އިންޑިއާ ކަނޑުގެ ސަރަހައްދުގައި ޓްރާންސްނޭޝަނަލް ކްރައިމްސްއައި ޓެރަރިޒަމް އަދި ޑްރަގް ޓްރެފިކިންގެ ނުރައްކަލާ ދެކޮޅަށް އިތުރު ފިޔަވަޅުތައް ހަރުދަނާ ކުރުމަށް އިންޑިއާއިން ވަނީ ރާއްޖޭގެ ސިފައިންނަށް 24 އުޅަނދާއި އެއް ނޭވީ ބޯޓު ދިނުމަށް ނިންމާފައެވެ. އިންޑިއާއަކީ ރާއްޖޭގެ ސިފައިން ތަމްރީނު ކުރުމުގައި އެންމެ އިސްކޮށް އެހީތެރިވެދޭ ގައުމެވެ.
އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅުގައި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއެކު އިންޑިއާގެ ބޮޑުވަޒީރު ނަރެންދުރަ މޯދީ ދެޤައުމުގެ ދެމެދުގައި ބޭއްވެވި މަޝްވަރާތަކަށްފަހު، ވިދާޅުވީ، "ޓްރާންސް ނޭޝަނަލް ކްރައިމްސް، ޓެރަރިޒަމް އަދި ޑްރަގް ޓްރެފިކިންގގެ ނުރައްކާ އިންޑިއާ ކަނޑުގައި ވަރަށް ބޮޑު. އެހެންކަމުން، ދިފާޢީ އަދި ސަލާމަތީ ދާއިރާއިން ރާއްޖެއާއި އިންޑިޔާއާ ދެމެދު ގާތް ގުޅުމެއް އުފެދި، ވިލަރެސްކުރުމަކީ، މުޅި ސަރަޙައްދުގެ ހަމަޖެހުމާއި ޞުލްޙަ މަސަލަސްކަން ދެމެހެއްޓުމަށްޓަކައި ވަރަށް މުހިންމު ކަމެއް" ކަމުގައެވެ.
މޯދީ ވިދާޅުވީ މި އާންމު ގޮންޖެހުންތަކާ ދެކޮޅަށް އެއްބާރުލުން އިތުރުކުރަން އިންޑިއާއިން ނިނމާފައިވާ ކަމަށާއި އަދި ރާއްޖޭގެ ސަލާމަތީ ބާރުތަކުގެ ވެރިންނަށް ބޭނުންވާ ކެޕޭސިޓީ ބިލްޑިންގ އާއި ޓްރެއިނިންގ އަދި ސަޕޯޓް ވެސް އިންޑިއާއިން ދިއުމަށް އެއްބަސްވެފައިވާ ކަމަށެވެ.
"އަޅުގަނޑު ވަރަށް އުފަލާއެކީގައި އިޢުލާނު ކުރަން، އިންޑިޔާއިން ދިވެހިރާއްޖޭގެ ސަލާމަތީ ބާރަށް 24 ވެހިކަލާއި، އެއް ނޭވަލް ބޯޓް ފޯރުކޮށްދޭނެ ކަމަށް. އަދި ރާއްޖޭގެ 61 ރަށެއްގައި ފުލުހުންގެ ޚިދުމަތް ބިނާކުރުމަށް ވެސް އެއްބާރުލުން އިންޑިއާއިން އެއްބާރުލުން ދޭނެ" މޮދީ ވިދާޅުވިއެވެ.
