ވޯލްޑް ބޭންކުން ވަނީ އިންޑިއާގެ ރައްޔިތެއް ކަމަށްވާ އިންދަރްމިތު ގިލް އެބެންކުގެ ޗީފް އިކޮނޮމިސްޓް އަދި ސީނިއާ ވައިސް ޕްރެޒިޑެންޓް ފޯ ޑިވެލޮޕްމަންޓް އިކޮނޮމިކްސްގެ މަގާމަށް އައްޔަންކޮށްފައެވެ.
ވަލްޑް ބެންކުން ނެރުނު ބަޔާނެއްގައި ބުނެފައި ވަނީ ތަފާތު އެތައް ވައްތަރެއްގެ ތަޖުރިބާތަކެއް ޕްރޮފެސަރ ގިލް މި މަގާމަށް އައްޔަން ކުރުމުން ވަރލްޑް ބެންކަށް ލިބިގެންދާނެ ކަމަށެވެ.
އޭނާ ރަސްމީކޮށް މަގާމާ ޙަވާލުވެ ވަޑައިގަންނަވާނީ 1 ސެޕްޓެމްބަރ 2022 އިން ފެށިގެންނެވެ.
މިއީ ވަރލްޑް ބެންކުގައި ޗީފް އިކޮނޮމިސްޓްގެ މަގާމު ފުރުއްވާ ދެވަނަ އިންޑިއާ ބޭފުޅާއެވެ. މީގެ ކުރިން ކައުޝިކް ބާސޫ ވަނީ 2012-2016 އަށް އެ ވަޒީފާގައި މަސައްކަތް ކުރައްވާފައެވެ.
އިންޓަރނޭޝަނަލް މަނިޓަރީ ފަންޑްގައި އިންޑިއާގެ އެހެން ދެ އިގްތިސާދީ މާހިރަކު މަސައްކަތް ކުރައްވައެވެ. އެއީރަގީރާމް ރަންޖަންއާއި ގީތާ ގޯޕީނަތުއެވެ.
ގިލް އަކީ ތަރައްގީގެ އިގްތިސޯދާ ބެހޭ ގޮތުން ގިނަ އިލްމީ ދިރާސާތަކެއް ކުރައްވާފައިވާ ބޭފުޅެކެވެ. އޭނާ ވަނީ 2009 ވަނަ އަހަރު ނެރުނު "ވޯލްޑް ޑިވެލޮޕްމަންޓް ރިޕޯޓް އޮން އިކޮނޮމިކް ޖިއޮގްރަފީ" ގައި އިސްކޮށް ހަރަކާތްތެރިވެ ވަޑައިގެންފައެވެ.
އޭނާގެ އިސްމަސައްކަތްތަކުގެ ތެރޭގައި، ތަރައްޤީވަމުން އަންނަ ޤައުމުތައް، އާމްދަނީ ވަކި ދަރަޖައަކަށް ވާސިލުވުމަށްފަހު، މަޑުޖެހިފައިވާ ގޮތް ކިޔައިދިނުމުގެ ގޮތުން "މިޑްލް އިންކަމް ޓްރެޕް" ގެ ކޮންސެޕްޓް ތަޢާރުފް ކުރުން ހިމެނެއެވެ. އަދި އޭނާ ވަނީ ތަރައްގީވަމުން އަންނަ ގައުމުތަކަށް ކުރިމަތިވާ ޕޮލިސީ މައްސަލަތަކާއި، ސޮވެރިން ދަރަންޏާއި، ގްރީން ގްރޯތް އާއި، ލޭބަރ މާކެޓްތަކާއި، ފަގީރުކަމާއި ހަމަހަމަކަން ނެތުމާއި، ގުދުރަތީ ވަސީލަތްތަކުގެ މުއްސަނދިކަން މެނޭޖްކުރުމާ ބެހޭ ގޮތުން ފުޅާ ދާއިރާއެއްގައި ލިޔުންތައް ޝާއިއުކުރައްވާފައެވެ.
ގިލް ވަނީ 2016 ވަނަ އަހަރާއި 2021 ވަނަ އަހަރާ ދެމެދު ޑިއުކް ޔުނިވާސިޓީގެ ޕަބްލިކް ޕޮލިސީގެ ޕްރޮފެސަރުކަމާއި ބްރޫކިންސް އިންސްޓިޓިއުޝަންގެ ގްލޯބަލް އިކޮނޮމީ އެންޑް ޑިވެލޮޕްމަންޓް ޕްރޮގްރާމްގެ ނޮން ރެސިޑެންޓް ސީނިއާ ފެލޯކަން ކުރައްވާފައެވެ.
އަދި އޭނާ ވަނީ ޖޯޖްޓައުން ޔުނިވާސިޓީ އާއި ޔުނިވާސިޓީ އޮފް ޗިކާގޯގައި ވެސް ކިޔަވައިދެއްވާފަ އެވެ. ނޯބެލް އިނާމު ލިބިވަޑައިގެންފައިވާ ގެރީ ބެކަރ އާއި ރޮބާޓް އީ ލޫކަސް ޖޫނިއަރ ގެ ދަރިވަރެއް ކަމަށްވާ ގިލް ވަނީ ޔުނިވާސިޓީ އޮފް ޗިކާގޯ އިން އިކޮނޮމިކްސް ގެ ދާއިރާއިން ޕީއެޗްޑީ ހާސިލްކުރައްވާފައެވެ.
އޭނާ ވަނީ ދިއްލީ ސްކޫލް އޮފް އިކޮނޮމިކްސް އިން އެމް.އޭ އަދި ޔުނިވަރސިޓީ އޮފް ދިއްލީގެ ސެއިންޓް ސްޓެފަންސް ކޮލެޖުން އިކޮނޮމިކްސްގެ ދާއިރާއިން ބީ.އޭ އޮނަރޒް ހޯއްދަވާފައެވެ.
