފައިވާ ކަމަށެވެ.
ފަރިޔާބް ޕްރޮވިންސްގައި ހުންނަ ތާލިބާނުންގެ ޑެޕިއުޓީ އިންޓެލިޖެންސް އޮފިސަރު ތަލްހާ އާ ހަވާލާދީ ބައިނަލްއަގުވާމީ މީޑިއާއިން ރިޕޯޓްކުރާ ގޮތުގައި، ލޯކަލް ނޫސްވެރިންގެ ތެރޭގައި ހިމެނޭ އަލާއުއްދީން އެރްކިން ތާލިބާނުން ވަނީ ހައްޔަރުކޮށްފައެވެ. އަދި ސަލާމް ވަޠަންދާރުންވެސް ނޫސްވެރިޔާ ހައްޔަރު ކުރި ސަބަބު އަންގައިފައި ނުވާކަމަށް ބުންޏެވެ.
މީގެ ދުވަސްކޮޅެއް ކުރިން، އަފްޣާނިސްތާނުގެ އިރުމަތީ ޕްރޮވިންސެއް ކަމަށްވާ ނަންގަރްހާރްގައި ހިންގާ ދޯސްތު ރޭޑިއޯގެ އަންހެން ހޯސްޓެއް ކަމަށްވާ ސެލާގީ އިހްސާސް ހިފަހައްޓައި މަރުވަންދެން އޭނާއަށް އަނިޔާކޮށްފައިވާ ކަމަށްވެސް ރިޕޯޓް ކޮށްފައި ވެއެވެ.
ނޫސްވެރިންގެ މަރުކަޒު އޭއެފްޖޭސީން ވަނީ ސަބަބަކާ ނުލައި ނޫސްވެރިން ހައްޔަރު ކުރުމުން ކަންބޮޑުވުން ފާޅުކޮށްފައެވެ. އަދި ނޫސްވެރިންނަށް ފިއްތުން ކުރިމަތި ކުރުމާއި އަނިޔާވެރިކަން އިންތިހާއަށް އިތުރުވެފައިވާތީ އެކަން ކުށްވެރިކޮށްފައެވެ.
އަފްޣާނިސްތާނުގެ އެސޯސިއޭޝަން އޮފް ފްރީ ޖާނަލިސްޓްސް އިން މެއި މަހުގެ ކުރީކޮޅު ޝާއިއުކުރި ރިޕޯޓެއްގައި ވާގޮތުން ތާލިބާނުންނަށް ކާބުލްގައި ބާރު ލިބުނު ފަހުން ގާތްގަނޑަކަށް ހަ ހާސް ނޫސްވެރިންގެ ވަޒީފާ ގެއްލިފައި ވެއެވެ. އަދި 287 މީޑިއާ އެއް ވަނީ ބަންދުކޮށްފަ އެވެ.
