ކޮވިޑް-19 އަށް ޓެސްޓުކުރުމުގައި އިނގިރޭސިވިލާތުގައި ބޮޑެތި ގޯސްތައް ހެދިފައިވާކަން ހާމަވެއްޖެއެވެ.
އިނގިރޭސިވިލާތުގައި ކޮވިޑަށް ޓެސްޓްކުރުމުގެ ކަންކަން ކުރަނީ ސަރުކާރުގެ އިދާރާ، ނޭޝަނަލް ހެލްތު ސަރވިސްއިންނެވެ.
އެހެން ނަމަވެސް، ކޮވިޑަށް ޓެސްޓުކުރުމާއި، ކޮންޓެކްޓް ޓްރޭސިން ނިޒާމުގެ ތެރެއިން ހެދުނު ގޯސްތަކެއްގެ ސަބަބުން 1،300 އަށްވުރެ ގިނަ މީހުންގެ ޓެސްޓުގެ ނަތީޖާ ނެގަޓިވް ނަމަވެސް އެމީހުންނަށް އެންގުނީ ޕޮޒިޓިވް ކަމަށެވެ.
މިކަން މިގޮތަށް ހިނގާފައިވާކަން އިނގިރޭސި ސަރުކާރުގެ ޑިޕާޓްމަންޓް އޮފް ހެލްތު އެންޑް ސޯޝަލް ކެއަރއިންވަނީ ކަށަވަރު ކޮށްދީފައެވެ.
ހެލްތު ޑިޕާޓްމަންޓުން ބުނެފައިވަނީ، މި ނޮވެމްބަރުމަހުގެ 19 އާއި 23 އާ ދެމެދު ހެދުނު ޓެސްޓުތަކަށްފަހު 1،311 މީހަކަށް ޕޮޒިޓިވްކަން އެންގިފައިވާ ކަމަށެވެ. ނަމަވެސް އެމީހުންގެ އަސްލު ނަތީޖާ ނެގަޓިވް ކަމަށެވެ.
ގޯސް ހެދިފައިވަނީ ޓެސްޓްހަދާ ލެބޯޓަރީ ތެރެއިން ކަމަށާއި، މިކަން އެނގުމާއެކު ވަގުތުން ފިޔަވަޅުތައް އެޅުނު ކަމަށް ޑިޕާޓްމަންޓް އޮފް ހެލްތު އެންޑް ސޯޝަލް ކެއަރއިން ބުނެފައި ވެއެވެ.
އަދި ނުބައި ނަތީޖާ ދެވުނު އެންމެން އަލުން ޓެސްޓުކުރަން އެދި، އަދި ޓެސްޓުގެ ނަތީޖާ ލިބެންދެން އައިސޮލޭޝަންގައި ތިބުމަށް އެދިފައިވާނޭ ކަމަށްވެސް ބުނެފައި ވެއެވެ.
ކޮވިޑަށް ޓެސްޓްކުރާ މީހުންނަށް ނުބައި ނަތީޖާތައް ދިނުމުގެ އެތައް މައްސަލައެއް މީގެކުރިންވެސް ފެންމަތިވެފައި ވެއެވެ. ސަރުކާރުގެ ބައެއް ވަޒީރުންވެސްވަނީ، އެ ބޭފުޅުން އުންމީދުކުރެއްވި ގޮތަށް ޓެސްޓްކުރުމާއި، ޓްރޭސިންގެ މަސައްކަތްތައް ނުދާކަމަށް ވިދާޅުވެފައެވެ.
އިނގިރޭސިވިލާތުގައި ކޮވިޑްބަލީގެ ހާލަތު ގޯސްވަމުންދާތީ، މިވަގުތު މުޅި ގައުމުއޮތީ މަސްދުވަހަށް ލޮކްޑައުންކޮށްފައެވެ.
ލޮކްޑައުންގެ މުއްދަތު ޑިސެމްބަރު 2 ގައި ހަމަވެ، މުޅި ގައުމު ހުޅުވާލަން ތައްޔާރުވަމުން ދާއިރު، އިނގިރޭސި ސަރުކާރުންވަނީ 7 ބިލިއަން ޑޮލަރުގެ ބަޖެޓެއް ކަނޑައަޅައި، ކޮވިޑަށް ޓެސްޓުކުރުމާއި، ކޮންޓެކްޓް ޓްރޭސިންގެ މަސައްކަތްވެސް އިތުރަށް ފުޅާކޮށްފައެވެ.
