އިރާގުގެ ވެރިރަށް ބަޣުދާދުގައި އާންމު ރައްޔިތުން ޕާލަމެންޓް އިމާރާތަށް ވަދެގެންފިއެވެ. މި ހަމަނުޖެހުމުގައި ބައިވެރިވާ މީހުންނަމީ އިރާގްގެ ހަރުކަށި ޝީއީ ލީޑަރު މުޤްތަދާ އައްޞަދުރަށް ތާއީދު ކުރާ މީހުންނެވެ.
މުޒާހަރާ ކުރި މީޙުން ދެކޮޅު ހަދަނީ އީރާނުގެ ތާއީދު ލިބިފައިވާ ޕާޓީތަކުން ބޮޑުވަޒީރުކަމަށް ބޭފުޅެއްގެ ނަން ހުށަހެޅުމާ ދެކޮޅަށެވެ.
ސަރުކާރުގެ އިމާރާތްތަކާއި ޑިޕްލޮމެޓިކް މިޝަންތައް ހުންނަ ގްރީން ޒޯންގައި މުޒާހަރާގެ ބައިވެރިން ގާނޫނު ހަދާ މަޖިލީހަށް ވަދެގަތް އިރު، އެއްވެސް މެމްބަރަކު ޕާލަމެންޓްގައި ހާޒިރުވެވަޑައިގެން ނެތެވެ. އިމާރާތުގެ ތެރޭގައި ތިބީ ހަމައެކަނި ސެކިއުރިޓީ ބަލަހައްޓާ ފަރާތްތަކެވެ.
މުޒާހަރާގެ ބައިވެރިން ވަނީ އީރާނަށް ތާއީދުކުރާ ކޯޑިނޭޝަން ފްރޭމްވޯކްގެ ޕްރިމިއަރ ކަމަށް ވާދަކުރައްވާ ކުރީގެ ވަޒީރު އަދި ކުރީގެ ޕްރޮވިންޝަލް ގަވަރުނަރު މުހަންމަދު ޝިއާ އަލް ސޫދާނީގެ ކެންޑިޑެސީއާ ދެކޮޅު ކަން އިއުލާން ކޮށްފައެވެ.
ބޮޑުވަޒީރު މުސްތަފާ އަލް ކާޒިމީ ވަނީ މުޒާހަރާގެ ބައިވެރިން ގްރީން ޒޯނުން "ވަގުތުން ނިކުތުމަށް" ގޮވާލައްވާފައެވެ.
އޭނާ ނެރުއްވި ބަޔާނެއްގައި ވިދާޅުވެފައިވަނީ ސަލާމަތީ ބާރުތަކުން "ދައުލަތުގެ މުއައްސަސާތަކާއި ބޭރުގެ މިޝަންތަކުގެ ހިމާޔަތާއި ރައްކާތެރިކަން ކަށަވަރުކޮށްދީ، އަމަން އަމާންކަން ގާއިމް ކުރުމަށް" މަސައްކަތް ކުރާނެ ކަމަށެވެ.
